UMakho 9 - iBhayibhili Elingcwele 1978

¹ Wasesithi kubo: Ngiqinisile ngithi kini: Bakhona abanye kwabemiyo lapha abangayikuzwa ukufa, baze babone umbuso kaNkulunkulu usufikile ngamandla.

Ukukhazimuliswa kukaJesu entabeni

² Emva kwensuku eziyisithupha uJesu wathatha oPetro, loJakobe, loJohane, wakhwela labo entabeni ende bebodwa; waphenduka isimo phambi kwabo.

³ Ingubo zakhe zacwazimula zaba mhlophe nke, kakulamuntu emhlabeni ongazenza zibe mhlophe kangaka.

⁴ Kwabonakala kibo uElija eloMose; babekhuluma loJesu.

⁵ UPetro wathi kuJesu: Mfundisi, kuhle ukuba sibe lapha; asakhe amadumba amathathu, elinye libe ngelakho, elinye libe ngelikaMose, lelinye libe ngelikaElija.

⁶ Wayengakwazi angakutsho, ngoba babesesaba kakhulu.

⁷ Kwasekufika iyezi, labasibekela; kwezwakala ilizwi eyezini, lathi: Lo uyiNdodana yami ethandekayo; zwanini yona.

⁸ Kwathi masinyane bethalaza, kababe besabona muntu, kuphela uJesu yedwa owayelabo.

⁹ Besehla entabeni, wabalaya ukuba bangatsheli muntu abakubonileyo, ize ivuke kwabafileyo iNdodana yomuntu.

¹⁰ Balibamba lelilizwi babuzana bodwa ukuba kutsho ukuthini ukuvuka kwabafileyo.

¹¹ Basebembuza besithi: Batsholani ababhali ukuthi uElija ufanele ukufika kuqala na?

¹² Wabaphendula wathi: UElija uzafika kuqala ukubuyisela zonke izinto; kodwa kulotshwe njani ngeNdodana yomuntu ukuthi imele ihlupheke kakhulu, idelelwe na?

¹³ Kodwa ngithi kini: UElija sewafika, benza kuye lokho abakuthandayo, njengokulotshiweyo ngaye.

Ukusiliswa komfana owayelesithuthwane

¹⁴ Kwathi befika kubafundi, babona ixuku elikhulu libahanqile lababhali bephikisana labo.

¹⁵ Lathi ukumbona ixuku lonke laselimangala lagijimela kuye, lambingelela.

¹⁶ Wasebabuza esithi: Libuzana ngani labo na?

¹⁷ Omunye wexuku waphendula wathi: Mfundisi, ngilethe kuwe indodana yami elomoya oyisimungulu.

¹⁸ Kuthi lapho uyibamba khona, uyilahle phansi, ikhihlize amagwebu, igedle amazinyo, yome qha. Ngicele abafundi bakho ukuba bawukhuphe, kodwa behluleka.

¹⁹ Wabaphendula wathi: O sizukulwana esingakholwayo, koze kube nini ngilani na? Koze kube nini ngilibekezelela na? Iletheni kimi.

²⁰ Bayiletha kuye. Kwathi umoya umbona, wahle wayihlukuza, yawa phansi, yazigiqagiqa ikhihliza amagwebu.

²¹ Wasembuza uyise esithi: Ilesikhathi esingakanani ilalokhu na? Wathi: Kusukela ebuntwaneni bayo.

²² Uyiphosele kanengi emlilweni lasemanzini ukuba uyibhubhise; kodwa nxa kukhona ongakwenza, sihawukele, usisize.

²³ UJesu wathi kuye: Engingakwenza! Zonke izinto ziyenzeka kuye okholwayo.

²⁴ Wahle wamemeza uyise womfana, wathi: Ngiyakholwa, siza ukungakholwa kwami.

²⁵ UJesu esebona ukuba ixuku ligijimela ndawonye, wakhuza umoya omubi, wathi kuwo: Wena moya oyisimungulu longezwayo ngiyakulaya mina: Phuma kuyo, ungabe usangena kuyo.

