UMakho 5 - iBhayibhili Elingcwele 1978

Ukukhutshwa kwabomoya ababi

¹ Bafika ngaphetsheya kolwandle elizweni lamaGerasene.

² Esephumile emkolweni, wamhlangabeza masinyane umuntu ovela emalibeni elomoya omubi;

³ wayehlala emalibeni. Kwakungasekho muntu owayengambopha langeketane;

⁴ ngoba wayebotshiwe kanengi ngezibopho langamaketane, kodwa wawaqamula amaketane, lezibopho waziquma, kwakungasekho loyedwa owayengamthambisa.

⁵ Ngezikhathi zonke ebusuku lemini wayesemalibeni lezintabeni, ekhala, ezisika ngamatshe.

⁶ Kwathi ebona uJesu ekhatshana, wagijima, wamkhonza;

⁷ wamemeza ngelizwi elikhulu esithi: Ngilani lawe Jesu, Ndodana kaNkulunkulu oPhezukonke? Ngikufungisa uNkulunkulu, ungangihluphi.

⁸ Ngoba uJesu wathi kuye: Phuma kuye, wena moya omubi.

⁹ Wasembuza wathi: Ungubani ibizo lakho? Wamphendula wathi: Ibizo lami nginguLegiyoni, ngoba sibanengi.

¹⁰ Wamncenga kakhulu ukuba angabakhuphi kulelolizwe.

¹¹ Kwakukhona lapho ewatheni lentaba umhlambi omkhulu wengulube usidla.

¹² Omoya bamncenga bathi: Sithumele engulubeni singene kuzo.

¹³ UJesu wabavumela. Omoya ababi baphuma, bangena ezingulubeni; umhlambi waphaphathekela eliweni, waphoseka olwandle, waminzwa, zazingaba zinkulungwane ezimbili.

¹⁴ Abazalusayo babaleka, babika indaba emzini lasemaphandleni; beza ukubona okwenzekileyo.

¹⁵ Bafika kuJesu, bambona obengenwe ngomoya ababi ehlezi embethe, esilile, yena owayelomoya ababi abanengi; besaba.

¹⁶ Labo ababekubonile babatshela ukuba kwenzeke kanjani kowayengenwe ngomoya ababi, langengulube.

¹⁷ Basebeqala ukumncenga ukuba asuke elizweni lakubo.

¹⁸ Wathi engena emkolweni, umuntu owayengenwe ngomoya ababi wamncenga ukuba abe laye.

¹⁹ Kamvumelanga, kodwa wathi kuye: Hamba uye ekhaya kwabakini, ubatshele ukuba iNkosi ikwenzele okungakanani, ilesihawu kuwe.

²⁰ Wasuka, wahamba, waqala ukutshumayela eDikapolisi ukuba uJesu umenzele okungakanani; bamangala bonke.

Indodakazi kaJayirosi ivuswa ekufeni. Owesifazana owayelomopho uyasiliswa

²¹ UJesu esebuye wawelela ngaphetsheya ngomkolo, kwabuthana kuye ixuku elikhulu; wayesolwandle.

²² Kwafika omunye wabaphathi besinagoge, uJayirosi ibizo lakhe; embona wawa phansi ngasenyaweni zakhe,

²³ wamncenga kakhulu esithi: Indodakazi yami isiphela; akuze, ubeke izandla zakho phezu kwayo ukuze isiliswe, iphile.

²⁴ Wahamba laye. Ixuku elikhulu lamlandela, lamcindezela.

²⁵ Owesifazana owayelomopho iminyaka elitshumi lambili,

²⁶ ehluphekile kakhulu enyangeni ezinengi, echithile konke ayelakho engasizakalanga, kodwa kwalokho kumqinisa,

²⁷ esezwile ngoJesu, weza exukwini ngemva kwakhe, wathinta ingubo yakhe,

²⁸ ngoba wathi: Aluba ngithinta ingubo zakhe nje, ngizakusiliswa.

²⁹ Woma masinyane umthombo wegazi lakhe, wezwa emzimbeni wakhe ukuba usilile esifweni sakhe.

³⁰ UJesu wanela ukuzwa phakathi kwakhe ukuba amandla aphumile kuye, waphendukela exukwini, wathi: Ngubani othinte ingubo zami?

³¹ Abafundi bakhe bamphendula bathi kuye: Uyabona ixuku likucindezela, kodwa uthi: Ngithintwe ngubani?

³² Wathalaza ukuba ambone owenze lokhu.

³³ Owesifazana esesaba ethuthumela, ekwazi okwenzekileyo kuye, weza wawa phambi kwakhe, wamtshela iqiniso lonke.

³⁴ Wathi kuye: Dade, ukukholwa kwakho kukusilisile; hamba kuhle, usiliswe esifweni sakho.

³⁵ Wathi esakhuluma, kwafika abomphathi wesinagoge, bathi: Indodakazi yakho isifile; usamkhathazelani uMfundisi na?

³⁶ UJesu engakunanzi okutshiwoyo, wathi kumphathi wesinagoge: Ungesabi, kholwa kuphela.

³⁷ Kavumelanga muntu ukuba amlandele, kuphela uPetro, loJakobe, loJohane umfowabo kaJakobe.

³⁸ Bafikake endlini yomphathi wesinagoge, wabona isiphithiphithi labakhalayo labalilayo kakhulu.

³⁹ Esengenile, wathi kubo: Liphithizelelani, likhala na? Umntwana kafanga, kodwa ulele.

⁴⁰ Bamhleka ulunya; kodwa yena esebakhuphile bonke, wathatha uyise womntwana lonina lalabo ababelaye, wangena lapho kulele khona umntwana.

⁴¹ Wabamba isandla somntwana, wathi kuye: “Thalitha, kumi”; okuyikuthi ngokuphendulelwa: Ntombazana, ngithi kuwe, vuka!

⁴² Yasivuka intombazana masinyane, yahamba; yayileminyaka elitshumi lambili. Bamangala ngokumangala okukhulu.

⁴³ Wabalayisisa ukuba lokhu kungaziwa muntu; njalo wathi kayinikwe ukudla.