UMakho 2 - iBhayibhili Elingcwele 1978UJesu usilisa umuntu oyisilima ( Mat 9:1–8 ; Luka 5:17–26 ) 1 Esebuye wangena eKapenawume emva kwensuku ezithile; kwezwakala ukuba usendlini. 2 Kwahle kwabuthana abanengi, akwazabe kusaba lendawo langasemnyango; watshumayela ilizwi kubo. 3 Beza kuye beletha oyisilima, ethwelwe ngabantu abane. 4 Babengelakusondela kuye ngenxa yexuku, bavula uphahla lapho ayekhona, bathi sebebhobozile behlisa ithala alele kulo oyisilima. 5 UJesu ebona ukukholwa kwabo wathi koyisilima: Ndodana, uthethelelwe izono zakho. 6 Kodwa abanye bababhali ababehlezi lapho, banakana enhliziyweni zabo bathi: 7 Ukhulumelani okunje lumuntu na? Uyahlambaza. Ngubani ongathethelela izono, ngaphandle kukaNkulunkulu yedwa na? 8 Wahle wakwazi uJesu ngomoya wakhe ukuthi babenakana lokhu phakathi kwabo, wathi kibo: Linakanelani izinto lezi enhliziyweni zenu na? 9 Yikuphi okulula ukuthi koyisilima: Izono zakho zithethelelwe, ingabe ukuthi: Sukuma, uthathe ithala lakho, uhambe, na? 10 Kodwa ukuze lazi ukuba iNdodana yomuntu ilamandla okuthethelela izono emhlabeni — wathi koyisilima — 11 Ngithi kuwe: Sukuma, uthathe ithala lakho uye endlini yakho. 12 Wasukuma, wahle wathatha ithala lakhe, waphuma phambi kwabo bonke, baze bamangala bamdumisa uNkulunkulu besithi: Kasizanga sikubone okunje. Ukubizwa kukaLevi ( Mat 9:9–13 ; Luka 5:27–32 ) 13 Wabuya waya ngasolwandle, Ixuku lonke leza kuye, wabafundisa. 14 Wathi edlula, wabona uLevi indodana kaAlfewu, ehlezi endaweni yokuthelisela, wathi kuye: Ngilandela. Wasuka, wamlandela. 15 Kwathi ehlezi ekudleni endlini yakhe, abathelisi abanengi lezoni babesekudleni loJesu labafundi bakhe; ngoba babebanengi, bemlandela. 16 Ababhali babaFarisi bembona esidla lezoni labathelisi bathi kubafundi bakhe: Kungani esidla labathelisi lezoni na? 17 UJesu esizwa lokhu wathi kubo: Abaphilayo kabadingi inyanga, kodwa abagulayo; kangizanga ukubiza abalungileyo kodwa ngize ukubiza izoni. Ukuzila ukudla ( Mat 9:14–17 ; Luka 5:33–39 ) 18 Abafundi bakaJohane labaFarisi babezila ukudla; abantu beza kuye bathi: Kungani ukuba abafundi bakaJohane labafundi babaFarisi bazile ukudla, kodwa abakho bengazili na? 19 UJesu wathi kubo: Abakwabo kamyeni bangazila ukudla umyeni eselabo na? Bangezile umyeni eselabo. 20 Kodwa zizakufika insuku, lapho umyeni ezakususwa kubo; kung’khonake bezakuzila ngalolosuku. 21 Kakho othungela isichibi esingakafinyeli engutsheni endala, funa okubekelweyo kudabuke kwendala, siqhele isikhala. 22 Kakho othela iwayini elitsha emigodleni emidala, funa iwayini lidabule imigodla, lichitheke iwayini, lemigodla yonakale; kodwa iwayini elitsha lithelwa emigodleni emitsha. UJesu uchasisa umlayo weSabatha ( Mat 12:1–8 ; Luka 6:1–5 ) 23 Kwathi edabula emasimini ngeSabatha, abafundi bakhe baqala ukukha izikhwebu behamba. 24 AbaFarisi basebesithi kuye: Khangela, kungani besenza okungavunyelwayo ngeSabatha na? 25 Wathi kibo: Kalizanga lifunde yini okwenziwa nguDavida mhla eswele, elambile yena lababelaye, 26 ukuthi wangena endlini kaNkulunkulu, esikhathini uAbiyatha engumpristi omkhulu, wadla izinkwa ezahlukaniselwe uNkulunkulu ezingavunyelwanga ukudliwa ngumuntu, ngaphandle kwabapristi bodwa, wabanika lababelaye na? 27 Wathi kibo: ISabatha lenzelwa umuntu, umuntu kenzelwanga iSabatha. 28 Kunjaloke iNdodana yomuntu iyiNkosi leyeSabatha. |
Bible Society of Zimbabwe 1978
Bible Society of Zimbabwe