UMatewu 5 - iBhayibhili Elingcwele 1978

Intshumayelo yasentabeni

¹ Kwathi ebona amaxuku wenyukela entabeni; esehlezi phansi abafundi bakhe beza kuye.

² Wasevula umlomo wakhe, wabafundisa wathi:

Ababusisiweyo

³ Babusisiwe abangabayanga emoyeni, ngoba umbuso wezulu ungowabo.

⁴ Babusisiwe abakhalayo, ngoba bazakududuzwa.

⁵ Babusisiwe abamnene, ngoba bazakudla ilifa lomhlaba.

⁶ Babusisiwe abalambela bomele ukulunga, ngoba bazakusuthiswa.

⁷ Babusisiwe abalesihawu, ngoba bazakuhawukelwa.

⁸ Babusisiwe abalenhliziyo ezihlambulukileyo, ngoba bazakubona uNkulunkulu.

⁹ Babusisiwe abalamulayo, ngoba bazakuthiwa ngabantwana bakaNkulunkulu.

¹⁰ Babusisiwe abazingelwa ngenxa yokulunga, ngoba umbuso wezulu ungowabo.

¹¹ Lina libusisiwe, nxa abantu belithuka ngenxa yami, belizingela, bekhuluma okubi konke ngani, beqamba amanga.

¹² Thokozani, lithabe kakhulu, ngoba umvuzo wenu mkhulu ezulwini; ngoba ngokunjalo babazingela abaprofethi abalandulelayo.

Itshwayi lokukhanya emhlabeni

¹³ Lina lilitshwayi emhlabeni; kodwa uba itshwayi seliduma, lizakuvuselelwa ngani na? Kalisasizi lutho, kuphela ukulahlwa ngaphandle, linyathelwe ngabantu.

¹⁴ Lina liyikukhanya emhlabeni. Umuzi owakhiwe phezu kwentaba ungesitheke.

¹⁵ Labantu kabalumathisi isibane basibeke ngaphansi kwesitsha, kodwa basibeka esiqobaneni, ukuze sibakhanyisele bonke abasendlini.

¹⁶ Kunjaloke kakukhanye ukukhanya kwenu phambi kwabantu ukuba babone imisebenzi yenu emihle, badumise uYihlo osezulwini.

Umlayo omdala lomlayo kaJesu Kristu

¹⁷ Lingathi ngize ukuchitha umlayo ingabe abaprofethi; angizanga ukuchitha, kodwa ngize ukugcwalisa.

¹⁸ Ngoba ngiqinisile ngithi kini: Kuze kudlule izulu lomhlaba kakusoze kudlule ibadlana libe linye ingabe lecwatshana libe linye lomlayo, kuze kwenzakale konke.

¹⁹ Ngakho owaphula owodwa kulimilayo emincinyane, afundise abantu njalo, uzakuthiwa ngomncinyane embusweni wezulu; kodwa oyenzayo ayifundise, lowo uzakuthiwa mkhulu embusweni wezulu.

²⁰ Ngoba ngithi kini: Aluba ukulunga kwenu kungadluli okwababhali lokwabaFarisi, kalisoze lingene embusweni wezulu.

²¹ Lizwile ukuthi kwathiwa kwabasendulo: Ungabulali; ilowo lalowo obulalayo uzakuba lecala lokuthonisiswa.

²² Kodwa mina ngithi kini: Ilowo lalowo othukuthelela umfowabo uzakuba lecala lokuthonisiswa; lothuka umfowabo uzakuba lecala emphakathini. Lotshoyo ukuthi: Sithutha ndini! uzakuba lecala lokuphoselwa esihogweni somlilo.

²³ Ngakhoke uba uletha umnikelo wakho ealtareni, ubusukhumbula ulapho ukuthi umfowenu ulesikhwili lawe,

²⁴ tshiya lapho umnikelo wakho phambi kwealtare, uhambe ubuyisane lomfowenu, anduba uze unikele umnikelo wakho.

²⁵ Phangisa uzwane laye omangalelene lawe lapho lisesendleleni, funa omangalelene lawe akunikele kumthonisisi, umthonisisi akunikele enxuseni, uphoselwe entolongweni.

²⁶ Ngiqinisile ngithi kuwe: Kawusoze uphume khona uze ukhokhe indibilitshi yokucina.

²⁷ Lizwile kwathiwa: Ungafebi.

²⁸ Kodwa mina ngithi kini: Ilowo lalowo okhangela owesifazana amkhanuke, usefebile laye enhliziyweni yakhe.

²⁹ Uba ilihlo lakho lokunene likukhubekisa, likhuphe, ulilahle; ngoba kungcono kuwe ukuba kubhubhe sibe sinye sezitho zakho kulokuba wonke umzimba wakho uphoselwe esihogweni.

³⁰ Uba isandla sakho sokunene sikukhubekisa, siqume usilahle; ngoba kungcono kuwe ukuba kubhubhe sibe sinye sezitho zakho kulokuba wonke umzimba wakho uphoselwe esihogweni.

³¹ Kwathiwa: Ilowo olahla umkakhe kamnike incwadi yesahlukaniso.

³² Kodwa mina ngithi kini: Ilowo lalowo olahla umkakhe kungengenxa yokufeba, umenza afebe; lomthathayo olahliweyo uyafeba.

³³ Lizwile futhi kwathiwa kwabasendulo: Ungafungi amanga, kodwa gcwalisa izifungo zakho eNkosini.

³⁴ Kodwa mina ngithi kini: Lingafungi lakanye, loba izulu, ngoba liyisihlalo sobukhosi sikaNkulunkulu;

³⁵ loba umhlaba, ngoba uyisigcabha senyawo zakhe; loba iJerusalema, ngoba lingumuzi weNkosi enkulu.

³⁶ Ungafungi lekhanda lakho, ngoba ungelwenze unwele lalunye lube mhlophe ingabe lube mnyama.

³⁷ Ilizwi lenu kalibe ngelokuthi: Yebo; loba: Atshi. Okudlula lokho kuvela komubi.

Ukuthanda izitha

³⁸ Lizwile kwathiwa: Ilihlo lenanwa ngelihlo, lezinyo ngezinyo;

³⁹ kodwa mina ngithi kini: Lingamelani lokoniwa, kodwa uba umuntu ekuwakala esihlathini sokunene, mphendulele lesinye.

⁴⁰ Uba umuntu ekumangalela ukuze akuthathele isigqoko sakho, mnike lengubo.

⁴¹ Lalowo okubamba ngamandla ukuba uhambe ikhilomitha libe linye, hamba laye amakhilomitha abe mabili.

⁴² Mnike ocela kuwe, ungamfulatheli ofisa ukweboleka kuwe.

⁴³ Lizwile kwathiwa: Wothanda umakhelwane wakho, uzonde isitha sakho.

⁴⁴ Kodwa mina ngithi kini: Thandani izitha zenu, libakhulekele abalizingelayo,

⁴⁵ ukuba libe ngabantwana bakaYihlo osezulwini; ngoba yena uyaliphumisela ilanga lakhe ababi labahle, alinisele izulu abalungileyo labangalunganga.

⁴⁶ Ngoba aluba lithanda labo abalithandayo, lilomvuzo bani na? Kabenzi njalo labathelisi na?

⁴⁷ Futhi uba libingelela abafowenu bodwa, lenzani okukhulu okudlula okwabanye na? Kabenzi njalo labathelisi yini?

⁴⁸ Ngakho lina wobani ngabapheleleyo, njengokuba uYihlo osezulwini ephelele.