ULukha 8 - iBhayibhili Elingcwele 1978

Abesifazana abasiza uJesu ngempahla yabo

¹ Emva kwalokho wadabula imizi lemizana etshumayela ememezela ivangeli lombuso kaNkulunkulu. Babelaye abalitshumi lambili

² kanye labesifazana abathile ababesiliswe kubomoya ababi lasemikhuhlaneni, uMariya othiwa nguMagadalena, okwakhutshwa kuye omoya ababi abayisikhombisa,

³ loJowana umkaKuza induna kaHerodi, loSusana, labanye abanengi, ababebasiza ngempahla yabo.

Umfanekiso womhlanyeli

⁴ Sekubuthene kuye ixuku elikhulu livela emizini ngemizi, wakhuluma ngemifanekiso,

⁵ wathi: Umhlanyeli waphuma ukuyahlanyela inhlanyelo yakhe. Kwathi ekuhlanyeleni enye yawela endleleni; yanyathelwa ngenyawo, inyoni zaphezulu zayidobha, zayiqeda.

⁶ Enye yawela edwaleni; kwathi ekukhuleni, yahanguka, ngoba yaswela ubulunama.

⁷ Enye yawela emeveni, ameva amila layo, ayiminyanisa.

⁸ Enye yawela emhlabathini omuhle; yakhula, yathela ikhulu. Esetshilo lokhu wamemeza wathi: Olendlebe zokuzwa akezwe.

Ukuchasiswa komfanekiso womhlanyeli

⁹ Abafundi bakhe bambuza ukuba utsho ukuthini lumfanekiso.

¹⁰ Wathi: Lina liphiwe ukwazi imfihlakalo yombuso kaNkulunkulu, kodwa abanye bakuphiwa ngemifanekiso ukuze babone bangabonisisi, bezwe bangaqedisisi.

¹¹ Umfanekiso utsho lokhu: Inhlanyelo iyilizwi likaNkulunkulu.

¹² Abangasendleleni yilabo abathi sebezwile, besekufika uSathane, alisuse ilizwi enhliziyweni zabo ukuze bangakholwa, basiliswe.

¹³ Abasedwaleni yilabo abathi belizwile ilizwi, balamukele ngokuthokoza; kodwa laba kabalampande, bayakholwa okwesikhatshana nje, kuthi ngesikhathi sokulingwa bawe.

¹⁴ Okuwele phakathi kwameva yilabo abathi sebezwile, bahambe, baminyaniswe yikuphisekela inotho lenkanuko yokusila, bangatheli izithelo ezivuthiweyo.

¹⁵ Okusemhlabathini omuhle yilabo abathi belizwile ilizwi, balibambe ngenhliziyo enhle lelungileyo, bathele izithelo ngokubekezela.

Umfanekiso wesibane

¹⁶ Kakho othi eselumathise isibane, asimbomboze ngesitsha ingabe asibeke ngaphansi kwethala, kodwa usibeka esiqobaneni, ukuze abangenayo babone ukukhanya.

¹⁷ Ngoba kakukho okufihliweyo okungayikubonakaliswa, lokuthukuziweyo okungayikulethwa ekukhanyeni.

¹⁸ Ngakhoke qaphelisani ukuba lizwa kanjani; ngoba ilowo lalowo olakho uzakuphiwa; kodwa lowo ongelakho uzakwamukwa lalokho athi ulakho.

Izihlobo zikaJesu eziyizo

¹⁹ Kwafika kuye unina labafowabo, kodwa bahluleka ukufinyelela kuye ngenxa yexuku.

²⁰ Wabikelwa ukuthi: Unyoko labafowenu bemi ngaphandle bafuna ukukubona.

²¹ Kodwa wathi kibo: Umama labafowethu yilabo abalizwayo ilizwi likaNkulunkulu, balenze.

Ukuthuliswa kwesiphepha

²² Kwathi ngolunye usuku wangena emkolweni, yena kanye labafundi bakhe, wathi kubo: Asiwelele ngaphetsheya kolwandle. Basukake.

²³ Kwathi besahamba ngomkolo, walala ubuthongo. Kwavuka olwandle isiphepha esikhulu somoya, umkolo wagcwala amanzi, babesengozini.

²⁴ Basondela, bamvusa besithi: Nkosi, Nkosi, siyabhubha! Wasevuka, wakhuza umoya lamavinqo amakhulu. Kwaqamuka, kwathula kwathi zwi.

²⁵ Wathi kubo: Kungaphi ukukholwa kwenu na? Besaba, bamangala, bakhulumisana besithi: Kambe ungubani lo ukuba alaye umoya lamanzi, kumlalele na?

Ukukhutshwa komoya ababi

²⁶ Basebefika elizweni lamaGerasene eliqondene leGalili.

²⁷ Esephumele emhlabathini, wahlangabezwa yindoda ethile yomuzi eyayilabomoya ababi; kwasekuyisikhathi ingambathi ingubo ingahlali endlini, kodwa ihlala emalibeni.

