UMakho 3 - iBhayibhili Elingcwele 1978

UJesu usilisa ngeSabatha

¹ Wabuya wangena esinagogeni. Kwakukhona lapho umuntu olesandla esitshwabheneyo.

² Bamqaphela ukuba uzakumsilisa ngeSabatha, ukuze bambeke icala.

³ Wathi kumuntu olesandla esitshwabheneyo: Sukuma, ume phakathi.

⁴ Wathi kubo: Kuvunyelwe yini ngeSabatha ukwenza okulungileyo ingabe ukwenza okungalunganga, ukusilisa ingabe ukubulala na? Bathula.

⁵ Wabathalaza ngokuthukuthela, edabukile ngobulukhuni benhliziyo zabo; wathi kulowomuntu: Yelula isandla sakho. Waselula, isandla sakhe sasiliswa.

⁶ AbaFarisi baphuma, bacebisana masinyane labakaHerodi ukuba bangambulala kanjani uJesu.

UJesu usilisa abanye abantu

⁷ UJesu waphuma labafundi bakhe, waya ngasolwandle; ixuku elikhulu lamlandela livela eGalili laseJudiya,

⁸ laseJerusalema, laseIdumiya, langaphetsheya kweJordani, lasemimangweni yaseTire leSidoni; ixuku elikhulu selizwile konke akwenzayo, leza kuye.

⁹ Watshela abafundi bakhe ukuba bamlungisele umkolo ngenxa yexuku, ukuze lingamcindezeli.

¹⁰ Ngoba wayesilisa abantu abanengi, baze bawela phezu kwakhe bonke abalezifo ukuze bamthinte.

¹¹ Omoya ababi babesithi bembona, bawe phansi phambi kwakhe, bakhale bathi: Wena uyiNdodana kaNkulunkulu.

¹² Wabalayisisa ukuba bangamvezi.

Ukukhethwa kwabaphostoli

¹³ Wenyukela entabeni, wabizela kuye labo ayebafuna; beza kuye.

¹⁴ Wamisa abalitshumi lambili ukuze babe laye abathume ukuyatshumayela,

¹⁵ babe lamandla okukhupha omoya ababi.

¹⁶ Wamisa abalitshumi lambili; uSimoni amutha ibizo lokuthi nguPetro,

¹⁷ loJakobe indodana kaZebediya, loJohane, umfowabo kaJakobe, wabatha wathi ngoBowanegesi okuyikuthi amadodana okuduma;

¹⁸ loAndreya loFiliphu, loBartolomewu, loMathewu, loTomasi, loJakobe indodana kaAlfewu, loTadewu, loSimoni umKanani,

¹⁹ loJudasi uIskariyothi owamnikelayo.

Isono sokuhlambaza

²⁰ Wangena endlini; ixuku labuthana futhi, baze baswela lethuba lokudla.

²¹ Abakibo sebezwile lokhu baphuma ukuyambamba, ngoba bathi uyahlanya.

²² Lababhali abavela eJerusalema bathi: UloBelezebule, uyakhupha omoya ababi ngenkosi yomoya ababi.

²³ Wababizela kuye, wakhuluma labo ngemifanekiso wathi: USathane angakhupha kanjani uSathane na?

²⁴ Uba umbuso wahlukene phakathi, lowombuso ungeme.

²⁵ Lendlu uba yahlukene phakathi, leyondlu ingeme.

²⁶ LoSathane, uba ezivukela yena, ahlukane phakathi, angeme, kodwa uyaphela.

²⁷ Yebo, kakho ongangena endlini yesiqhwaga, aphange impahla yaso, uba engasibophi isiqhwaga kuqala, anduba aphange indlu yaso.

²⁸ Ngiqinisile ngithi kini: Zonke izono zizakuthethelelwa abantu lokuhlambaza abahlambaza ngakho.

²⁹ Kodwa lowo ohlambaza uMoya oNgewele kalakuthethelelwa lanini, kodwa ulecala lesono esingapheliyo.

³⁰ Watsho lokhu ngoba bathi ulomoya omubi.

Izihlobo zikaJesu eziyizo

³¹ Kwafika unina labafowabo bema ngaphandle, bathumela kuye bembiza.

³² Ixuku lalimphahlile; bathi kuye: Khangela, unyoko labafowenu bangaphandle bayakufuna.

³³ Waphendula wathi: Ngubani umama labafowethu na?

³⁴ Wathalaza labo ababehlezi bemphahlile, wathi: Khangelani, nangu umama labafowethu.

³⁵ Ngoba ilowo lalowo owenza intando kaNkulunkulu nguye ongumfowethu lodadewethu lomama.