ULukha 4 - iBhayibhili Elingcwele 1978

Ukulingwa kukaJesu

¹ UJesu egcwele uMoya oNgcwele wabuya evela eJordani, waholelwa nguMoya enkangala,

² walingwa nguSathane insuku ezingamatshumi amane. Kadlanga lutho ngalezonsuku; kwathi seziphelile, walamba.

³ USathane wasesithi kuye: Uba uyiNdodana kaNkulunkulu, tshono kulelilitshe ukuba libe yisinkwa.

⁴ UJesu wamphendula wathi: Kulotshiwe ukuthi: Umuntu kayikuphila ngesinkwa sodwa.

⁵ USathane wasemholela phezulu, wamtshengisa imibuso yomhlaba yonke ngomzuzwana,

⁶ wathi kuye: Amandla wonke la kanye lobukhosi bawo ngizakukunika ngoba anikwe mina, lami ngiwanika loba ngubani ngokuthanda kwami.

⁷ Ngakhoke wena, uba ungikhonza, wonke azakuba ngawakho.

⁸ UJesu wamphendula wathi: Kulotshiwe ukuthi: Uzakukhuleka eNkosini uNkulunkulu wakho, umkhonze yena yedwa.

⁹ Wasemthatha wamusa eJerusalema, wambeka engqongeni yethempeli, wathi kuye: Uba uyiNdodana kaNkulunkulu, ziwisele phansi lapha;

¹⁰ ngoba kulotshiwe ukuthi: Uzakulaya izithunywa zakhe ngawe ukuba zikulinde:

¹¹ lokuthi: Zizakuthwala ngezandla zazo funa ukhubeke elitsheni ngonyawo lwakho.

¹² UJesu wamphendula wathi: Kuthiwa: Ungayilingi iNkosi uNkulunkulu wakho.

¹³ USathane eseqedile ukulinga konke wasuka kuye okwesikhathi.

UJesu uqala ukutshumayela

¹⁴ UJesu wabuyela eGalili ngamandla kaMoya; lodumo lwakhe lwanda kulo lonke ilizwe lakhona.

¹⁵ Wafundisa emasinagogeni abo edunyiswa yibo bonke.

UJesu udelelwa ngabaseNazaretha

¹⁶ Wafika eNazaretha, lapho akhulela khona, njengokwejwayela kwakhe wangena esinagogeni ngosuku lweSabatha; wasukuma ukuba abale.

¹⁷ Wanikwa ugwalo lomprofethi ulsaya, waluvula, wafumana indawo okulotshwe kuyo ukuthi:

¹⁸ UMoya weNkosi uphezu kwami, ngoba ingigcobile ukuba ngitshumayele indaba ezinhle kubayanga, ingithumile ukumemezela ukukhululwa kwabathunjiweyo, lokubona kwabayiziphofu, lokukhulula ababandezelweyo,

¹⁹ lokumemezela umnyaka womusa weNkosi.

²⁰ Walugoqa ugwalo, walubuyisela encekwini, wahlala phansi; amehlo abo bonke ababesesinagogeni amjolozela.

²¹ Waqala ukukhuluma kibo esithi: Lamuhla lumbhalo ugcwalisekile endlebeni zenu.

²² Bonke bamncoma bemangala ngamazwi omusa aphuma emlonyeni wakhe. Bathi: Lo kasiyo indodana kaJosefa na?

²³ Wathi kibo: Impela lizakutsho kimi lesisaga lithi: Nyanga, zelaphe wena. Lokho esikuzwileyo ukwenza eKapenawume, kwenze lalapha elizweni lakini.

²⁴ Wathike: Ngiqinisile ngithi kini: Kakho umprofethi owamukelekayo elizweni lakibo.

²⁵ Kodwa ngeqiniso ngithi kini: Kwakukhona koIsrayeli abafelwakazi abanengi ensukwini zikaElija, lapho izulu lalivalekile iminyaka emithathu lenyanga eziyisithupha, kwaba khona indlala enkulu elizweni lonke;

²⁶ kodwa uElija kathunyelwanga lakoyedwa wabo, kuphela eSarepita elizweni laseSidoni kowesifazana ongumfelwakazi.

²⁷ Kwakukhona futhi koIsrayeli abalobulephero abanengi ngesikhathi sikaElisha umprofethi; kodwa kakuhlanjululwanga lamunye wabo, kuphela uNamani umSiriya.

²⁸ Kwathi bonke ababesesinagogeni bagcwala ulaka bekuzwa lokhu.

²⁹ Basukuma, bamxotsha emzini wabo, bamqhubela eliweni lentaba umuzi wabo owawakhiwe phezu kwayo ukuze bamphosele khona.

³⁰ Kodwa yena edabula phakathi kwabo wahamba.

Ukusiliswa kweziguli eKapenawume

³¹ Wehlela eKapenawume umuzi waseGalili. Wayebafundisa ngosuku lweSabatha.

³² Bamangala ngokufundisa kwakhe, ngoba ilizwi lakhe lalilamandla.

³³ Kwakukhona esinagogeni umuntu owayelomoya omubi, wamemeza ngelizwi elikhulu esithi:

³⁴ Hawu! Silani lawe Jesu waseNazaretha na? Uze ukusibhubhisa na? Ngiyakwazi ukuba ungubani, ungoNgcwele kaNkulunkulu.

³⁵ UJesu wamkhuza esithi: Thula, uphume kuye! Kwathi umoya omubi esemwisele phansi phakathi kwabo, waphuma kuye engamlimazanga.

³⁶ Bamangala bonke, bakhulumisana besithi: Yilizwi bani leli? Ngoba ngamandla uyalaya omoya ababi, baphume.

³⁷ Lwanda udumo lwakhe kuzo zonke indawo zakhona.

Uninazala kaPetro labanye abagulayo basiliswa

³⁸ Wasuka waphuma esinagogeni, wayangena endlini kaSimoni. Uninazala kaSimoni wayebanjwe ngumkhuhlane omkhulu; bamncenga ngaye.

³⁹ Wamengama, wakhuza umkhuhlane; wona wamyekela; wavuka masinyane, wabasebenzela.

⁴⁰ Kwathi ekutshoneni kwelanga bonke ababelabagula izifo ngezifo babaletha kuye. Wabeka izandla zakhe kulowo lalowo wabo, wabasilisa.

⁴¹ Kwaphuma labomoya ababi kwabanengi bememeza besithi: Wena uyiNdodana kaNkulunkulu. Kodwa wabakhuza, engabavumeli ukuba bakhulume, ngoba babemazi ukuthi unguKristu.

UJesu usuka eKapenawume

⁴² Sekusile, wasuka waya endaweni eyinkangala; abantu bamdinga, beza kuye, bazama ukumvimbela ukuba angasuki kibo.

⁴³ Kodwa wathi kibo: Ngimele ukutshumayela ivangeli lombuso kaNkulunkulu lakweminye imizi, ngoba ngithunyelwe lokho.

⁴⁴ Ngakho wayetshumayela emasinagogeni aseJudiya.