ULukha 7 - iBhayibhili Elingcwele 1978

Ukusiliswa kwenceku yenduna

¹ Kwathi eseqedile ukukhuluma amazwi akhe wonke ebantwini, wangena eKapenawume.

² Inceku yenduna yekhulu eyayithandeka kuyo yayigula, isizakufa.

³ Induna isizwile ngoJesu yathumela kuye abadala babaJuda, imcela ukuba eze asilise inceku yayo.

⁴ Kwathi sebefikile kuJesu bamncenga kakhulu, besithi: Ifanele ukuba uyenzele lokhu,

⁵ ngoba iyasithanda isizwe sakithi; yiyo eyasakhela isinagoge.

⁶ UJesu wasehamba labo. Eseseduze lendlu, induna yekhulu yathumela abangane isithi kuye: Nkosi, ungazikhathazi, ngoba kangifanele ukuba ungene ngaphansi kophahla lwami.

⁷ Ngakho angizibonanga ukuthi ngifanele ukuza kuwe; kodwa tshono ilizwi nje, inceku yami izakusila.

⁸ Ngoba lami ngingumuntu ongaphansi komthetho, ngilamabutho ngaphansi kwami. Ngithi kwelinye: Hamba; lihambe. Lakwelinye ngithi: Woza; lize. Lencekwini yami ngithi: Yenza lokhu; ikwenze.

⁹ Kwathi uJesu ekuzwa lokhu wamangala ngayo, waphenduka, wathi exukwini elimlandelayo: Ngithi kini, angizanga ngifumane ukukholwa okunje lakoIsrayeli.

¹⁰ Ababethunyiwe sebebuyele ekhaya bafumana inceku isisilile.

Ukuvuswa kwendodana yomfelwakazi waseNayini

¹¹ Emva kwalokho waya emzini othiwa iNayini; kwahamba laye abafundi bakhe lexuku elikhulu.

¹² Esesondela esangweni lomuzi, wabona abantu bethwele umuntu ofileyo, indodana eyodwa kanina, yena engumfelwakazi; lexuku elikhulu lomuzi lalihamba laye.

¹³ Yathi iNkosi imbona, yamhawukela, yathi kuye: Ungakhali.

¹⁴ Yasondela, yathinta ithala; labalithweleyo basebesima. Yathi: Jaha, ngithi kuwe: Vuka!

¹⁵ Ofileyo wavuka, waqala ukukhuluma; yamnika unina.

¹⁶ Behlelwa yikwesaba bonke, bamdumisa uNkulunkulu, besithi: Kuvele umprofethi omkhulu phakathi kwethu; lokuthi: UNkulunkulu uhambele abantu bakhe.

¹⁷ Lelilizwi ngoJesu laphumela kulo lonke elaseJudiya lakuyo yonke indawo yakhona.

UJesu loJohane uMbhaphathizi

¹⁸ Abafundi bakaJohane bambikela ngazo zonke lezizinto.

¹⁹ UJohane wasebiza ababili kubafundi bakhe, wabathuma eNkosini, esithi: Wena, unguye ozayo, ingabe silindele omunye na?

²⁰ Amadoda esefikile kuyo athi: UJohane uMbhaphathizi usithumile kuwe, esithi: Wena, unguye ozayo, ingabe silindele omunye na?

²¹ Ngalesosikhathi uJesu wayesilisa abanengi ezifweni lasemikhuhlaneni lakubomoya ababi; labayiziphofu abanengi wabapha ukubona.

²² Wawaphendula wathi: Hambani limtshele uJohane lokho elikubonileyo lelikuzwileyo ukuthi iziphofu ziyabona, iziqhuli ziyahamba, abalobulephero bayahlanjululwa, labangezwayo bayezwa, labafileyo bayavuswa, labayanga bayatshunyayezwa ivangeli.

²³ Ubusisiwe ongakhubekiyo ngami.

²⁴ Kwathi sezihambile izithunywa zikaJohane, uJesu waqala ukukhuluma lamaxuku ngoJohane esithi: Laphuma laya enkangala ukuyabonani na? Umhlanga onyikinywa ngumoya na?

²⁵ Kambe laphumela ukuyabonani na? Umuntu owambethe ingubo ezibucwebecwebe na? Khangelani, abambethe ubucwebecwebe besidla okumnandi, basezindlini zamakhosi.

