UMalaki 1 - iBhayibhili Elingcwele 1978

Uthando lweNkosi kuJakobe

¹ Nanti ilizwi leNkosi kuIsrayeli ngoMalaki.

² Ngilithandile, kutsho iNkosi. Kodwa lina lithi: Usithande kanjani na? UEsawu kasuye umfowabo kaJakobe na? kutsho iNkosi. Kanti ngamthanda uJakobe,

³ uEsawu ngamzonda; ngalichitha ilizwe lakhe elilamaqaqa, lelifa lakhe ngalinika amakhanka asenkangala.

⁴ Uba abakoEdoma, abantwana bakaEsawu, besithi: Imizi yethu ichithiwe, kodwa sizabuya siyakhe; iNkosi yamabandla ithi: Bangakha, kodwa mina ngizadilizela phansi, baze babizwe ngokuthi yilizwe elibi, labantu iNkosi ebathukutheleleyo kokuphela.

⁵ Lizakubona lokhu ngamehlo enu, beselisithi: Ubukhulu beNkosi bufika langaphandle kwakoIsrayeli.

INkosi ikhuza abapristi

⁶ INkosi yamabandla ithi kubapristi: Indodana iyamhlonipha uyise, lenceku iyayihlonipha inkosi yayo. Uba mina nginguyihlo, kungaphi ukuhlonitshwa kwami na? Uba ngiyinkosi, kungaphi ukwesatshwa kwami na? Lina, bapristi, liyalidelela ibizo lami, kodwa lithi: Silidelele kanjani ibizo lakho na?

⁷ Ngithi: Ngokunikela ukudla okungcolileyo phezu kwealtare lami. Beselisithi: Sikungcolise kanjani na? Ngithi: Ngokucabanga ukuba itafula yeNkosi ingadeleleka.

⁸ Lapho linikela inyamazana eyisiphofu ibe ngumhlatshelo, lokho kakukubi na? Lapho linikela inyamazana eqhulayo legulayo, lokho kakukubi na? Akukunike umbusi wakho lokho; kambe angathokoza ngawe na? Angaba lomusa kuwe na? kutsho iNkosi yamabandla.

⁹ Ake lincenge uNkulunkulu ukuba abe lomusa kithi. Uba linika isipho esinjalo, uzakuba lomusa kini na? kutsho iNkosi yamabandla.

¹⁰ Kungathi ngabe ukhona phakathi kwenu ongavala izivalo, ukuba lingabasi imililo elize phezu kwealtare lami. Kangithokozi ngani, kutsho iNkosi yamabandla, kangiyikwamukela iminikelo evela kini.

¹¹ Ngoba kusukela ekuphumeni kwelanga kuze kube sekutshoneni kwalo, ibizo lami likhulu phakathi kwezizwe; endaweni zonke ibizo lami litshiselwa impepha, kunikelwe kilo iminikelo ehlambulukileyo; ngoba ibizo lami likhulu phakathi kwezizwe, kutsho iNkosi yamabandla.

¹² Kodwa lina liyalona ngokuthi itafula yeNkosi ingangcoliswa, langokuthi linganikela phezu kwayo ukudla elikudelelayo.

¹³ Lichila amakhala, kutsho iNkosi yamabandla, beselisithi: Yeka ukudinisa kwalokhu! Liletha okwebiweyo, lokuqhulayo, lokugulayo, kube ngumnikelo wenu. Ngizakwamukela lokho kini na? kutsho iNkosi.

¹⁴ Kaqalekiswe umkhohlisi ogcwalisa izifungo zakhe ngokuhlabela iNkosi okonakeleyo, yena elenqama engelasici emhlambini wakhe. Ngoba ngiyinkosi enkulu, kutsho iNkosi yamabandla, lebizo lami liyesabeka phakathi kwezizwe.