UMakho 10 - iBhayibhili Elingcwele 1978

Ukuhlalisana kwabathetheneyo

¹ Wasuka lapho, weza emikhawulweni yaseJudiya langaphetsheya kweJordani; amaxuku abuya abuthana kuye, waphinda ukubafundisa njengokujwayela kwakhe.

² Kweza kuye abaFarisi, bambuza ukuthi kuvunyelwe yini ukuba indoda ilahle umkayo, bemlinga.

³ Wabaphendula wathi kubo: UMose walilaya ngokuthini na?

⁴ Bathi: UMose wavuma ukuba kulotshwe incwadi yesahlukaniso, alahlwe.

⁵ UJesu wathi kibo: Ngenxa yobulukhuni benhliziyo yenu walilobela lumlayo.

⁶ Kodwa kusukela ekuqaleni kokudatshulwa komhlaba uNkulunkulu wabenza owesilisa lowesifazana.

⁷ Ngenxa yalokhu umuntu uzakutshiya uyise lonina, anamathele kumkakhe;

⁸ labo ababili bazakuba nyamanye; ngakho kabasebabili, kodwa sebenyamanye.

⁹ Ngakho lokho uNkulunkulu akuhlanganisileyo kakungahlukaniswa ngumuntu.

¹⁰ Bathi sebesendlini abafundi bakhe babuya bambuza ngalokhu.

¹¹ Wathi kubo: Ilowo lalowo olahla umkakhe, athathe omunye, uyafeba kuye.

¹² Laye, uba elahla indoda yakhe, endele kwenye, uyafeba.

Ukubusiswa kwabantwana

¹³ Baletha abantwana kuye ukuba abaphathe; kodwa abafundi babakhuza.

¹⁴ Kodwa uJesu ekubona lokhu wathukuthela, wathi kubo: Vumelani abantwana beze kimi, lingabanqabeli, ngoba umbuso kaNkulunkulu ungowabanje.

¹⁵ Ngiqinisile ngithi kini: Ilowo lalowo ongamukeli umbuso kaNkulunkulu njengomntwana kasoze angene kuwo.

¹⁶ Wabagona, wabeka izandla zakhe phezu kwabo, wababusisa.

Insizwa enothileyo

¹⁷ Esephumela endleleni umuntu othile wamgijimela, eguqa phambi kwakhe, wambuza wathi: Mfundisi olungileyo, ngizakwenzani ukuze ngidle ilifa lokuphila okungapheliyo?

¹⁸ UJesu wathi kuye: Ungibizelani uthi ngingolungileyo na? Kakho olungileyo ngaphandle kukaNkulunkulu yedwa.

¹⁹ Uyayazi imilayo ethi: Ungabulali, ungafebi, ungebi, ungafakazi amanga, ungadlelezeli, hlonipha uyihlo lonyoko.

²⁰ Wamphendula wathi kuye: Mfundisi, konke lokhu ngikugcinile kusukela ebutsheni bami.

²¹ UJesu emkhangela, wamthanda, wathi kuye: Usaswele ulutho lunye; hamba uthengise konke olakho, uphe abayanga, uzakuba lenotho ezulwini; uze ungilandele.

²² Wanyukumala ngalelilizwi, wasuka wahamba edanile, ngoba wayelenotho enengi.

²³ UJesu wathalaza, wathi kubafundi bakhe: Kuzakuba lukhuni kangakanani kwabalenotho ukungena embusweni kaNkulunkulu.

²⁴ Abafundi bamangala ngamazwi akhe. UJesu wabuya wakhuluma, wathi kubo: Bantwana, kulukhuni kangakanani kwabathemba inotho ukungena embusweni kaNkulunkulu.

²⁵ Kulula ukuba ikamela lingene ngentunja yosungulo kulokuba umuntu onothileyo angene embusweni kaNkulunkulu.

²⁶ Bamangala kakhulu, bakhulumisana bathi: Pho, kungasiliswa bani na?

²⁷ UJesu wabakhangela wathi: Kubantu kakulakwenzeka, kodwa kuNkulunkulu kakunjalo; ngoba zonke izinto ziyenzeka kuNkulunkulu.

Umvuzo wokuzidela

²⁸ UPetro wasuka wathi kuye: Khangela, thina sitshiye konke, sakulandela.

