UMikha 1 - iBhayibhili Elingcwele 1978

Isililo ngeSamariya leJerusalema

¹ Ilizwi leNkosi lafika kuMika waseMoreshethi ensukwini zikaJothamu loAhazi loHezekiya, amakhosi akoJuda aliboniswa ngeSamariya langeJerusalema.

² Wathi: Zwanini, bantu lonke, ulalele lawe mhlaba lakho konke okukuwo; iNkosi uNkulunkulu kayibe ngufakazi ngani, iNkosi isethempelini layo elingcwele.

³ Ngoba iNkosi iyasuka endaweni yayo, izakwehla inyathele endaweni eziphakemeyo zomhlaba.

⁴ Intaba zizancibilika ngaphansi kwayo lezihotsha ziqekezeke, zincibilike njengengcino phambi komlilo, zibe njengamanzi ageleza emaweni.

⁵ Konke lokhu kungenxa yezono zikaJakobe, langenxa yezono zikaIsrayeli. Siyini isono sikaJakobe na? Kasisilo iSamariya na? Siyini isono sikaJuda na? Kasisilo iJerusalema na?

⁶ Ngakho ngizadiliza iSamariya ngilenze libe yindawo yezivini, ngiphosele amatshe alo esihotsheni, ngiphande izisekelo zalo.

⁷ Zonke izithombe zalo zizakuphahlazwa, lawo wonke amahlawulo alo okuwula azatshiswa ngomlilo, lezithombe zonke zalo zibulawe; ngoba lizizuze ngamahlawulo amawule, zizabuyiselwa emahlawulweni okuwula.

⁸ Ngenxa yalokhu ngizalila ngikhale, ngihlubule ngihambeze, ngikhale njengamakhanka, ngilile njengezintshe.

⁹ Ngoba amanxeba alo kawapholi, lokhu sekufikile lakoJuda; kufinyelele esangweni labantu bami eJerusalema.

¹⁰ Lingakuxoxi eGathi, lingakhali; lizibhuqe othulini eBeti‐Leyafra.

¹¹ Dlulani, lina baseShafiri, lihambeze lilenhloni; abakhe eZanani kabaphumanga emzini wabo; abaseBeti‐Ezeli bayakhala, kabalamandla okulisiza.

¹² Ngoba abakhe eMarothi balindele okuhle belovalo, ngoba okubi kwehlile kuvela eNkosini, kwafika esangweni leJerusalema.

¹³ Bophelani enqoleni amabhiza alejubane, lina baseLakishi; laliyikuqala kwezono zeZiyone, ngoba iziphambeko zakoIsrayeli zafunyaniswa kini.

¹⁴ Ngakhoke lizanika uMoreshethiGathi isipho sokuvalelisana; iBeti‐Akizibi lizakuba yinkohliso emakhosini akoIsrayeli.

¹⁵ Ngizakulilethela umnqobi, lina baseMaresha; udumo lukaIsrayeli luzakuyacatsha obhalwini lwaseAdulamu.

¹⁶ Phucani inwele zenu ukuba likhalele abantwana elibathandayo; phucani libe njengokhozi, ngoba bazathunjwa kini.