²⁶ Usumemezile wayihlukuza kakhulu, waphuma; yaba njengofileyo, kwaze kwathi abanengi bathi: Isifile.

²⁷ Kodwa uJesu wayibamba ngesandla, wayiphakamisa; yasukuma.

²⁸ Wathi esengenile endlini, abafundi bakhe bambuza bebodwa, besithi: Kungani sahlulekile thina ukuwukhupha na?

²⁹ Wathi kubo: Loluhlobo lungephume ngalutho, kuphela ngokukhuleka.

UJesu ukhuluma futhi ngokuhlupheka kwakhe

³⁰ Basuka lapho, badabula eGalili; wayengathandi ukuba kwaziwe ngumuntu,

³¹ ngoba wayefundisa abafundi bakhe, esithi kubo: INdodana yomuntu izakunikelwa ezandleni zabantu, bazayibulala; isibulewe, ngemva kwensuku ezintathu izakuvuka.

³² Kodwa kabaqedisisanga lokhukutsho, besaba ukumbuza.

UJesu ufundisa ngokuthobeka

³³ Basebefika eKapenawume. Kwathi esendlini, wababuza wathi: Belikhulumisana ngani endleleni na?

³⁴ Kodwa bathula, ngoba endleleni babephikisene ngokuthi ngubani omkhulu.

³⁵ Wasehlala phansi, wabiza abalitshumi lambili, wathi kibo: Uba umuntu ethanda ukuba ngowokuqala, kabe ngowokucina kibo bonke lomfokazi wabo bonke.

³⁶ Wasethatha umntwana, wambeka phakathi kwabo, wamgona, wathi kibo:

³⁷ Lowo owamukela omunye wabantwana abanje ebizweni lami wamukela mina; lalowo owamukela mina kamukeli mina kodwa wamukela yena ongithumileyo.

³⁸ UJohane wathi kuye: Mfundisi, sabona omunye ekhupha omoya ababi ngebizo lakho; samnqabela ngoba engasilandeli.

³⁹ Kodwa uJesu wathi: Lingamnqabeli, ngoba kakho owenza umsebenzi wamandla ngebizo lami ongasuka masinyane, akhulume kubi ngami.

⁴⁰ Ngoba ongalwi lathi ngowakithi.

⁴¹ Ngoba ilowo lalowo ozakulinathisa inkezo yamanzi ngebizo lami, ngoba lingabakaKristu, ngiqinisile ngithi kini: Kayikulahlekelwa ngumvuzo wakhe.

Izikhubekiso

⁴² Ilowo lalowo okhubekisa omunye walaba abancinyane abakholwa kimi kungakuhle kuye ukuba ilitshe lokuchola elikhulu ligaxwe entanyeni yakhe, aphoselwe olwandle.

⁴³ Uba isandla sakho sikukhubekisa, siqume; kungcono kuwe ukungena ekuphileni uyingini kulokuba ulezandla ezimbili uye esihogweni, emlilweni ongacimiyo, [

⁴⁴ lapho impethu yabo ingafi khona, lomlilo ungacimi khona].

⁴⁵ Uba unyawo lwakho lukukhubekisa, luqume; kungcono kuwe ukungena ekuphileni uyisiqhwala kulokuba ulenyawo ezimbili uphoselwe esihogweni, [

⁴⁶ lapho impethu yabo ingafi khona, lomlilo ungacimi khona].

⁴⁷ Uba ilihlo lakho likukhubekisa, likhuphe; kungcono kuwe ukungena embusweni kaNkulunkulu ulelihlo lilinye kulokuba ulamehlo amabili uphoselwe esihogweni,

⁴⁸ lapho impethu yabo ingafi khona, lomlilo ungacimi khona.

Ngetshwayi

⁴⁹ Ngoba bonke bazakuhangulwa ngomlilo.

⁵⁰ Itshwayi lihle, kodwa uba itshwayi seliduma, lizakuvuselelwa ngani na? Wobani letshwayi phakathi kwenu, lihlalisane ngokuthula.