UMalaki 3 - iBhayibhili Elingcwele 1978

¹ INkosi yamabandla ithi: Khangelani, ngiyasithuma isithunywa sami ukulungisa indlela phambi kwami. INkosi eliyidingayo izafika masinyane ethempelini layo; isithunywa sesivumelwano elithokoza ngaso siyeza.

² Kodwa ngubani ongalumela usuku lokufika kwaso, longema ekubonakaleni kwaso na? Ngoba sinjengomlilo wompheki wensimbi, lanjengesepa yomgezisi.

³ Sizahlala esihlalweni saso sincibilikise sihlambulule isiliva, sihlambulule amadodana kaLevi, siwancibilikise njengegolide lanjengesiliva, aze anikele iminikelo efaneleyo eNkosini.

⁴ Ng’khona iminikelo yakoJuda leyaseJerusalema izakuyithokozisa iNkosi njengasensukwini zasendulo laseminyakeni yakuqala. INkosi yamabandla ithi:

⁵ Besengifika kini ukulithonisisa; ngizakuba ngufakazi okhutheleyo mayelana lezangoma, lezifebe, lokufungela amanga, lokucindezela abaqatshiweyo ngamaholo abo, lokucindezela abafelwakazi, lezintandane, lalabo abasunduzela eceleni abezizweni, bengangesabi mina.

Mayelana lokwetshumi

⁶ Ngoba mina Nkosi kangiphenduki; ngalokho lani madodana kaJakobe kalikaqedwa.

⁷ Kusukela ensukwini zabokhokho benu liphambukile ezimisweni zami, kalizigcinanga. Buyani kimi, lami ngizabuyela kini, kutsho iNkosi yamabandla. Kanti lina lithi: Sizabuya kanjani na?

⁸ Umuntu angamphanga uNkulunkulu na? Lina liyangiphanga. Kodwa lina lithi: Sikuphanga kanjani na? Ngithi: Ngokwetshumi kwenu langeminikelo yenu.

⁹ Liqalekisiwe ngesiqalekiso, isizwe sonke siqalekisiwe, ngoba liyangiphanga.

¹⁰ Lethani konke okwetshumi endlini yenotho ukuba kube khona ukudla endlini yami. Lingihlole ngalokho, kutsho iNkosi yamabandla, libone ukuba kangiyikulivulela iminyango yaphezulu, ngilehlisele izibusiso ezinengi na?

¹¹ Ngizalikhuzela izibungu, ukuze zingadli izithelo zomhlabathi wenu; lamavini enu emasimini kawayikuphutha ukuthela, kutsho iNkosi yamabandla.

¹² Zonke izizwe zizakuthi libusisiwe, ngoba lizakuba yilizwe elithokozisayo, kutsho iNkosi yamabandla.

Ukwahlukaniswa phakathi kwabalungileyo lababi

¹³ Amazwi enu abelukhuni ngami, kutsho iNkosi. Kanti lina lithi: Sikhulume sathini ngawe na?

¹⁴ Lithe lina: Kakusizi lutho ukukhonza uNkulunkulu. Kusizani ukugcina imilayo yakhe lokuba sihambe phambi kweNkosi yamabandla njengabakhalayo na?

¹⁵ Khathesike sithi abaziphakamisayo babusisiwe; abenza okubi yibo abaphumelelayo; lalapho bemlinga uNkulunkulu bayayekelwa.

¹⁶ Basebekhulumisana labo abayesabayo iNkosi; iNkosi yabalalela, yabezwa. Incwadi yesikhumbuzo yalotshwa phambi kwayo ngabo abayesabayo iNkosi, labahlonipha ibizo layo.

¹⁷ Bazakuba ngabami, kutsho iNkosi yamabandla, babe yimpahla yami ngosuku lokwenza kwami, ngizabayekela njengalokhu umuntu eyekela indodana emsebenzelayo.

¹⁸ Beselibuya lisahlukanisa phakathi kwabalungileyo lababi, laphakathi komuntu omkhonzayo uNkulunkulu longamkhonziyo.