²⁹ UJesu wathi: Ngiqinisile ngithi kini: Kakukho muntu otshiye indlu labafowabo lodadewabo lonina loyise labantwana, ingabe amasimu ngenxa yami langenxa yevangeli,

³⁰ ongayikwamukeliswa ngekhulu, khathesi ngalesisikhathi izindlu labafowabo lodadewabo labonina labantwana lamasimu kanye lenhlupheko, lasesikhathini esizayo ukuphila okungapheliyo.

³¹ Kodwa abanengi abokuqala bazakuba ngabokucina, labokucina babe ngabokuqala.

UJesu ukhuluma futhi ngokufa lokuvuka kwakhe

³² Babesendleleni besenyukela eJerusalema: uJesu wayehamba phambi kwabo; bamangala, lalabo ababelandela besaba. Wasethatha futhi abalitshumi lambili, waqala ukubatshela okuzamehlela,

³³ wathi: Khangelani, senyukela eJerusalema; iNdodana yomuntu izakunikelwa kubapristi abakhulu lakubabhali; bazakuyigwebela ukufa, bayinikele kwabezizwe;

³⁴ bazakuyiyangisa, bayikhafulele ngamathe, bayitshaye, bayibulale, kodwa emva kwensuku ezintathu izakuvuka.

UJesu ukhuza amadodana kaZebediya

³⁵ Kweza kuye uJakobe loJohane amadodana kaZebediya, bathi kuye: Mfundisi, sithanda ukuba usenzele lokho esizakukucela.

³⁶ Wathi kubo: Lithanda ukuba ngilenzeleni na?

³⁷ Bathi kuye: Siphe ukuba omunye ahlale ngakwesokunene sakho, lomunye ngakwesokhohlo sakho ebukhosini bakho.

³⁸ UJesu wathi kubo: Kalikwazi elikucelayo. Linganatha yini inkezo engiyinathayo mina, ingabe libhaphathizwe ngobhaphathizo engibhaphathizwa ngalo mina na?

³⁹ Bathi kuye: Singakwenza. UJesu wathi kubo: Inkezo engiyinathayo mina lizakuyinatha, lizakubhaphathizwa ngobhaphathizo engibhaphathizwa ngalo mina;

⁴⁰ kodwa ukuhlala ngakwesokunene sami ingabe ngakwesokhohlo sami kayisikho kwami ukuphana ngakho, kodwa kungokwalabo abakulungiselweyo.

Ubukhulu obuqotho

⁴¹ Sebekuzwile lokhu abalitshumi, baqala ukuthukuthela ngoJakobe loJohane.

⁴² UJesu wasebabiza, wathi kibo: Liyazi ukuthi labo okuthiwa babusa izizwe bazibusa ngokulukhuni, lezikhulu zabo zisebenzisa amandla phezu kwazo.

⁴³ Kodwa kakunjalo phakathi kwenu, kodwa yilowo lalowo othanda ukuba ngomkhulu phakathi kwenu kabe ngumfokazi wenu,

⁴⁴ lalowo othanda ukuba ngowokuqala phakathi kwenu kabe yinceku yabo bonke.

⁴⁵ Ngoba leNdodana yomuntu kayizanga ukukhonzwa, kodwa ukukhonza lokunika ukuphila kwayo, kube lihlawulo labanengi.

UBartimewu isiphofu

⁴⁶ Bafika eJeriko. Kwathi esephuma eJeriko labafundi bakhe lexuku elikhulu, uBartimewu indodana kaTimewu, umphanzi oyisiphofu, wayehlezi endleleni.

⁴⁷ Kwathi esezwile ukuthi nguJesu waseNazaretha, waqala ukumemeza wathi: Jesu, Ndodana kaDavida, akungihawukele!

⁴⁸ Abanengi bamkhuza, bathi kathule; kodwa kwang’khona ememeza kakhulu, esithi: Ndodana kaDavida, akungihawukele!

⁴⁹ UJesu wasesima, wathi: Mbizeni. Basibiza isiphofu, besithi kuso: Mana isibindi, sukuma, uyakubiza.

⁵⁰ Salahla ingubo yaso, sasukuma sathi lothu, saya kuJesu.

⁵¹ UJesu wathi kuso: Ufuna ukuba ngikwenzeleni na? Isiphofu sathi kuye: Mfundisi, ukuba ngibone.

⁵² UJesu wathi kuso: Hamba; ukukholwa kwakho kukusilisile. Sabona khona lapho, samlandela endleleni.