²⁶ Pho, laphumela ukuyabonani na? Umprofethi na? Yebo, ngithi kini: Odlula umprofethi.

²⁷ Nguye okwalotshwa ngaye ukuthi: Khangela, ngiyathuma isithunywa sami phambi kobuso bakho esizakulungisa indlela yakho phambi kwakho.

²⁸ Ngithi kini: Phakathi kwabazelwe ngabesifazana kakho omkhulu kuloJohane; kodwa omncinyane embusweni kaNkulunkulu mkhulu kulaye.

²⁹ Abantu bonke labathelisi bekuzwa lokhu, bamdumisa uNkulunkulu, ngoba basebebhaphathiziwe ngobhaphathizo lukaJohane.

³⁰ Kodwa abaFarisi lezazumlayo balala icebo likaNkulunkulu maqondana labo, ngoba bengabhaphathizwanga nguJohane.

³¹ Phoke, abantu balesisizukulwana ngizakubafanisa lani na? Bafana lani na?

³² Bafana labantwana abahlezi emdangeni bememezana besithi: Salitshayela umhubhe, kalisinanga; salililela, kalikhalanga.

³³ Ngoba uJohane uMbhaphathizi wafika engadli, enganathi wayini; kodwa lathi: Ulomoya omubi.

³⁴ INdodana yomuntu ifikile, isidla, inatha, laselisithi: Khangelani umuntu oyisidli lesinathi, umngane wabathelisi lezoni.

³⁵ Ukuhlakanipha kubonakaliswa ukuthi kulungile ngabantwana bakho bonke.

Owesifazana oyisoni endlini yomFarisi

³⁶ Omunye wabaFarisi wammema ukuba adle laye; esengenile endlini yomFarisi wahlala ekudleni.

³⁷ Kwakukhona owesifazana walowomuzi owayeyisoni; kwathi esezwile ukuthi uJesu usekudleni endlini yomFarisi, weza lomfuma wamagcobo.

³⁸ Wema ngemuva ngasenyaweni zakhe ekhala, waqala ukuthambisa inyawo zakhe ngenyembezi, wazesula ngenwele zekhanda lakhe, wanga inyawo zakhe, wazigcoba ngamagcobo.

³⁹ Kuthe umFarisi obemmemile ekubona lokhu, wanakana wathi: Uba lumuntu ebengumprofethi, ngabe uyamazi ukuba ungumuntu onjani lowesifazana omthintayo, ngoba uyisoni.

⁴⁰ UJesu waphendula wathi kuye: Simoni, kukhona engifuna ukukukhuluma kuwe. Yena waphendula wathi: Khulumake, Mfundisi.

⁴¹ Kwakukhona abantu ababili ababelamacala okweboleka; omunye wayelecala lamadola angamatshumi amahlanu, lomunye elecala lamadola angamahlanu.

⁴² Kwathi bengelakho okokuhlawula, wabayekela bobabili. Kambe nguwuphi kubo ozakumthanda kakhulu na?

⁴³ USimoni waphendula wathi: Ngithi ngulowo owamyekela okukhulu. Wathi kuye: Utsho kuhle.

⁴⁴ Wasephendukela kowesifazana wathi kuSimoni: Uyambona lowesifazana na? Ngingene endlini yakho, kawunginikanga amanzi okugeza inyawo, kodwa yena uzithambisile inyawo zami ngenyembezi zakhe, wazesula ngenwele zakhe.

⁴⁵ Kawunganganga, kodwa yena, lokhu ngingenile, kayekelanga ukwanga inyawo zami.

⁴⁶ Ikhanda lami kawuligcobanga ngamagcobo, kodwa yena ugcobile inyawo zami ngamagcobo.

⁴⁷ Ngenxa yalokhu ngithi kuwe: Izono zakhe ezinengi zithethelelwe, ngoba uthandile kakhulu. Kodwa lowo othethelelwa kancinyane uthanda kancinyane.

⁴⁸ Wasesithi kowesifazana: Zithethelelwe izono zakho.

⁴⁹ Ababehlezi laye ekudleni baqala ukukhulumisana bodwa besithi: Ngubani lo othethelela lezono na?

⁵⁰ Wathi kowesifazana: Ukukholwa kwakho kukusilisile. Hamba kuhle.