UMakho 7 - iBhayibhili Elingcwele 1978

AbaFarisi lababhali basolwa ngenxa yezimiso zabo

¹ Kwabuthana kuye abaFarisi labanye bababhali ababevela eJerusalema.

² Sebebonile ukuba abanye babafundi bakhe badla ukudla ngezandla ezimbi okuyikuthi ezingahlanjululwanga —

³ ngoba abaFarisi labaJuda bonke kabadli bengagezisisanga izandla zabo, belondoloza isiko labadala;

⁴ nxa bevela emdangeni, kabadli bengagezanga; zikhona ezinye izinto ezinengi abazamukelayo ukuzilondoloza, njengokugezisa inkezo, lembiza, lezitsha zethusi —

⁵ abaFarisi lababhali bambuza bathi: Kungani abafundi bakho bengahambi ngesiko labadala, kodwa badla ukudla ngezandla ezimbi na?

⁶ Wathi kubo: Ulsaya waprofetha kuhle ngani lina bazenzisi njengokulotshiweyo ukuthi: Lababantu bangidumisa ngemilomo yabo, kodwa inhliziyo yabo ikhatshana lami;

⁷ bangikhonza ngeze, befundisa izifundiso eziyimilayo yabantu.

⁸ Liyekela umlayo kaNkulunkulu, libambe isiko labantu.

⁹ Wasesithi kubo: Lembala liyayekela umlayo kaNkulunkulu ukuba lilondoloze isiko lenu.

¹⁰ Ngoba uMose wathi: Hlonipha uyihlo lonyoko; lokuthi: Okhuluma kubi ngoyise ingabe ngonina kafe lokufa;

¹¹ kodwa lina lithi: Aluba umuntu esithi kuyise ingabe kunina: Lokho obungasizwa yimi ngakho, “liKhobane”, okuyikuthi umnikelo,

¹² kalisamvumeli ukwenzela uyise ingabe unina ulutho.

¹³ Lenza ize ilizwi likaNkulunkulu ngesiko lenu lemvelo; lokunengi okunjalo liyakwenza.

¹⁴ Wabuya wabiza ixuku, wathi kulo: Ngilalelani lonke, liqedisise.

¹⁵ Kalukho ulutho olungaphandle komuntu olungamngcolisa ngokungena kuye; kodwa izinto eziphuma emuntwini yizo ezimngcolisayo. [

¹⁶ Uba ekhona olendlebe zokuzwa, akezwe.]

¹⁷ Esengenile endlini, evela exukwini, abafundi bakhe bambuza ngomfanekiso.

¹⁸ Wathi kibo: Kanti lani lingabangelakuqedisisa na? Kaliqedisisi ukuba konke okungaphandle okungena emuntwini kungemngcolise na?

¹⁹ Ngoba kakungeni enhliziyweni yakhe, kodwa kungena esiswini sakhe, kuphumele ngaphandle. Ngalokhu uJesu wenza ukudla konke kube kuhle.

²⁰ Wasesithi: Okuphumayo emuntwini yikho okumngcolisayo;

²¹ ngoba enhliziyweni yomuntu kuphuma imicabango emibi, lokuphinga, lokweba, lokubulala,

²² lobufebe, lomhawu, lokuxhwala, lenkohliso, lamanyala, lomona, lokunyeya, lokuzigqaja, lobuthutha;

²³ zonke lezizinto ezimbi zivela ngaphakathi, zimngcolise umuntu.

Owesifazana waseSirofenike

²⁴ Wasuka lapho, waya emikhawulweni yaseTire leSidoni. Wangena endlini, engathandi ukwaziwa ngumuntu, kodwa wayengefihlakale.

²⁵ Kodwa masinyane owesifazana olendodakazi yakhe elomoya omubi esezwile ngaye, weza wawa ngasenyaweni zakhe.

²⁶ Owesifazana wayengumGriki, engumSirofenike ngokuzalwa; wamncenga ukuba akhuphe umoya omubi endodakazini yakhe.

²⁷ Wathi kuye: Ake kusuthe abantwana kuqala, ngoba kakukuhle ukuthatha ukudla kwabantwana, kuphoselwe ezinjeni.

²⁸ Kodwa wamphendula wathi kuye: Yebo, Nkosi; kodwa lezinja ezingaphansi kwetafula ziyadla imvuthuluka yabantwana.

²⁹ Wathi kuye: Ngenxa yalokhukutsho, hambake; umoya omubi uphumile endodakazini yakho.

³⁰ Wabuyela ekhaya, wafumana umntwana elele ethaleni, umoya omubi usuphumile.

Ongezwayo oyimbebebe uyasiliswa

³¹ Wabuya wasuka emikhawulweni yaseTire, wadabula eSidoni, weza ngasolwandle lwaseGalili edabula ilizwe leDikapolisi.

³² Baletha kuye ongezwayo oyimbebebe, bamncenga ukuba abeke isandla sakhe phezu kwakhe.

³³ Emkhupha exukwini baya eceleni bebodwa, wafaka iminwe yakhe endlebeni zakhe, wakhafula amathe, wathinta ulimi lwakhe.

³⁴ Ekhangela ezulwini, wabubula, wathi kuye: “Efatha”; okuyikuthi: Vuleka!

³⁵ Zavuleka indlebe zakhe, kwathukuluka masinyane umthambo wolimi lwakhe, wakhuluma kuhle.

³⁶ Wabalaya ukuba bangatsheli muntu. Kodwa lanxa wayebalayile kakhulu, kwang’khona bekutshumayela ngamandla.

³⁷ Bonke abakuzwayo bamangala kakhulu, bathi: Uzenzile izinto zonke kuhle; wenza izacuthe ukuba zizwe, lezimungulu ukuba zikhulume.