UMakho 6 - iBhayibhili Elingcwele 1978

UJesu udelelwa ngabaseNazaretha

¹ Wasuka lapho, waya elizweni lakubo; abafundi bakhe bamlandela.

² Sekufikile iSabatha, waqala ukufundisa esinagogeni. Abanengi abamuzwayo bamangala bathi: Uzithatha ngaphi lezizinto na? Yikuhlakanipha bani akunikiweyo na? Lemisebenzi yamandla eyenziwe ngezandla zakhe na?

³ Lo kasuye umbazi, indodana kaMariya, lomfowabo kaJakobe loJose loJudasi loSimoni na? Labodadewabo kabakho yini lapha kithi? Bakhubeka ngaye.

⁴ UJesu wathi kubo: Umprofethi kasweli ukudunyiswa ngaphandle kwaselizweni lakubo, lasezihlotsheni zakhe, lasendlini yakwabo.

⁵ Kabanga lakwenza lowodwa umsebenzi wamandla lapho, ngaphandle kokubeka izandla zakhe phezu kwabagulayo abayingcosana, wabasilisa.

⁶ Wamangala ngokungakholwa kwabo. Wahamba imizi ngemizi efundisa.

Ukuthunywa kwabaphostoli

⁷ Wabizela kuye abalitshumi lambili, waqala ukubathuma ngababili, wabanika amandla phezu komoya ababi.

⁸ Wabalaya ukuba bangaphathi lutho lwendlela, kodwa udondolo lodwa, bangaphathi lamphako, lasikhwama, lamali emixhakeni yabo,

⁹ kodwa bafake amanyathelo, bangambathi ingubo ezimbili.

¹⁰ Wathi kubo: Lapho lingena khona endlini, hlalani kiyo, lize lisuke khona.

¹¹ Layiphi indawo engayikulamukela lengayikulilalela, nxa liphuma lapho, thintithani uthuli olungaphansi kwenyawo zenu, kube yibufakazi kubo.

¹² Basebehamba betshumayela ukuba abantu baphenduke.

¹³ Bakhupha omoya ababi abanengi, bagcoba abanengi abagulayo ngamagcobo, babasilisa.

Ukubulawa kukaJohane uMbhaphathizi

¹⁴ Inkosi uHerodi wezwa ngakho, ngoba ibizo likaJesu laselidumile. Kwathiwa uJohane uMbhaphathizi uvukile kwabafileyo; kungakho lamandla esebenza kuye.

¹⁵ Abanye bathi: NguElija; labanye bathi: Ungumprofethi njengomunye wabaprofethi.

¹⁶ Kodwa uHerodi esizwa wathi: NguJohane engamquma ikhanda, uvukile.

¹⁷ Ngoba uHerodi wayethumele wambamba uJohane, wamfaka entolongweni ngenxa kaHerodiyasi umkaFiliphu umfowabo, ngoba wayemthethe.

¹⁸ Ngoba uJohane wayethe kuHerodi: Kawuvunyelwa ukuthatha umkamfowenu.

¹⁹ Ngakho uHerodiyasi wambambela inhliziyo, wafuna ukumbulala; kodwa wehluleka,

²⁰ ngoba uHerodi wayemesaba uJohane emazi ukuba uyindoda elungileyo lengcwele, wamlondoloza; nxa emuzwa, wadideka kakhulu, kodwa wamuzwa ngokuthokoza.

²¹ Kwathi sekufikile usuku oluhle, olokuzalwa kukaHerodi, wenzela idili izikhulu zakhe, lezinduna, labalisa baseGalili;

²² kwangena indodakazi kaHerodiyasi, yasina, yamkholisa uHerodi lalabo ababehlezi laye. Inkosi yathi entombini: Cela kimi loba kuyini okuthandayo, ngizakupha khona.

²³ Wafunga kuyo wathi: Loba kuyini ongakucela kimi ngizakukunika khona, loba kungaze kube yingxenye yombuso wami.

²⁴ Yaphuma, yaya kunina yathi: Ngizakucelani na? Wathi: Ikhanda likaJohane uMbhaphathizi.

²⁵ Yangena masinyane enkosini ngokukhawuleza, yacela yathi: Ngifuna ukuba unginike khathesinje emganwini ikhanda likaJohane uMbhaphathizi.

²⁶ Inkosi yadabuka kakhulu, kodwa ngenxa yezifungo zayo langalabo ababehlezi layo kayithandanga ukuyilandulela.

