UMakho 13 - iBhayibhili Elingcwele 1978

UJesu ukhuluma ngokuchithwa kweJerusalema langokuphela kwesikhathi

¹ Kwathi ephuma ethempelini, omunye wabafundi bakhe wathi kuye: Mfundisi, khangela amatshe anjani lezakhiwo ezinjani!

² UJesu wathi kuye: Uyabona lezizakhiwo ezinkulu na? Kakuyikusala ilitshe elilodwa phezu kwelinye elingayikudilizelwa phansi.

³ Esehlezi entabeni ethiwa iOliveti maqondana lethempeli uPetro loJakobe loJohane loAndreya bambuza bebodwa,

⁴ bathi: Sitshele ukuba lokhu kuzakuba nini, lokuba isibonakaliso sizakuba yini, lapho sekuzakwenzakala lezizinto zonke na?

⁵ Kwang’khona uJesu eqala ukuthi kubo: Qaphelani lingaduhiswa muntu.

⁶ Abanengi bazakuza ngebizo lami besithi: Nginguye; baduhise abanengi.

⁷ Kodwa nxa lisizwa ngezimpi lamahungahunga ezimpi, lingethuki; kufanele kwenzeke, kodwa ukuphela kuzabe kungakafiki.

⁸ Ngoba isizwe sizakuvukela isizwe, lombuso uvukele umbuso; kube khona ukuzamazama komhlaba indawo ngendawo, kube khona indlala; lezizinto ziyikuqala komhelo wesikhathi esizayo.

⁹ Kodwa qaphelani lina. Bazakulinikela emiphakathini; lizakutshaywa emasinagogeni; lizakumiswa phambi kwababusi ngenxa yami, kube yibufakazi kubo.

¹⁰ Kodwa ivangeli limele ukutshunyayelwa kuzo zonke izizwe kuqala.

¹¹ Nxa belidonsela ekuthoniseni, belinikela, lingakhathaleli ngaphambili elizakukukhuluma, kodwa lokhu elizakukunikwa ngalesosikhathi, kukhulumeni; ngoba kakusini elikhulumayo kodwa uMoya oNgcwele.

¹² Umuntu uzakunikela umfowabo ekufeni loyise umntanakhe, labantwana bazakuvukela abazali, bababulale.

¹³ Lizakuzondwa yibo bonke ngenxa yebizo lami, kodwa ophikelelayo kuze kube sekupheleni nguye ozakusiliswa.

¹⁴ Kodwa nxa libona amanyala encithakalo emi lapho angafanele khona — ofundayo kaqedisise — kung’khona labo abaseJudiya kababalekele entabeni,

¹⁵ ophezu kwendlu angehli, angangeni ukuthatha ulutho endlini yakhe,

¹⁶ lowo osemasimini angabuyeli emuva ukuyathatha ingubo yakhe.

¹⁷ Maye kwabakhulelweyo labamunyisayo ngalezonsuku!

¹⁸ Khulekani ukuba kungabi ebusika.

¹⁹ Ngoba ngalezonsuku kuzakuba khona ukuhlupheka okungazanga kube khona ekuqaleni kokudabuka okwadatshulwa nguNkulunkulu kuze kube khathesi, lokungasayikuba khona.

²⁰ Uba iNkosi ibingazifinyezanga insuku, bekungesiliswe muntu; kodwa izifinyezile ngenxa yabakhethiweyo ebakhethileyo.

²¹ Kung’khonake nxa umuntu esithi kini: Khangelani, nangu uKristu; ingabe: Khangelani, nanguyana; lingakholwa.

²² Kuzavela okristu bamanga labaprofethi bamanga, benze izibonakaliso lezimangaliso, ukuze kuthi nxa kungenzeka baduhise abakhethiweyo.

²³ Kodwa qaphelani lina; sengilitshelile konke ngaphambili.

²⁴ Kodwa ngalezonsuku emva kwalokhokuhlupheka ilanga lizakufiphala, lenyanga kayiyikukhanya,

²⁵ inkanyezi zizabe zisiwa ezulwini, lamandla asezulwini azakuzanyazanyiswa.

²⁶ Kung’khonake bazakubona iNdodana yomuntu isiza emayezini, ilamandla amakhulu lenkazimulo,

²⁷ izakuthuma izithunywa zayo, iqoqe abakhethiweyo bayo emimoyeni emine, kusukela emikhawulweni yomhlaba kuze kube semikhawulweni yezulu.

²⁸ Fundani umfanekiso emkhiweni, lapho ugatsha lwawo selubuthakathaka, luhlume amahlamvu, liyazi ukuba ihlobo seliseduze.

²⁹ Kunjalo lani, nxa libona lezizinto zisenzeka, yazini ukuba kuseduze kusemnyango.

³⁰ Ngiqinisile ngithi kini: Lesisizukulwana kasiyikudlula, zingakenzeki izinto zonke lezi.

³¹ Kuzakudlula izulu lomhlaba, kodwa amazwi ami kawayikudlula.

³² Kodwa lolosuku lalesosikhathi kakho umuntu owaziyo ngaso, kanye lezithunywa zasezulwini, leNdodana, kodwa nguBaba kuphela.

³³ Qaphelani, lilinde, ngoba kalisazi isikhathi ukuthi sizakuba nini.

³⁴ Kunjengomuntu owahambela kwelinye ilizwe; watshiya umuzi wakhe, wanika inceku zakhe amandla, enika leyo laleyo umsebenzi wayo, walaya umlindisango ukuba alinde.

³⁵ Ngakho lindani, ngoba kalazi ukuthi inkosi yomuzi izakufika nini, loba kusihlwa loba phakathi kobusuku, loba ekukhaleni kwenkukhu, ingabe ekuseni,

³⁶ funa ifike ilijume, ilifumane lilele.

³⁷ Lokhu engikutsho kini ngikutsho kubo bonke, ngithi: Lindani.