UMatewu 8 - iBhayibhili Elingcwele 1978UJesu usilisa umuntu olobulephero ( Mark 1:40–45 ; Luka 5:12–16 ) 1 Kwathi esehlile entabeni, amlandela amaxuku amakhulu. 2 Khangela, umuntu olobulephero weza, waguqa phambi kwakhe, wathi: Nkosi, aluba uthanda ungangihlambulula. 3 Welula isandla, wamthinta wathi: Ngiyathanda, hlambuluka. Wahle wahlambuluka kubo ubulephero bakhe. 4 UJesu wathi kuye: Khangela, ungatsheli muntu, kodwa hamba uziveze kumpristi, unikele umnikelo owalaywa nguMose, kube yibufakazi ebantwini. Ukusiliswa kwenceku yenduna ( Luka 7:1–10 ) 5 Kwathi esangena eKapenawume, kweza kuye induna yekhulu, yamncenga yathi: 6 Nkosi, inceku yami ilele endlini iyisilima, iphethwe kakhulu yibuhlungu. 7 Wathi kuyo: Ngizakuza ngiyisilise. 8 Kodwa induna yekhulu yaphendula yathi: Nkosi, kangifanele ukuba ungene ngaphansi kophahla lwami; kodwa tshono ilizwi nje, inceku yami izakusiliswa. 9 Ngoba lami ngingumuntu ongaphansi komthetho, ngilamabutho ngaphansi kwami. Ngithi komunye: Hamba; ahambe. Lakomunye ngithi: Woza; eze. Lencekwini yami ngithi: Yenza lokhu; ikwenze. 10 Esekuzwile lokhu uJesu wamangala, wathi kwabamlandelayo: Ngiqinisile ngithi kini: Angizanga ngifumane ukukholwa okunje lakoIsrayeli. 11 Ngithi kini: Abanengi bazakuza bevela empumalanga lasentshonalanga, bahlale ekudleni loAbrahama loIsaka loJakobe embusweni wezulu. 12 Kodwa amadodana ombuso azakukhutshelwa emnyameni ongaphandle, lapha kuzakuba khona ukukhala lokugedla amazinyo. 13 UJesu wasesithi enduneni yekhulu: Hamba, kakube kuwe njengokukholwa kwakho. Inceku yasila khona lokho. Uninazala kaPetro labanye abagulayo bayasiliswa ( Mark 1:29–34 ; Luka 4:38–41 ) 14 Wathi ukuba uJesu angene endlini kaPetro, wabona uninazala kaPetro elaliswe ngumkhuhlane. 15 Wabamba isandla sakhe, umkhuhlane wamyekela; wavuka, wamsebenzela. 16 Sekuhlwile, baletha kuye abanengi abangenwe ngomoya ababi. Wakhupha omoya ngelizwi, wasilisa bonke abagulayo, 17 ukuba kugcwaliseke okwakhulunywa nguIsaya umprofethi kokuthi: Yena wathatha imikhuhlane yethu, wazithwala izifo zethu. Ukumlandela uJesu ( Luka 9:57–62 ) 18 Kwathi uJesu ebona amaxuku amakhulu emhanqile, walaya ukuba bawelele ngaphetsheya. 19 Kwafika kuye umbhali, wathi kuye: Mfundisi, ngizakukulandela loba kungaphi lapho uya khona. 20 UJesu wathi kuye: Amakhanka alemilindi, lenyoni zaphezulu zilezidleke, kodwa iNdodana yomuntu kayilandawo lapho ingaqamelisa khona ikhanda layo. 21 Omunye wabafundi bakhe wathi kuye: Nkosi, ngivumela ukuba ngiyembela ubaba kuqala. 22 Kodwa uJesu wathi kuye: Ngilandela; yekela abafileyo bambele abafileyo babo. Ukuthuliswa kwesiphepha ( Mark 4:35–41 ; Luka 8:22–25 ) 23 Kwathi esengenile emkolweni, abafundi bakhe bamlandela. 24 Kwavuka isiphepha esikhulu olwandle, umkolo waze wagutshuzelwa ngamavinqo; kodwa yena wayelele. 25 Basondela, bamvusa besithi: Nkosi, sisilise, siyabhubha! 26 Wasesithi kibo: Lesabelani lina elilokukholwa okuncinyane na? Wavuka, wakhuza umoya lolwandle; kwaba khona ukuthula okukhulu. 27 Abantu bamangala, bathi: Unjani lo ukuba umoya lolwandle kumlalele na? Ukukhutshwa komoya ababi ( Mark 5:1–20 ; Luka 8:26–39 ) 28 Kwathi esefikile ngaphetsheya elizweni lamaGadarene, bamhlangabeza ababili abangenwe ngomoya ababi, bephuma emalibeni; besesabeka kakhulu kungasadluli muntu ngaleyondlela. 29 Basebememeza besithi: Silani lawe Ndodana kaNkulunkulu? Uze lapha ukusihlupha kungakafiki isikhathi na? 30 Kwakukhona khatshana labo umhlambi wengulube ezinengi zisidla. 31 Omoya ababi bamncenga besithi: Uba usikhupha, sithume ukuba singene emhlambini wengulube. 32 Wasesithi kibo: Hambani. Baphuma, bangena engulubeni; umhlambi wonke waphaphathekela eliweni, waphoseka olwandle, wafela emanzini. 33 Abazalusayo babaleka, baya emzini, babika konke lokwenzekileyo kibo abangenwe ngomoya ababi. 34 Khangela, umuzi wonke waphuma ukumhlangabeza uJesu; bathi bembona, bamncenga ukuba asuke emikhawulweni yelakubo. |
Bible Society of Zimbabwe 1978
Bible Society of Zimbabwe