UMatewu 20 - iBhayibhili Elingcwele 1978Umfanekiso wezisebenzi zesivini 1 Umbuso wezulu ufana lomnumzana owaphuma ekuseni ukuqatsha izisebenzi ziye esivinini sakhe. 2 Esevumelene lezisebenzi ngemadlana yosuku, wazithumela esivinini sakhe. 3 Waphuma ngeawa yesificamunwemunye ekuseni, wabona abanye bemi emdangeni bengelamsebenzi; 4 lakubo wathi: Yanini lani esivinini; lokho okufaneleyo ngizakulinika khona. 5 Bahambake. Wabuya waphuma emini langeawa yesithathu ntambama, wenza njalo. 6 Ngeawa yesihlanu ntambama waphuma, wafumana abanye bemi, wathi kibo: Limeleni lapha usuku lonke lingenzi lutho na? 7 Bathi kuye: Ngoba kasiqatshwanga muntu. Wathi kubo: Yanini lani esivinini. 8 Kwathi selitshonile, umninisivini wathi enduneni yakhe: Biza izisebenzi, uzikhokhele imali yazo, uqale ngezokucina ucine ngezokuqala. 9 Kuthe befika abaqatshwa ngeawa yesihlanu ntambama, ilowo lalowo wamukela imadlana nje. 10 Sebezile abokuqala, bathi bazakwamukela okungaphezulu: kodwa labo bamukela imadlana enjalo. 11 Kwathi beyamukela bamsola umnumzana. 12 bathi: Labo abokucina basebenze iawa yanye nje, ubalinganise lathi esithwele ubunzima bosuku lesifudumezi selanga. 13 Waphendula wathi komunye wabo: Mngane, angikoni; kanti kalivumelananga lami ngemadlana leyo na? 14 Thatha okwakho, uhambe; ngiyathanda ukumnika lowokucina njengawe. 15 Angivunyelwa yini ukwenza engikuthandayo ngezinto zami na? Ulomona ngokuphana kwami na? 16 Kunjaloke abokucina bazakuba ngabokuqala, labokuqala babe ngabokucina. UJesu ukhuluma ngokuhlupheka kwakhe ( Mark 10:32–34 ; Luka 18:31–34 ) 17 Kwathi uJesu esezakwenyukela eJerusalema, wathatha abalitshumi lambili wahamba labo bodwa; besesendleleni, wathi kibo: 18 Khangelani, siyenyukela eJerusalema; iNdodana yomuntu izakunikelwa kubapristi abakhulu lakubabhali; bazakuyigwebela ukufa, 19 bayinikele kwabezizwe ukuba iyangiswe, itshaywe, ibethelwe; kodwa ngosuku lwesithathu izakuvuswa ekufeni. UJesu ukhuza amadodana kaZebediya ( Mark 10:35–40 ) 20 Kweza kuye unina wamadodana kaZebediya kanye lamadodana akhe; waguqa phambi kwakhe, wacela ulutho kuye. 21 UJesu wathi kuye: Ufunani na? Wathi kuye: Tshono ukuba lamadodana ami amabili ahlale, enye ngakwesokunene sakho lenye ngakwesokhohlo sakho embusweni wakho. 22 Kodwa uJesu waphendula wathi: Kalikwazi elikucelayo. Linganatha yini inkezo engizakuyinatha na? Bathi kuye: Singakwenza. 23 Wathi kibo: Impela, lizakuyinatha inkezo yami, kodwa ukuhlala ngakwesokunene sami langakwesokhohlo sami, kayisikho kwami ukuphana ngakho, kodwa kungokwalabo abakulungiselweyo nguBaba. Ubukhulu obuqotho ( Mark 10:41–45 ; Luka 22:24–27 ) 24 Kwathi sebekuzwile lokhu abalitshumi, bazithukuthelela izelamani ezimbili. 25 Kodwa uJesu wababiza, wathi: Liyazi ukuthi ababusi bezizwe bazibusa ngokulukhuni, lezikhulu zabo zisebenzisa amandla phezu kwazo. 26 Kakunjalo phakathi kwenu, kodwa yilowo othanda ukuba ngomkhulu phakathi kwenu, kabe ngumfokazi wenu; 27 lalowo othanda ukuba ngowokuqala phakathi kwenu kabe yinceku yenu, 28 njengalokhu iNdodana yomuntu kayizanga ukukhonzwa, kodwa ukukhonza lokunika ukuphila kwayo, kube lihlawulo labanengi. UJesu usilisa iziphofu ezimbili ( Mark 10:46–52 ; Luka 18:35–43 ) 29 Kwathi bephuma eJeriko, ixuku elikhulu lamlandela. 30 Iziphofu ezimbili zazihlezi ngasendleleni; sezizwile ukuthi uJesu uyadlula, zamemeza zathi: Nkosi, Ndodana kaDavida, sihawukele! 31 Ixuku lazikhuza ukuba zithule, kodwa zamemeza kakhulu, zisithi: Nkosi, Ndodana kaDavida, sihawukele! 32 UJesu wasesima, wazibiza, wathi: Lifuna ukuba ngilenzeleni na? 33 Zathi kuye: Nkosi, sifuna ukuba amehlo ethu avuleke. 34 UJesu wazihawukela, wathinta amehlo azo; zasezibona masinyane, zamlandela. |
Bible Society of Zimbabwe 1978
Bible Society of Zimbabwe