UMatewu 17 - iBhayibhili Elingcwele 1978

Ukukhazimuliswa kukaJesu entabeni

¹ Emva kwensuku eziyisithupha uJesu wathatha oPetro, loJakobe, loJohane umfowabo kaJakobe, wakhwela labo entabeni ende bebodwa.

² Waphenduka isimo phambi kwabo, ubuso bakhe bakhanya njengelanga, lengubo zakhe zaba mhlophe njengokukhanya.

³ Kwasekubonakala kibo uMose loElija bekhuluma laye.

⁴ Ngakho uPetro wathi kuJesu: Nkosi, kuhle ukuba sibe lapha. Uba uthanda, ngizakwakha amadumba amathathu, elinye libe ngelakho, elinye libe ngelikaMose, lelinye libe ngelikaElija.

⁵ Kwathi esakhuluma, iyezi elikhanyayo labasibekela; kwezwakala ilizwi eyezini, lathi: Lo uyiNdodana yami ethandekayo engithokoza ngayo; zwanini yona.

⁶ Kwathi sebekuzwile lokho abafundi bawa phansi ngobuso babo, besaba kakhulu.

⁷ Kodwa uJesu wasondela, wabathinta, wathi: Sukumani, lingesabi.

⁸ Sebephakamisile amehlo abo kababonanga muntu, kuphela uJesu yedwa.

⁹ Besehla entabeni, uJesu wabalaya wathi: Lingatsheli muntu ngalowombono ize ivuke kwabafileyo iNdodana yomuntu.

¹⁰ Abafundi bakhe bambuza bathi: Pho, batsholoni ababhali ukuthi uElija ufanele ukufika kuqala na?

¹¹ Wabaphendula wathi: UElija uzafika impela, uzakubuyisela izinto zonke.

¹² Kodwa ngithi kini uElija sewafika; kabamazanga, kodwa benza kuye lokho abakuthandayo. Kunjalo leNdodana yomuntu izakuhlutshwa yibo.

¹³ Abafundi basebeqedisisa ukuthi wakhuluma labo ngoJohane uMbhaphathizi.

Ukusiliswa komfana owayelesithuthwane

¹⁴ Kwathi sebefikile exukwini, kweza kuye umuntu, waguqa phambi kwakhe,

¹⁵ wathi: Nkosi, akuhawukele indodana yami, ngoba ilesithuthwane, iyahlupheka kakhulu, ngoba iwele kanengi emlilweni, futhi kanengi lemanzini.

¹⁶ Ngiyilethe kubafundi bakho, kodwa behlulekile ukuyisilisa.

¹⁷ UJesu waphendula wathi: O sizukulwana esingakholwayo lesonakeleyo, koze kube nini ngilani na? Koze kube nini ngilibekezelela na? Iletheni kimi.

¹⁸ UJesu wayikhalimela, umoya omubi waphuma kuyo; umfana wasila kusukela kulesosikhathi.

¹⁹ Abafundi basebesiza kuJesu bebodwa, bathi: Kungani sahlulekile ukuwukhupha na?

²⁰ Wathi kubo: Kungenxa yokukholwa kwenu okuncinyane. Ngoba ngiqinisile ngithi kini: Aluba lilokukholwa okungangohlamvu lwemastade, lizakuthi kulintaba: Suka lapha, uye laphaya; izakusuka. Kaliyikwahlulwa lutho. [

²¹ Kodwa loluhlobo kaluphumi ngaphandle kokuba kube ngokukhuleka langokuzila ukudla.]

UJesu ukhuluma futhi ngokuhlupheka kwakhe

²² Besahambahamba eGalili, uJesu wathi kibo: INdodana yomuntu izakunikelwa ezandleni zabantu;

²³ bazakuyibulala, kodwa ngosuku lwesithathu izakuvuswa. Badabuka kakhulu.

UJesu uthela umthelo

²⁴ Kwathi sebefikile eKapenawume abaqoqi bemali yethempeli beza kuPetro, bathi: Umfundisi wenu uyayithela imali yethempeli na?

²⁵ Wathi: Yebo uyayithela. Esengenile endlini uJesu wakhuluma laye kuqala esithi: Uthini na, Simoni? Amakhosi omhlaba amukela kubani imithelo, kumadodana abo ingabe kwabezizwe na?

²⁶ UPetro wathi kuye: Kwabezizwe. UJesu wathi kuye: Ngakho amadodana akhululekile.

²⁷ Kodwake ukuba singabakhubekisi, yana olwandle, uphose ingwegwe uthathe inhlanzi ebanjwe kuqala; kuzakuthi usuvule umlomo wayo uzakufumana imali; uyithathe ubanike ibe ngumthelo wami lowakho.