UMalaki 2 - iBhayibhili Elingcwele 1978

¹ Khathesike nanku owenu umlayo, bapristi.

² Uba lingalaleli, uba lingananzi ukulidumisa ibizo lami, kutsho iNkosi yamabandla, ngizalithumela isiqalekiso, ngiphendule izibusiso zenu zibe yiziqalekiso. Yebo, sengisenza njalo, ngoba kalinanzi ukwenza lokho.

³ Ngizakhalimela inzalo yenu, ngilithele ngomswane ebusweni, umswane weminikelo yenu, ngilixotshe ebusweni bami.

⁴ Ngalokho lizakwazi ukuba ngithumele lumlayo kini, ukuba isivumelwano sami loLevi sime, kutsho iNkosi yamabandla.

⁵ Isivumelwano sami laye sasingesokuphila lokuthula, ngamnika khona ukuba esabe; wangesaba, walesaba lebizo lami.

⁶ Ukufundisa kwakhe kwakuliqiniso, ububi bungafunyaniswa ekufundiseni kwakhe. Wahamba lami ngokuthula langobuqotho, waphendula abanengi ebubini.

⁷ Ngoba umpristi umele agcine ukwazi okuqotho, labantu bamele badinge ukufundiswa kuye, ngoba uyisithunywa seNkosi yamabandla.

⁸ Kodwa lina bapristi, liphambukile endleleni, lakhubekisa abanengi ngokufundisa kwenu; lasona isivumelwano sikaLevi, kutsho iNkosi yamabandla.

⁹ Ngakhoke mina ngilenzile laba ngabadelelekayo labehliselwe phansi phambi kwabantu bonke, ngoba lingagcinanga indlela zami, kodwa libandlulule abantu ekufundiseni kwenu.

Ukukhohlisa kukaIsrayeli

¹⁰ Kasilaye ubaba munye thina sonke na? Kasidalwanga nguNkulunkulu munye na? Phoke, kungani sikhohlisana, sisona isivumelwano uNkulunkulu asenze labokhokho na?

¹¹ UJuda ukhohlisile, kwenziwe amanyala koIsrayeli laseJerusalema; ngoba uJuda uyonile indawo engcwele ethandwa yiNkosi ngokuthatha indodakazi ekhonza unkulunkulu wezizweni.

¹² Kungathi iNkosi ingakhupha emathenteni kaJakobe umuntu owenza lokhu, loba owakhileyo khona, loba engowezizwe, lanxa eletha umnikelo eNkosini yamabandla.

¹³ Lalokhu futhi liyakwenza. Lithela ialtare leNkosi ngenyembezi, likhale, libubule, ngoba ingasawunanzi umnikelo, ungasamukeleki kuyo.

¹⁴ Liyabuza lithi: Kungani na? Kungoba iNkosi eyayingufakazi wesivumelwano sakho lomfazi wobutsha bakho iyakwazi ukuthi umkhohlisile wena, lanxa ebengumngane wakho lomfazi wakho wesivumelwano.

¹⁵ UNkulunkulu kenzanga umuntu abe lenyama lomoya wokuphila na? UNkulunkulu ufunani kulokhu na? Ufuna ukuba umuntu azale abantwana abanikwe nguNkulunkulu. Ziqapheliseni ukuba omunye lomunye wenu angamkhohlisi umfazi wobutsha bakhe.

¹⁶ Ngiyakuzonda ukwahlukana, kutsho iNkosi uNkulunkulu kaIsrayeli. Ngiyazonda futhi ukuba umuntu abe lesihluku esinje kumkakhe, kutsho iNkosi yamabandla. Ngakhoke ziqapheliseni ukuba lingakhohlisi.

Usuku lokwahlulela luyeza

¹⁷ Liyidinisile iNkosi ngamazwi enu. Kanti lithi: Siyidinise kanjani na? Liyidinise ngokuthi: Bonke abenza okubi balungile eNkosini, bayayithokozisa; loba lithi: Ungaphi uNkulunkulu wokwahlulela na?