UMakho 15 - iBhayibhili Elingcwele 1978UJesu uphambi kukaPilatu ( Mat 27:1–2 , 11–26 ; Luka 23:1–5 , 13–25 ; Joha 18:26—19:16 ) 1 Kwathi masinyane ekuseni abapristi abakhulu labadala lababhali lomphakathi wonke benza icebo, bambopha uJesu, bamqhuba, bamnikela kuPilatu. 2 UPilatu wambuza wathi: Wena uyiNkosi yabaJuda na? Wamphendula wathi kuye: Kutsho wena. 3 Abapristi abakhulu bammangalela ngezinto ezinengi. 4 UPilatu wabuya wambuza wathi: Kawuphenduli lutho na? Khangela ukuba bakumangalela ngezinto ezingaka. 5 Kodwa uJesu kabesaphendula lutho, waze wamangala uPilatu. 6 Ngomkhosi wePhasika wayejwayele ukubakhululela isibotshwa sibe sinye abasicelayo. 7 Kwakukhona umuntu othiwa nguBarabasi ibizo lakhe, owayebotshiwe kanye labanye ababevukele umbuso; babulala abantu ekuvukeni. 8 Ixuku lenyuka, laqala ukucela ukuba alenzele njengalokhu ayejwayele ukulenzela. 9 UPilatu wababuza wathi: Lithanda ukuba ngilikhululele iNkosi yabaJuda na? 10 Ngoba wayekwazi ukuthi abapristi abakhulu bamnikele ngomona. 11 Kodwa abapristi abakhulu bavusa ixuku ukuba kungcono alikhululele uBarabasi. 12 UPilatu wabuya wathi kubo: Pho, lithi ngimenze njani lo elithi uyiNkosi yabaJuda na? 13 Bamemeza futhi bathi: Mbethele! 14 UPilatu wathi kubo: Ngoba wenze ububi bani? Kodwa bamemeza kakhulu, bathi: Mbethele! 15 Khona uPilatu ethanda ukukholisa ixuku walikhululela uBarabasi; kwathi esemtshayile uJesu, wamnikela ukuba abethelwe. Abebutho bamenza uJesu inhlekisa ( Mat 27:27–31 ; Joha 19:2–3 ) 16 Abebutho basebemngenisa endlini yombusi, babizela ibutho lonke ndawonye. 17 Bamambathisa ingubo eyibubende, sebeluke umqhele wameva bamethwesa wona. 18 Baqala ukumbingelela besithi: Bayethe, Nkosi yabaJuda! 19 Bamtshaya ekhanda ngoluthi, bamkhafulela ngamathe, baguqa bekhuleka kuye. 20 Sebemenze inhlekisa bamhlubula ingubo eyibubende, bamambathisa ingubo zakhe. Basebemqhuba ukuba bambethele. UJesu esiphambanweni ( Mat 27:32–44 ; Luka 23:26–43 ; Joha 19:17–27 ) 21 Bambamba ngamandla umuntu, othiwa nguSimoni waseKureni, uyise kaAleksandro loRufusi, owayesedlula evela egangeni, ukuba athwale isiphambano sakhe. 22 Bamusa endaweni ethiwa yiGolgotha, okuyikuthi ngokuphendulelwa, iNdawo yokhakhayi. 23 Bamnika iwayini lixutshaniswe lemure; kodwa kalamukelanga. 24 Basebembethela, babelana ingubo zakhe, benza inkatho ngazo ukuba ilowo lalowo uzakuthathani. 25 Kwakuyiawa yesificamunwemunye ekuseni bembethela. 26 Kwakubhaliwe incwadi yecala lakhe ukuthi: INKOSI YABAJUDA. 27 Kwabethelwa kanye laye abaphangi ababili, omunye ngakwesokunene sakhe lomunye ngakwesokhohlo sakhe. [ 28 Kwagcwaliseka umbhalo othi: Wabalwa kanye lezoni.] 29 Abedlulayo bamhlambaza benikina amakhanda abo, besithi: Iya, wena odiliza ithempeli, ubuye ulakhe ngensuku ezintathu; 30 zisilise, wehle esiphambanweni. 31 Ngokunjalo labapristi abakhulu labo bahlekisana ngaye kanye lababhali, besithi: Wasilisa abanye, angezisilise yena. 32 UKristu, iNkosi yakoIsrayeli, kayehle khathesi esiphambanweni, ukuze sibone, sikholwe. Lababebethelwe kanye laye bamklolodela. Ukufa kukaJesu ( Mat 27:45–56 ; Luka 23:44–49 ; Joha 19:28–30 ) 33 Emini kwaba mnyama elizweni lonke, kwaze kwaba yiawa yesithathu ntambama. 34 Ngeawa yesithathu ntambama uJesu wamemeza ngelizwi elikhulu, wathi, “Eloyi, Eloyi, lama sabaktani?” okuyikuthi ngokuphendulelwa: Nkulunkulu wami, Nkulunkulu wami, ungitshiyeleni na? 35 Abanye kwababemi khona bekuzwa bathi: Khangelani, ubiza uElija. 36 Wasegijima omunye, wagcwalisa uzipho ngewayini elimunyu, waluhloma oluthini, wamnika ukuba anathe esithi: Yekelani, sibone ukuba uElija uzakuza amethule. 37 UJesu wamemeza ngelizwi elikhulu, wafa. 38 Iveli lethempeli ladabuka kabili, laqala phezulu laze lafika phansi. 39 Kwathi induna yekhulu eyayimi maqondana laye imbona esifa ngokunjalo, yathi: Lembala lumuntu ubeyiNdodana kaNkulunkulu. 40 Kwakukhona labesifazana bebukela, bekhatshana; phakathi kwabo kukhona uMariya Magadalena, loMariya unina kaJakobe omncinyane lokaJose, loSalome, 41 ababemlandela eseseGalili, bemsebenzela; kanye labanye abenyukela laye eJerusalema. Ukumbelwa kukaJesu ( Mat 27:57–61 ; Luka 23:50–56 ; Joha 19:38–42 ) 42 Kwathi sekuhlwile, ngoba kwakulusuku lokulungiselela, okuyikuthi usuku olungaphambi kweSabatha, 43 kwafika uJosefa waseArimathiya, ilungu elidumileyo lomphakathi, laye wayelindele umbuso kaNkulunkulu; wangena ngesibindi kuPilatu, wacela isidumbu sikaJesu. 44 UPilatu wamangala ngokuthi usefile, wabiza induna yekhulu, wabuza kuyo ukuba sekuyisikhathi efile. 45 Esezwile enduneni yekhulu wamnika uJosefa isidumbu. 46 UJosefa wathenga ilembu, wamethula, wamgoqela ngelembu, wambeka elibeni elaligujiwe edwaleni, wagiqela ilitshe emnyango weliba. 47 UMariya Magadalena loMariya unina kaJose babona lapho abekwa khona. |
Bible Society of Zimbabwe 1978
Bible Society of Zimbabwe