UMakho 12 - iBhayibhili Elingcwele 1978Umfanekiso wabalimi besivini ( Mat 21:33–46 ; Luka 20:9–19 ) 1 Waqala ukukhuluma labo ngemifanekiso, wathi: Umuntu wahlanyela isivini, wasibiyela ngothango, wemba isikhamelo, wakha idumba, wasiqatshisa kubalimi, wasuka waya kwelinye ilizwe. 2 Ngesikhathi esifaneleyo wathuma inceku kubalimi ukuze yamukele kibo okunye kwezithelo zesivini. 3 Bayibamba, bayitshaya, bayimukisa ize. 4 Wabuya wathuma kubo enye inceku; bayitshaya uduma, bayiphatha kubi. 5 Wathuma enye; yona bayibulala; lezinye ezinengi, ezinye bazitshaya, lezinye bazibulala. 6 Wayesasele lomuntu munye, indodana yakhe ethandekayo; ekucineni wathumela yona kubo, esithi: Bazakuyihlonipha indodana yami. 7 Kodwa labobalimi bakhulumisana, besithi: Le yindlalifa; wozani siyibulale, ilifa libe ngelethu. 8 Bayibamba, bayibulala, bayiphosela ngaphandle kwesivini. 9 Uzakwenza njani umninisivini na? Uzakuza, ababhubhise abalimi, anikele isivini kwabanye. 10 Kalifundanga yini lumbhalo othi: Ilitshe elaliwayo ngabakhi yilo eseliyinhloko yengonsi; 11 lona lavela eNkosini; liyisimanga emehlweni ethu? 12 Basebefuna ukumbamba, kodwa besaba ixuku; ngoba babesazi ukuthi wakhuluma lumfanekiso ngabo. Bamtshiya, bahamba. Umthelo kaKesari ( Mat 22:15–22 ; Luka 20:19–26 ) 13 Bathumela kuye abanye babaFarisi labakaHerodi ukuze bamthiye ekukhulumeni. 14 Beza bathi kuye: Mfundisi, siyazi ukuthi wena uqotho, kawukhathali ngomuntu, ngoba kawunanzi isimo somuntu, kodwa ufundisa indlela kaNkulunkulu ngeqiniso. Kuvunyelwe yini ukuthela kuKesari ingabe atshi? Sithele ingabe singatheli na? 15 Kodwa ekwazi ukuzenzisa kwabo wathi kibo: Lingilingelani na? Lethani kimi imali, ngiyibone. 16 Bayiletha. Wasesithi kibo: Ngokabani lumfanekiso lalumbhalo na? Bathi kuye: NgokaKesari. 17 UJesu wathi kibo: Mnikeni uKesari izinto zikaKesari loNkulunkulu izinto zikaNkulunkulu. Bamangala kakhulu ngaye. Ukuvuka kwabafileyo ( Mat 22:23–33 ; Luka 20:27–40 ) 18 Kwasekusiza kuye abaSadusi abathi kakukho ukuvuka kwabafileyo, bambuza bathi: 19 Mfundisi, uMose wasilobela wathi uba umfowabo womuntu esifa, atshiye umkakhe engatshiyi umntwana, umfowabo kamngene umfazi, amvusele umfowabo inzalo. 20 Kwakulezelamani eziyisikhombisa, owokuqala wathatha umfazi; wafa engatshiyanga inzalo. 21 Owesibili wamngena; wafa laye engatshiyanga inzalo; lowesithathu kwaba njalo. 22 Abayisikhombisa kabatshiyanga inzalo. Ekucineni kwabo bonke kwafa lomfazi. 23 Ekuvukeni kwabafileyo mhla bevukayo uzakuba ngumkabani kubo, lokhu abayisikhombisa babelaye engumkabo, na? 24 UJesu wathi kubo: Kaliduhanga yini ngalokhu ngoba lingayazi imibhalo ingabe amandla kaNkulunkulu na? 25 Ngoba mhla bevukayo ekufeni kabathathani, kabendiswa, kodwa banjengezithunywa zasezulwini. 