UMikha 2 - iBhayibhili Elingcwele 1978

Ukuxwayiswa kwabacindezeli

¹ Maye kulabo abenza amacebo obubi, benze okubi emibhedeni yabo! Lapho sekusile bazakwenza, ngoba balamandla okukwenza.

² Bahawukela amasimu, bawathathe ngodlakela, lezindlu bayazithatha; bathathela umuntu umuzi wakhe, bamthathele lelifa lakhe.

³ Ngakhoke iNkosi ithi: Ngenza amacebo amabi ngalesisizwe, elingayikukhupha intamo zenu kuwo; futhi kalisayikuhamba ngokuzikhukhumeza, ngoba kuzakuba yisikhathi esibi leso.

⁴ Ngalolosuku bazahlabela ingoma eyinhlekisa ngani, bakhale isililo esikhulu, bathi: Ilizwe labantu bakithi labiwe; kakho ongalibuyisa kithi; labo abasithumbileyo basithathele amasimu ethu; sichithekile impela!

⁵ Ngenxa yalokhu kakuyikuba khona ozakulenzela inkatho ngentambo ebandleni leNkosi.

⁶ Abantu batshumayela bathi: Lingatshumayeli, lingatshumayeli ngalezizinto; ihlazo kaliyikusehlela.

⁷ Lithi abakoIsrayeli baqalekisiwe na? INkosi iyaphangisa ukuthukuthela na? Lezi ziyizenzo zayo na? Kawamsizi yini amazwi ayo ohamba ngobuqotho na?

⁸ INkosi ithi: Kanti liyizitha zabantu bami, libahlubule ingubo zabo abathanda ukuthula, lalabo abadlulayo bevela empini, besithi bavikelekile.

⁹ Lixotshe abesifazana babantu bami ezindlini abazithandayo; ebantwaneni babo lisuse udumo lwami kokuphela.

¹⁰ Sukani lihambe, ngoba lapha kakusiyo indawo yokuphumula, ngenxa yokungcola okuletha ukuchitheka okukhulu.

¹¹ Uba kuhambahamba umuntu okhuluma umoya lamanga esithi: Ngizalitshumayeza ngewayini lotshwala: uzakuba ngumtshumayeli abamthandayo lababantu.

¹² Ngizakulibutha lonke, lina bakoJakobe, ngibuthe abaseleyo bakoIsrayeli, ngibabuthelele ndawonye njengezimvu esibayeni, njengomhlambi osedlelweni lawo, libe lixuku labantu ababanga umsindo.

¹³ Umkhokheli wabo uzabavulela indlela, bonke bazafohla, bafike esangweni, baphume ngalo. Inkosi yabo izahamba phambi kwabo, bekhokhelwa yiyo.