²⁸ Kwathi imbona uJesu yamemeza, yawa phansi phambi kwakhe, yathi ngelizwi elikhulu: Ngilani lawe Jesu, Ndodana kaNkulunkulu oPhezukonke? Ngiyakuncenga, ungangihluphi.

²⁹ Ngoba walaya umoya omubi ukuba aphume kulowomuntu. Ngoba wayesembambe kanengi; walindwa ebotshiwe ngamaketane lezibopho; kodwa eseqamule izibopho, waqhutshelwa ngumoya omubi enkangala.

³⁰ UJesu wambuza wathi: Ungubani ibizo lakho na? Wathi: NginguLegiyoni. Ngoba omoya ababi abanengi babengenile kuye.

³¹ Bamncenga ukuba angabalayi ukuya emgodini ongelamkhawulo.

³² Kwakukhona lapho umhlambi omkhulu wengulube usidla ewatheni lentaba. Bamncenga ukuba abavumele bangene kuzo; wabavumela.

³³ Kwathi omoya ababi sebephumile kulowomuntu, bangena engulubeni, umhlambi waphaphathekela eliweni, waphoseka olwandle, waminzwa.

³⁴ Kwathi ababezalusile bebona okwenzekileyo, babaleka, bakubika emzini lasemaphandleni.

³⁵ Abantu baphuma ukuyabona okwenzekileyo, bafika kuJesu, bamfumana lowomuntu okwakhutshwa kuye omoya ababi ehlezi ngasenyaweni zikaJesu embethe, eqonda; besaba.

³⁶ Ababekubonile babatshela ukuba usile kanjani owayengenwe ngomoya ababi.

³⁷ Abantu bonke bakulelo ilizwe lamaGerasene bamncenga ukuba asuke kibo, ngoba behlelwa yikwesaba okukhulu. Wasengena emkolweni, waphindela emuva.

³⁸ Kodwa leyondoda ebekukhutshwe kuyo omoya ababi yamncenga ukuba ibe laye; kodwa wayithuma esithi:

³⁹ Buyela kini, ulandise ukuba kungakanani uNkulunkulu akwenzele khona. Wasuka wahamba etshumayela phakathi komuzi wonke ngokuthi kungakanani abekwenzelwe nguJesu.

Indodakazi kaJayirosi ivuswa ekufeni. Owesifazana olomopho uyasiliswa

⁴⁰ Kwathi ekubuyeni kwakhe uJesu, ixuku lamthakazelela; ngoba bonke babemlindele.

⁴¹ Kwafika indoda, ethiwa nguJayirosi, engumphathi wesinagoge, yawa phansi ngasenyaweni zikaJesu, yamncenga ukuba angene endlini yayo.

⁴² Ngoba yayilendodakazi eyodwa eyayingaba leminyaka elitshumi lambili, eyayisisifa. Esahamba, ixuku lamcindezela.

⁴³ Owesifazana owayelomopho iminyaka elitshumi lambili, engelakusiliswa ngumuntu,

⁴⁴ weza ngemva kwakhe, wathinta umphetho wengubo yakhe; kwahle kwakhawula ukugobhoza kwegazi.

⁴⁵ UJesu wathi: Ngubani ongithintileyo na? Kwathi lapho bephika bonke, uPetro lababelaye bathi kuye: Nkosi, ixuku likuminyanisile likucindezele.

⁴⁶ Kodwa uJesu wathi: Ukhona ongithintileyo, ngoba ngizwile ukuthi amandla aphumile kimi.

⁴⁷ Owesifazana ebona ukuthi kalakufihlakala, weza ethuthumela, wawa phambi kwakhe; walandisa phambi kwabantu bonke ukuthi umthinteleni lokuthi uhle wasila khona lapho.

⁴⁸ Wathi kuye: Dade, ukukholwa kwakho kukusilisile; hamba kuhle.

⁴⁹ Esakhuluma, kwafika umuntu evela endlini yomphathi wathi: Indodakazi yakho isifile; ungabe usamhlupha uMfundisi.

⁵⁰ Kodwa uJesu ekuzwa lokhu wamphendula wathi: Ungesabi, kholwa kuphela, izakusila.

⁵¹ Esefikile endlini kavumanga ukuba kungene umuntu kanye laye, kuphela uPetro, loJohane, loJakobe, loyise lonina wentombazana.

⁵² Babekhala bonke beyililela. Kodwa wathi: Lingakhali; kayifanga, kodwa ilele.

⁵³ Bamhleka ulunya, besazi ukuthi ifile.

⁵⁴ Yena eyibamba ngesandla, wamemeza esithi: Ntombazana, vuka!

⁵⁵ Wabuya umoya wayo, yavuka khona lapho. Walaya ukuba inikwe ukudla.

⁵⁶ Abazali bayo bamangala; kodwa wabalaya ukuba bangatsheli muntu okwenzekileyo.