26 Kodwa mayelana labafileyo ukuthi bayavuswa, kalifundanga yini ogwalweni lukaMose, ngendaba yesihlahla ukuba uNkulunkulu wathi kuye: NginguNkulunkulu kaAbrahama, loNkulunkulu kaIsaka, loNkulunkulu kaJakobe, na? 27 Kasuye uNkulunkulu wabafileyo kodwa ngowabaphilayo. Liduhile kakhulu. Umlayo wokuqala ( Mat 22:34–40 ) 28 Kwafika omunye wababhali esezwile bebuzana, esebonile ukuba ubaphendule kuhle, wambuza wathi: Yiwuphi umlayo wokuqala kuyo yonke na? 29 UJesu wamphendula wathi: Umlayo wokuqala ngowokuthi: Zwana, Israyeli: INkosi uNkulunkulu wethu, iNkosi yinye. 30 Wothanda iNkosi, uNkulunkulu wakho ngenhliziyo yakho yonke, langomoya wakho wonke, langengqondo yakho yonke, langamandla akho wonke. 31 Owesibili yilo: Wothanda umakhelwane wakho njengalokhu uzithanda wena. Kawukho omunye umlayo omkhulu kulale. 32 Umbhali wathi kuye: Yebo, Mfundisi, utsho iqiniso ukuthi yinye, langaphandle kwayo kayikho enye; 33 ukuyithanda ngenhliziyo yonke, langokuqedisisa konke, langamandla wonke, lokuthanda umakhelwane wakho njengalokhu umuntu ezithanda yena kuyedlula yonke iminikelo yokutshiswa lemihlatshelo. 34 UJesu embona ukuba uphendule ngokuqonda, wathi kuye: Kawukhatshana lombuso kaNkulunkulu. Kakwabe kusaba khona umuntu olesibindi sokumbuza. UKristu losendo lwakhe ( Mat 22:41–46 ; Luka 20:41–44 ) 35 UJesu efundisa ethempelini wabuza wathi: Batsho kanjani ababhali ukuthi uKristu uyindodana kaDavida na? 36 UDavida uqobo lwakhe ngoMoya oNgcwele wathi: INkosi yathi eNkosini yami: Hlala ngakwesokunene sami, ngize ngibeke izitha zakho ngaphansi kwenyawo zakho. 37 UDavida uqobo lwakhe umbiza ngokuthi yiNkosi. Pho, uyindodana yakhe njani na? Ixuku elikhulu lamuzwa ngokuthokoza. UJesu usola ababhali ( Mat 23:1–36 ; Luka 11:37–54 ) 38 Ekufundiseni kwakhe wathi: Xwayani ababhali abathanda ukuhamba bembethe ingubo ezinde, lokubingelelwa emidangeni, 39 lezihlalo ezingaphambili emasinagogeni, lendawo eziphakemeyo ekudleni, 40 abadla izindlu zabafelwakazi, bekhuleka isikhathi eside ngokuzenzisa; laba bazakwamukeliswa ukulahlwa okukhulu. Umnikelo womfelwakazi ( Luka 21:1–4 ) 41 UJesu wahlala phansi maqondana lesitsha somnikelo, wabona ukuba ixuku liphosela njani imali esitsheni. Abanothileyo abanengi baphosela okunengi kakhulu. 42 Kwafika umfelwakazi ongumyanga, waphosela inhlamvana ezimbili zemali ezenza indibilitshi. 43 Wasebiza abafundi bakhe, wathi kubo: Ngiqinisile ngithi kini: Lumfelwakazi ongumyanga uphosele ukwedlula bonke laba abaphoseleyo esitsheni, 44 ngoba bonke baphosele ngokunotha kwabo, kodwa yena ebuyangeni bakhe uphosele konke alakho, konke abephila ngakho. |
Bible Society of Zimbabwe 1978
Bible Society of Zimbabwe