²⁷ Inkosi yathuma masinyane omunye webutho, yamlaya ukuba alethe ikhanda likaJohane. Wahamba, wamquma ikhanda entolongweni.

²⁸ Waletha ikhanda ngomganu, walinika intombi, intombi yalinika unina.

²⁹ Kwathi abafundi bakhe sebezwile, beza bathatha isidumbu sakhe basibeka elibeni.

UJesu usuthisa amadoda azinkulungwane ezinhlanu

³⁰ Abaphostoli babuthana kuJesu, bambikela konke ababekwenzile lababekufundisile.

³¹ Wasesithi kibo: Wozani lina lodwa endaweni eyinkangala, liphumule kancinyane. Ngoba babebanengi abafikayo labahambayo, bengelasikhathi sokudla.

³² Bakhuphuka ngomkolo, baya endaweni eyinkangala bebodwa.

³³ Abanengi bababona behamba, babazi, bagijimela khona ngenyawo, bevela emizini yonke, babafikela kuqala.

³⁴ Kwathi ephuma, wabona ixuku elikhulu, walihawukela, ngoba lalinjengezimvu ezingelamalusi; waqala ukulifundisa izinto ezinengi.

³⁵ Kwathi isikhathi sesihambile, abafundi bakhe beza kuye, bathi: Lindawo iyinkangala, lesikhathi sesihambile;

³⁶ badabulele ukuze baye emaphandleni lasemizini ezingelezileyo, bazithengele ukudla.

³⁷ Wabaphendula wathi kibo: Banikeni lina ukudla. Bathi kuye: Sihambe yini, siyethenga izinkwa zamadola angamatshumi amabili, sibaphe badle na?

³⁸ Wathi kubo: Lilezinkwa ezingaki na? Hambani liyebona. Sebebonile bathi kuye: Zinhlanu, lenhlanzi ezimbili.

³⁹ Wabalaya ukuba bonke bahlale phansi ngamaxuku otshanini obuluhlaza.

⁴⁰ Basebehlala phansi izigaba ngezigaba, ngamakhulu langamatshumi amahlanu.

⁴¹ Wathatha izinkwa ezinhlanu lenhlanzi ezimbili, ekhangela ezulwini, wabonga, wazihlephula izinkwa, wazinika abafundi bakhe ukuba bazibeke phambi kwabo; lenhlanzi ezimbili wababela bonke.

⁴² Badla bonke, basutha.

⁴³ Babutha imvuthuluka yezinkwa, izitsha ezilitshumi lambili zagcwala, leyenhlanzi.

⁴⁴ Labo abadlayo izinkwa babengamadoda azinkulungwane ezinhlanu.

UJesu uhamba phezu kolwandle

⁴⁵ Masinyane wacindezela abafundi bakhe ukuba bangene emkolweni bamandulele ukuya ngaphetsheya eBetsayida, esadabulela ixuku.

⁴⁶ Esebavalelisile wasuka waya entabeni ukuyakhuleka.

⁴⁷ Sekuhlwile, umkolo wawusolwandle, yena wayeyedwa emhlabathini.

⁴⁸ Wababona behlupheka kakhulu ekugwedleni, ngoba umoya wawuphambene labo; weza kubo ngesikhathi somlindo wesine wobusuku ehamba phezu kolwandle. Wayezakubadlula.

⁴⁹ Sebembonile ehamba phezu kolwandle, bacabanga ukuba yisipuku; bakhala.

⁵⁰ Ngoba bambona bonke, bethuka. Kodwa wakhuluma labo masinyane, wathi kubo: Manini isibindi; yimi, lingesabi.

⁵¹ Wasengena kubo emkolweni, umoya wathula; bamangala kakhulu.

⁵² Ngoba babengaqedisisanga ngezinkwa, inhliziyo zabo zazilukhuni.

UJesu usilisa elizweni laseGenesaretha

⁵³ Sebewelile bafika eGenesaretha, bawubophela umkolo okhunjini.

⁵⁴ Bathi sebephumile emkolweni, abantu bahle bamazi,

⁵⁵ bagijimela kulo lonke lelolizwe, baqala ukuletha kuye abagulayo ngamathala, lapho abamuzwa ukuba ukhona.

⁵⁶ Loba ngaphi lapho aya khona, emizaneni lasemizini lasemaphandleni, babeka abagulayo emidangeni, bamncenga ukuba bathinte loba umphetho wengubo yakhe nje; bonke abamthintayo basiliswa.