UMakho 4 - iBhayibhili Elingcwele 1978

Umfanekiso womhlanyeli

¹ Wabuya waqala ukufundisa ngasolwandle. Kwabuthana kuye ixuku elikhulu, waze wangena emkolweni, wahlala kuwo olwandle; ixuku lonke lalisemhlabathini ngasolwandle.

² Wabafundisa izinto ezinengi ngemifanekiso: ekufundiseni kwakhe wathi kubo:

³ Lalelani; kwaphuma umhlanyeli ukuyahlanyela.

⁴ Kwathi ekuhlanyeleni kwakhe enye inhlanyelo yawela endleleni; kwafika inyoni, zayidobha zayiqeda.

⁵ Enye inhlanyelo yawela edwaleni, lapho kwakungelamhlabathi omnengi khona; yamila masinyane, ngoba kwakungelamhlabathi omnengi.

⁶ Kwathi ekuphumeni kwelanga, yahanguka; yabuna ngoba yayingelampande.

⁷ Enye yawela emeveni; ameva akhula, ayiminyanisa, yahluleka ukuthela.

⁸ Enye inhlanyelo yawela emhlabathini omuhle; yakhula, yanda, yathela, yazala amatshumi amathathu, lamatshumi ayisithupha, lekhulu.

⁹ Wathi: Olendlebe zokuzwa akezwe.

Umsebenzi wemifanekiso

¹⁰ Eseyedwa, labo ababelaye kanye labalitshumi lambili bambuza ngemifanekiso.

¹¹ Wathi kubo: Lina liphiwe imfihlakalo yombuso kaNkulunkulu, kodwa abangaphandle benzelwa izinto zonke ngemifanekiso,

¹² ukuze: Ukubona babone, bangabonisisi, lokuzwa bezwe, bangaqedisisi, funa baphenduke bathethelelwe.

Ukuchasisa umfanekiso womhlanyeli

¹³ Wasesithi kubo; Kaliwazi lumfanekiso na? Pho, lizakuyazi kanjani imifanekiso yonke na?

¹⁴ Umhlanyeli uhlanyela ilizwi.

¹⁵ Abangasendleleni yilabo abathi lapho kuhlanyelwa khona ilizwi, lanxa belizwa, uSathane afike masinyane, alisuse ilizwi elihlanyelwe kubo.

¹⁶ Kunjalo abahlanyelwe edwaleni yilabo abathi lapho besizwa ilizwi, balamukele ngokuthokoza;

¹⁷ kodwa kabalampande phakathi kwabo, bahlala isikhatshana, kuthi sekufika inkathazo lenhlupheko ngenxa yelizwi, bakhubeke masinyane.

¹⁸ Abanye yilabo abahlanyelwe emeveni; yibo abalizwayo ilizwi,

¹⁹ kodwa ukuphisekela izinto zalumhlaba, lokukhohliswa yinotho, lenkanuko yezinye izinto kungene kuminyanise ilizwi, ukuze lingatheli.

²⁰ Labahlanyelwe emhlabathini omuhle yilabo abathi belizwile ilizwi, balamukele, bathele amatshumi amathathu, lamatshumi ayisithupha, lekhulu.

Umfanekiso wesibane lowenhlanyelo

²¹ Wasesithi kubo: Isibane silethwa ukuba sibekwe ngaphansi kwesitsha ingabe ngaphansi kwethala yini, kasibekwa esiqobaneni na?

²² Ngoba kakukho okufihliweyo okungayikubonakaliswa: lokuthukuziweyo okungayikulethwa ekukhanyeni.

²³ Uba kukhona olendlebe zokuzwa, akezwe.

²⁴ Wasesithi kubo: Qaphelisani elikuzwayo; ngesilinganiso elilinganisa ngaso lizakulinganiselwa ngaso lani, liphiwe ngokwengezelelweyo.

²⁵ Ngoba lowo olakho uzakuphiwa; kodwa ongelakho uzakwamukwa lalokho alakho.

²⁶ Wasesithi: Umbuso kaNkulunkulu unje; njengokuba umuntu ephosa inhlanyelo emhlabathini,

²⁷ alale, avuke ebusuku lemini, inhlanyelo imile, ikhule, kakwazi ukuba ikhula kanjani.

²⁸ Umhlabathi uyathela ngokwawo, kuqala ikhaba, kulandele isikhwebu, andubana kulandele amabele apheleleyo esikhwetshini.

²⁹ Nxa esevuthiwe amabele, ufaka ingqamu masinyane, ngoba ukuvuna sekufikile.

³⁰ Wathi futhi: Sizakuwufanisa lani umbuso kaNkulunkulu? Sizakuwuchasisa ngomfanekiso bani?

³¹ Unjengohlamvu lwemastade luhlanyelwa emhlabathini, luluncinyane kulazo zonke inhlamvu ezisemhlabeni,

³² kodwa nxa seluhlanyelwe lumila lukhule lube lukhulu ukudlula izihlahlana zonke, lukhuphe ingatsha ezinkulu, ukuze inyoni zaphezulu zakhele emthunzini wazo.

³³ Walikhuluma kubo ilizwi ngemifanekiso eminengi enjalo njengamandla abo okuzwa;

³⁴ ngaphandle komfanekiso kakhulumanga lutho kubo; kodwa ensitha, wachasisela abafundi bakhe izinto zonke.

Ukuthuliswa kwesiphepha

³⁵ Ngalolosuku sekuhlwile, wathi kubo: Asiwelele ngaphetsheya.

³⁶ Ngakho batshiya ixuku, bamthatha bahamba laye, njengalokho ebesemkolweni; eminye imikolo yayilaye.

³⁷ Kwavuka isiphepha esikhulu somoya, amavinqo aphoseka emkolweni, waze waqala ukugcwala.

³⁸ Kodwa yena wayelele emqamelweni ngemuva; bamvusa, bathi: Mfundisi, kawukhathali lokuba siyabhubha na?

³⁹ Wavuka, wakhuza umoya, wathi kulo ulwandle: Thula, uthi zwi! Umoya waqamuka, kwaba khona ukuthula okukhulu.

⁴⁰ Wathi kubo: Kungani lisesaba kangaka na? Kalikabi lakho ukukholwa na?

⁴¹ Besaba kakhulu, bathi omunye komunye: Kanti ungubani lo, ukuba umoya lolwandle kumlalele?