ULukha 9 - iBhayibhili Elingcwele 1978Ukuthunywa kwabaphostoli ( Mat 10:5–15 ; Mark 6:7–13 ) 1 Wabizela ndawonye abalitshumi lambili, wabanika amandla phezu komoya ababi bonke lamandla okusilisa izifo. 2 Wabathuma ukutshumayela umbuso kaNkulunkulu lokusilisa. 3 Wathi kibo: Lingaphathi lutho lwendlela, lodondolo, lesikhwama, lomphako, lemali, lingabi lengubo ezimbili. 4 Lakuyiphi indlu elingena kuyo, hlalani lapho, lize lisuke. 5 Bonke abangalamukeliyo, nxa lisuka kulowomuzi, thintithani uthuli enyaweni zenu, kube yibufakazi ngabo. 6 Basukake, bahamba bedabula imizi betshumayela ivangeli, besilisa endaweni zonke. Ukubulawa kukaJohane uMbhaphathizi ( Mat 14:1–2 ; Mark 6:14–16 ) 7 Kwathi uHerodi umbusi ekuzwa konke okwenzekayo, wadideka ngokutsho kwabanye ukuthi uJohane uvukile kwabafileyo, 8 langokwabanye ukuthi uElija ubonakele, langokwabanye ukuthi kuvukile omunye wabaprofethi abadala. 9 Kodwa uHerodi wathi: UJohane ngamquma ikhanda mina; kodwa ngubani lo engizwa ngaye okunje na? Wafuna ukumbona. UJesu usuthisa amadoda azinkulungwane ezinhlanu ( Mat 14:13–21 ; Mark 6:30–44 ; Joha 6:1–13 ) 10 Abaphostoli sebebuyile bambikela konke abakwenzileyo. Wabathatha, wahamba labo bebodwa waya emzini othiwa iBetsayida. 11 Kwathi amaxuku esezwile amlandela; wawathakazelela, wakhuluma lawo ngombuso kaNkulunkulu, wabasilisa labo abadinga ukusiliswa. 12 Seliqala ukutshona, abalitshumi lambili beza, bathi kuye: Adabulele amaxuku ukuba aye emizini lasemaphandleni azingelezileyo angenise khona, azuze ukudla, ngoba sisenkangala lapha. 13 Kodwa yena wathi kibo: Bapheni lina ukudla. Bathike: Esilakho yizinkwa ezinhlanu lenhlanzi ezimbili kuphela ngaphandle kokuba siyebathengela ukudla bonke lababantu. 14 Ngoba kwakukhona amadoda angaba zinkulungwane ezinhlanu. Wasesithi kubafundi bakhe: Bahlaliseni phansi ngezigaba ngamatshumi amahlanu. 15 Benza njalo, babahlalisa phansi. 16 Ethatha izinkwa ezinhlanu lenhlanzi ezimbili, wakhangela ezulwini, wabonga, wazihlephula, wazinika abafundi ukuba balabele ixuku. 17 Badla, basutha bonke, kwabuthwa imvuthuluka eyasala kubo izitsha ezilitshumi lambili. Isivumo sokukholwa sikaPetro. UJesu ukhuluma ngokufa lokuvuka kwakhe ( Mat 16:13–23 ; Mark 8:27–33 ) 18 Kwathi ekhuleka ekusithekeni, abafundi babelaye; wababuza esithi: Abantu bathi ngingubani na? 19 Baphendula bathi: Bathi unguJohane uMbhaphathizi. Kodwa abanye bathi: UnguElija. Abanye bathi: Kuvukile omunye wabaprofethi abadala. 20 Wasesithi kibo: Linake lithi ngingubani na? UPetro waphendula wathi: UnguKristu kaNkulunkulu. 21 Wabalayisisa ukuba bangatsheli muntu lokhu. 22 Wathi: INdodana yomuntu imele ihlupheke kakhulu, idelwe ngabadala labapristi abakhulu lababhali, ibulawe, ivuswe ngosuku lwesithathu. Ukuhlutshwa kukaJesu lokwabamlandelayo ( Mat 16:24–28 ; Mark 8:34—9:1 ) 23 Wasesithi kubo bonke: Uba umuntu ethanda ukungilandela, kazidele, athathe isiphambano sakhe insuku ngensuku, angilandele. 24 Ngoba ilowo lalowo othanda ukusilisa ukuphila kwakhe kuzakumlahlekela; kodwa olahlekelwa yikuphila kwakhe ngenxa yami uzakukusilisa. 25 Ngoba kuzakumsizani umuntu ukuzuza umhlaba wonke, kuthi yena uqobo lwakhe azone azilahle na? 26 Ngoba ilowo lalowo olenhloni ngami langamazwi ami, iNdodana yomuntu izakuba lenhloni ngaye, lapho isiza enkazimulweni yayo lenkazimulweni kaYise leyezithunywa ezingcwele. 27 Kodwa ngilitshela iqiniso ukuthi bakhona abanye kwabemiyo lapha abangayikuzwa ukufa, baze babone umbuso kaNkulunkulu. Ukukhazimuliswa kukaJesu entabeni ( Mat 17:1–8 ; Mark 9:2–8 ) 28 Kwathi emva kwalawomazwi kungaba zinsuku ezificaminwembili wathatha uPetro, loJohane, loJakobe, wakhwela entabeni ukuyakhuleka. 29 Kwathi ekukhulekeni kwakhe isimo sobuso bakhe saphenduka, lengubo zakhe zacwazimula, zaba mhlophe. 