ULukha 6 - iBhayibhili Elingcwele 1978

UJesu uchasisa umlayo weSabatha

¹ Kwathi ngeSabatha edabula emasimini abafundi bakhe bakha izikhwebu, badla bezihlikihla ngezandla.

² Kodwa abathile babaFarisi bathi kubo: Lenzelani lokhu okungavunyelwa ngeSabatha na?

³ UJesu waphendula wathi: Kalifundanga yini ngokwenziwa nguDavida mhla elambile yena lababelaye

⁴ ukuthi wangena endlini kaNkulunkulu, wathatha izinkwa ezahlukaniselwe uNkulunkulu ezingavunyelwanga ukudliwa muntu, ngaphandle kwabapristi bodwa, wadla, wanika ababelaye na?

⁵ Wathi kubo: INdodana yomuntu iyiNkosi leyeSabatha.

UJesu usilisa ngeSabatha

⁶ Kwathi ngelinye iSabatha wangena esinagogeni, wafundisa. Kwakukhona umuntu lapho osandla sakhe sokunene sasitshwabhene.

⁷ Ababhali labaFarisi baqaphela ukuba babone ukuthi uzakusilisa ngeSabatha yini, ukuze bazuze izaba lokummangalela.

⁸ Kodwa wayazi imicabango yabo, wathi kuyo indoda elesandla esitshwabheneyo: Sukuma, ume phakathi. Wasukumake, wema.

⁹ UJesu wathi kibo: Ngiyalibuza, kuvunyelwe yini ngeSabatha ukwenza okulungileyo, ingabe ukwenza okungalunganga, ukusilisa ingabe ukubulala na?

¹⁰ Wabathalaza bonke wathi kuye: Yelula isandla sakho. Wenza njalo, lesandla sakhe sasila.

¹¹ Bathukuthela kakhulu, bakhulumisana bodwa ngokuthi bangamenza njani uJesu.

Ukukhethwa kwabaphostoli

¹² Kwathi ngalezonsuku waphuma waya entabeni ukuyakhuleka; wahlala ubusuku bonke ekhuleka kuNkulunkulu.

¹³ Kwathi sekusile, wabiza abafundi bakhe, wakhetha kubo abalitshumi lambili, wabaqamba ngokuthi ngabaphostoli,

¹⁴ uSimoni owamutha ibizo lokuthi nguPetro, loAndreya umfowabo, loJakobe, loJohane, loFiliphu, loBartolomewu,

¹⁵ loMathewu, loTomasi, loJakobe indodana kaAlfewu, loSimoni owayethiwa ngumZelothi,

¹⁶ loJudasi indodana kaJakobe, loJudasi Iskariyothi owamnikelayo.

¹⁷ Wehla labo, wema esigcawini; kwakukhona ixuku elikhulu labafundi bakhe lexuku elikhulu labantu abavela kulo lonke laseJudiya, laseJerusalema, langasolwandle lwaseTire leSidoni, ababezile ukumuzwa lokusiliswa ezifweni zabo;

¹⁸ lalabo ababekhathazwa ngomoya ababi basiliswa.

¹⁹ Ixuku lonke lafuna ukumthinta, ngoba kwaphuma kuye amandla abasilisa bonke.

Ababusiswayo labangabusiswayo

²⁰ Wasekhangela ngakubafundi bakhe, wathi: Libusisiwe lina bayanga, ngoba umbuso kaNkulunkulu ungowenu.

²¹ Libusisiwe lina elilambileyo khathesi, ngoba lizakusuthiswa. Libusisiwe lina abakhalayo khathesi, ngoba lizakuhleka.

²² Libusisiwe, nxa abantu belizonda lanxa belixotshela ngaphandle, belithuka, belidela ibizo lenu ngokungathi libi ngenxa yeNdodana yomuntu.

²³ Thokozani ngalolosuku, leqe ngokuthokoza; ngoba khangelani, umvuzo wenu mkhulu ezulwini; ngoba okhokho babo babesenza njalo kubaprofethi.

²⁴ Kodwa maye kini lina elinothileyo! ngoba selikwamukele ukuthokoziswa kwenu.

²⁵ Maye kini lina elisuthiyo khathesi! ngoba lizakulamba. Maye kini lina elihlekayo khathesi! ngoba lizakulila.

