UMatewu 23 - iBhayibhili Elingcwele 1978

UJesu usola ababhali labaFarisi

¹ UJesu wakhuluma emaxukwini lakubafundi bakhe,

² wathi: Ababhali labaFarisi bahlezi esihlalweni sikaMose.

³ Ngakhoke konke abalitshela khona, kwenzeni, likugcine, kodwa lingenzi njengemisebenzi yabo; ngoba bayakhuluma, bengenzi;

⁴ bayabopha imithwalo enzima, bayibeke emahlombe abantu; kodwa bona kabavumi ukuyisusa ngomunwe wabo.

⁵ Imisebenzi yabo yonke bayenza ukuba babonwe ngabantu; ngoba benza izicwatsho zabo zokukhuleka zibe banzi, lentshaka zengubo zabo zibe zinkulu.

⁶ Bathanda indawo eziphakemeyo ekudleni lezihlalo ezingaphambili emasinagogeni,

⁷ lokubingelelwa emidangeni, lokubizwa ngabantu ngokuthi Rabi.

⁸ Kodwa lina kalingabizwa ngokuthi Rabi, ngoba munye ongumfundisi wenu, lina lonke lingabazalwane.

⁹ Lingabizi muntu emhlabeni ngokuthi nguyihlo; ngoba munye onguYihlo, osezulwini.

¹⁰ Kalingabizwa ngokuthi lingabafundisi; ngoba munye ongumfundisi wenu, uKristu.

¹¹ Kodwa lowo omkhulu kini kabe ngumfokazi wenu.

¹² Lowo oziphakamisayo uzakuthotshiswa, lalowo ozithobayo uzakuphakanyiswa.

¹³ Maye kini babhali labaFarisi, bazenzisi! ngoba livalela abantu umbuso wezulu. Ngoba kalingeni lina, labangenayo kalibavumeli ukuba bangene.

¹⁴ Maye kini babhali labaFarisi, bazenzisi! ngoba lidla izindlu zabafelwakazi, langokuzenzisa lenza imikhuleko emide. Ngakhoke lizakwamukeliswa ukulahlwa okukhulu.

¹⁵ Maye kini babhali labaFarisi, bazenzisi! ngoba lidabula ulwandle lomhlaba wonke ukuba liphendule abe munye owabezizwe, kuthi nxa selimphendule limenze indodana yesihogo ngokuphindiweyo kulani.

¹⁶ Maye kini baholi abayiziphofu! ngoba lithi: Ofunga ithempeli, kanani; kodwa ofunga igolide lethempeli, uzibophile ngesifungo sakhe.

¹⁷ Zithutha eziyiziphofu! Kambe yikuphi okukhulu, igolide ingabe ithempeli elenza igolide libe ngcwele na?

¹⁸ Futhi lithi: Ofunga ialtare, kanani; kodwa ofunga umnikelo ophezu kwalo, uzibophile ngesifungo sakhe.

¹⁹ Ziphofu! Yikuphi okukhulu, umnikelo ingabe ialtare elenza umnikelo ube ngcwele na?

²⁰ Ngakhoke ofunga ialtare ufunga lona lakho konke okuphezu kwalo.

²¹ Lofunga ithempeli ufunga lona laye ohlala kulo.

²² Lofunga izulu ufunga isihlalo sobukhosi sikaNkulunkulu laye ohlala phezu kwaso.

²³ Maye kini babali labaFarisi, bazenzisi! ngoba lithela okwetshumi kwemfe, lolude, lamakhomane, liyekele izinto ezinkulu zomlayo, ukulunga lesihawu lokuthembeka. Belifanele ukukwenza lokhu lingakuyekeli lalokho.

²⁴ Bakhokheli abayiziphofu, likhetha umyane kodwa liginye ikamela.

²⁵ Maye kini babhali labaFarisi, bazenzisi! ngoba lihlambulula ingaphandle yenkezo leyomganu, kodwa ingaphakathi igcwele ubuhwaba lokuphanga.

²⁶ MFarisi ndini oyisiphofu! hlambulula kuqala ingaphakathi yenkezo, ukuze ihlambuluke lengaphandle yayo.

²⁷ Maye kini babhali labaFarisi, bazenzisi! ngoba lifana lamaliba aconjiweyo, abonakala emahle ngaphandle, kanti ngaphakathi agcwele amathambo abafileyo lokungcola konke.

²⁸ Kunjalo lani ngaphandle libonakala ebantwini lilungile, kanti ngaphakathi ligcwele ukuzenzisa lobubi.

²⁹ Maye kini babhali labaFarisi, bazenzisi! ngoba lakha amaliba abaprofethi, licecise amaliba abalungileyo.

³⁰ Lithi: Uba besikhona ensukwini zabokhokho bethu besingayikuhlanganyela labo egazini labaprofethi.

³¹ Kunjalo liyazifakazela lina ukuthi lingamadodana alabo ababulala abaprofethi.

³² Sukanike, qedisani okwaqaliswa ngokhokho benu!

³³ Lina zinyoka, nzalo yamabululu, lizakukuphepha kanjani ukulahlwa kwasesihogweni na?

³⁴ Ngakhoke, khangelani, ngithuma kini abaprofethi, labahlakaniphileyo, lababhali; abanye babo lizakubabulala, libabethele; abanye lizakubatshaya emasinagogeni enu, libaxotshe imizi ngemizi,

³⁵ ukuba kwehlele phezu kwenu igazi lonke elingelacala elachithwa emhlabeni, kusukela egazini likaAbela olungileyo kuze kufike egazini likaZekariya indodana kaBarakiya, elambulala phakathi kwethempeli lealtare.

³⁶ Ngiqinisile ngithi kini: Zonke lezizinto zizakwehlela phezu kwalesisizukulwana.

UJesu ukhalela iJerusalema

³⁷ Hawu, Jerusalema, wena obulala abaprofethi, obakhanda ngamatshe labo abathunyiweyo kuwe! Bengithanda kangaka ukubuthela ndawonye abantwana bakho njengesikhukhukazi sibuthela amatsiyane aso ngaphansi kwamaphiko aso; kodwa kalivumanga.

³⁸ Khangelani, indlu yenu isele ilunxiwa.

³⁹ Ngoba ngithi kini: Kalisoze langibona futhi kuze kufike isikhathi sokuba lithi: Ubusisiwe ozayo ebizweni leNkosi.