30 Kwasekukhuluma laye amadoda amabili ayenguMose loElija; 31 abonakala ngenkazimulo, akhuluma ngokusuka kwakhe ayezakukuphelelisa eJerusalema. 32 UPetro lababelaye babebanjwe yibuthongo; kodwa sebephapheme babona inkazimulo yakhe lamadoda amabili ayemi laye. 33 Kwathi ekwahlukaneni kwawo laye uPetro wathi kuJesu: Nkosi, kuhle ukuba sibe lapha; asakhe amadumba amathathu, elinye libe ngelakho, elinye libe ngelikaMose, lelinye libe ngelikaElija. Wayengakwazi akutshoyo. 34 Esakhuluma lokhu, kwafika iyezi, labasibekela; besaba ekungeneni kwabo eyezini. 35 Kwezwakala ilizwi eyezini lisithi: Le yiNdodana yami ekhethiweyo; zwanini yona. 36 Kwathi selikhulumile ilizwi, uJesu wafunyanwa eyedwa. Bathula, kabaze batshela umuntu kulesosikhathi ngalezozinto abazibonileyo. Ukusiliswa komfana owayelesithuthwane ( Mat 17:14–18 ; Mark 9:14–27 ) 37 Kwathi ngakusasa sebehlile entabeni, ixuku elikhulu labahlangabeza. 38 Indoda yasexukwini yamemeza isithi: Mfundisi, ngiyakuncenga akuhawukele indodana yami, ngoba yiyo yodwa engumntanami. 39 Khangela, umoya uyayibamba, ibisiklabalala; uyihlukuze ize ikhihlize amagwebu, uyidabule, uphume nzima kuyo. 40 Ngicele abafundi bakho ukuba bamkhuphe, kodwa behluleka. 41 UJesu waphendula wathi: O sizukulwana esingakholwayo lesiphambeneyo, koze kube nini ngilani, ngilibekezelela na? Ilethe lapha indodana yakho. 42 Kuthe isiza, umoya omubi wayidabula wayihlukuza; kodwa uJesu wawukhuza umoya omubi, wamsilisa umfana, wambuyisela kuyise. UJesu ukhuluma futhi ngokuhlupheka kwakhe ( Mat 17:22–23 ; Mark 9:30–32 ) 43 Bonke bamangaliswa yibukhulu bukaNkulunkulu. Besamangele bonke ngakho konke akwenzileyo, wathi kubafundi bakhe: 44 Lamazwi kawangene azike endlebeni zenu, ukuthi iNdodana yomuntu izakunikelwa ezandleni zabantu. 45 Kodwa kabaqedisisanga lawomazwi, ayefihlakele kibo, ukuze bangawaqedisisi; besaba ukumbuza ngalawomazwi. UJesu ufundisa ngokuthobeka ( Mat 18:1–5 ; Mark 9:33–37 , 38–40 ) 46 Kwavela ukuphikisana phakathi kwabo kokuthi ngubani ongahle abe mkhulu kubo. 47 Kwathi uJesu ebona imicabango yenhliziyo zabo, wathatha umntwana, wammisa phansi kwakhe. 48 Wathi kubo: Ilowo lalowo owamukela lumntwana ngebizo lami wamukela mina; owamukela mina wamukela ongithumileyo; ngoba omncinyane kini lonke nguye omkhulu. 49 UJohane waphendula wathi: Nkosi, sabona umuntu ekhupha omoya ababi ngebizo lakho, samnqabela ngoba engakulandeli kanye lathi. 50 Kodwa uJesu wathi kuye: Lingamnqabeli, ngoba ongamelani lani ungakini. UJesu uyasuka aye eJerusalema 51 Kwathi sezizakuphelela insuku zokwenyuka kwakhe, wakhangelisa ubuso bakhe eJerusalema. 52 Wathuma izithunywa ngaphambi kwakhe. Zahamba, zangena emzini wamaSamariya ukuba zimlungisele. 53 Kodwa kawamamukelanga, ngoba ubuso bakhe babukhangele eJerusalema. 54 Kwathi abafundi bakhe uJakobe loJohane bekubona lokhu, bathi: Nkosi, uyathanda ukuba sibize umlilo wehle ezulwini, ubaqothule na? 55 Kodwa waphenduka, wabakhuza; 56 badlulela komunye umuzi. Ukulandela uJesu ( Mat 8:18–22 ) 57 Kwathi behamba endleleni, umuntu othile wathi kuye: Ngizakukulandela, loba kungaphi lapho uya khona. 58 UJesu wathi kuye: Amakhanka alemilindi, lenyoni zaphezulu zilezidleke, kodwa iNdodana yomuntu kayilandawo lapho ingaqamelisa khona ikhanda layo. 59 Wasesithi komunye: Ngilandela. Kodwa yena wathi: Nkosi, ngivumela ukuba ngiyembela ubaba kuqala. 60 Kodwa wathi kuye: Yekela abafileyo bambele abafileyo babo, kodwa wena hamba, utshumayele umbuso kaNkulunkulu. 61 Omunye wathi: Ngizakukulandela, Nkosi, kodwa ngivumela ukuba ngiyevalelisa abasekhaya kuqala. 62 Kodwa uJesu wathi kuye: Kakho othi esebeke isandla sakhe ekhubeni, akhangele emuva, ofanele umbuso kaNkulunkulu. |
Bible Society of Zimbabwe 1978
Bible Society of Zimbabwe