²⁶ Maye kini, nxa abantu bonke bekhuluma kuhle ngani! ngoba okhokho babo babesenza njalo kubaprofethi bamanga.

Ukuthanda izitha

²⁷ Kodwa ngithi kini elizwayo: Thandani izitha zenu, lenze okuhle kwabalizondayo,

²⁸ libusise abalithukayo, likhulekele bona abaliphatha kubi.

²⁹ Okutshaya esihlathini, umphendulele esinye; lokwamuka ingubo yakho, ungali lesigqoko sakho.

³⁰ Umuphe ilowo lalowo ocela kuwe; lokwamuka impahla yakho, ungabuyi uyibize kuye.

³¹ Njengalokho lithanda ukuba abantu benze kini, yenzani njalo kibo.

³² Uba lithanda labo abalithandayo, lilokubongwa bani na? Ngoba lezoni zithanda labo abazithandayo.

³³ Uba lisenza okuhle kulabo abenza okuhle kini, lilokubongwa bani na? Ngoba lezoni zenza njalo.

³⁴ Uba liseboleka labo elithemba ukwamukela kibo, lilokubongwa bani na? Ngoba lezoni zeboleka izoni ukuze zamukele okungakho.

³⁵ Kodwa thandani izitha zenu, lenze okuhle, leboleke, lingalindeli mvuzo; lomvuzo wenu uzakuba mkhulu, libe ngabantwana boPhezukonke, ngoba yena ulobubele kwabangabongiyo lababi.

³⁶ Wobani lesihawu, njengoYihlo ulesihawu.

Ukwahlulela abanye

³⁷ Lingahluleli ukuze lingahlulelwa, lingalahli ukuze lingalahlwa; thethelelani, lani lizakuthethelelwa.

³⁸ Phanini, lani lizakuphiwa; lizakuphiwa esandleni isilinganiso esihle, sigqitshiwe, sahlukuzwa, sigcwele sithe kliki; ngoba ngesilinganiso elilinganisa ngaso lani lizakulinganiselwa ngaso.

³⁹ Wabatshela umfanekiso wokuthi: Isiphofu singakhokhela isiphofu na? Kabayikukhalakathela bobabili emgodini na?

⁴⁰ Umfundi kamkhulu kulomfundisi wakhe; kodwa ilowo lalowo esefundiswe waphelela uzakuba njengomfundisi wakhe.

⁴¹ Ukhangelelani ucezwana oluselihlweni lomfowenu, kodwa ungaluboni ugodo olukwelakho ilihlo na?

⁴² Ungatsho kanjani kumfowenu ukuthi: Mfowethu, kahle ngikhuphe ucezwana oluselihlweni lakho; wena ungaluboni ugodo olukwelakho ilihlo na? Mzenzisi, qala ukhuphe ugodo olukwelakho ilihlo, kubeng’khonake uzakubona kuhle ukukhupha ucezwana oluselihlweni lomfowenu.

⁴³ Kasikho isihlahla esihle esithela isithelo esibi; futhi kasikho isihlahla esibi esithela isithelo esihle.

⁴⁴ Ngoba ileso laleso isihlahla saziwa ngesithelo saso. Kakuselwa umkhiwa emeveni, futhi kakukhiwa isithelo sevini evikaneni.

⁴⁵ Umuntu omuhle uveza okuhle enothweni enhle yenhliziyo yakhe, lomuntu omubi uveza okubi enothweni yakhe embi; ngoba umlomo wakhe ukhuluma ngokugcwala kwenhliziyo.

Umfanekiso wezindlu ezimbili

⁴⁶ Lingibizelani ngokuthi: Nkosi, Nkosi — lingakwenzi engikutshoyo na?

⁴⁷ Yilowo lalowo oza kimi, awezwe amazwi ami, awenze, ngizakulitshengisa lowo afana laye.

⁴⁸ Ufana lomuntu owathi esakha indlu yakhe, wemba watshonisa, wabeka isisekelo phezu kwedwala. Ekufikeni kwempophoma umfula watshaya kuleyondlu, kodwa wawungelamandla okuyinyikinya, ngoba yayakhiwe kuhle.

⁴⁹ Kodwa owezwayo engawenzi, unjengomuntu owakha indlu yakhe emhlabathini, ingelasisekelo; umfula wayitshaya, yahle yawa; kwaba kukhulu ukudilika kwaleyondlu.