ULukha 23 - iBhayibhili Elingcwele 1978

UJesu uphambi kukaPilatu

¹ Kwasekusuka ixuku lonke, lamusa kuPilatu.

² Baqala ukummangalela, besithi: Simfumene lumuntu eduhisa isizwe sakithi, esalela ukuthela kuKesari, esithi nguye onguKristu inkosi.

³ UPilatu wambuza wathi: Wena uyiNkosi yabaJuda na? Wamphendula wathi: Kutsho wena.

⁴ Wasesithi uPilatu kubapristi abakhulu lemaxukwini: Kangifumani cala kulumuntu.

⁵ Kodwa baqinisa, besithi: Uvusa abantu efundisa kulo lonke elaseJudiya, waqala kwelaseGalili, waze wafika lapha.

UJesu uphambi kukaHerodi

⁶ UPilatu ekuzwa lokhu wabuza ukuba lumuntu ungowaseGalili yini.

⁷ Kwathi esezwile ukuthi ungowombuso kaHerodi, wamthumela kuHerodi owayekhona laye eJerusalema ngalesosikhathi.

⁸ Kwathi uHerodi embona uJesu, wathokoza kakhulu, ngoba kwasekukade efisa ukumbona, ebezwile ngaye; wayethemba ukuthi uzakubona isibonakaliso sisenziwa nguye.

⁹ Wambuza amazwi amanengi, kodwa yena kaphendulanga lutho.

¹⁰ Abapristi abakhulu lababhali babemi bemmangalela ngamandla.

¹¹ UHerodi lamabutho akhe bamyangisa, bamenza inhlekisa, basebemambathisa ingubo enhle, bambuyisela kuPilatu.

¹² Ngalolosuku uHerodi loPilatu bathandana; ngoba ngaphambi kwalokhu kwakukhona ukungezwani phakathi kwabo.

Ukulahlwa kukaJesu lokukhululwa kukaBarabasi

¹³ UPilatu wasebabizela ndawonye abapristi abakhulu lababusi babantu,

¹⁴ wathi kibo: Limlethile kimi lumuntu ngokungathi ungoduhisa abantu. Khangelani, ngimhlolile phambi kwenu, kodwa kangifumananga cala ngalezozinto elimmangalela ngazo;

¹⁵ kunjalo loHerodi laye ngoba umbuyisile kithi. Impela kenzanga lutho afanele ukufa ngalo.

¹⁶ Ngakhoke ngizakumtshaya, ngimkhulule. [

¹⁷ Kwakufanele ukuba abakhululele abe munye ngesikhathi somkhosi.]

¹⁸ Bamemeza bonke kanyekanye, besithi: Msuse lumuntu, usikhululele uBarabasi.

¹⁹ Yena wayefakwe entolongweni ngenxa yesiphithiphithi sokuvukela umbuso esenzeka phakathi komuzi, langenxa yokubulala.

²⁰ UPilatu wabuye wakhuluma labo efuna ukumkhulula uJesu;

²¹ kodwa bamemeza besithi: Mbethele, mbethele!

²² Wasesithi kibo ngokwesithathu: Ngani, wenze ububi bani na? Kangifumananga kuye icala afanele ukufa ngalo; ngakhoke ngizakumtshaya, ngimkhulule.

²³ Kodwa bamcindezela ngokumemeza befuna ukuba abethelwe. Ukumemeza kwabo kwaphumelela.

²⁴ UPilatu wasequma ukuba kwenziwe abakufunayo.

²⁵ Wasemkhulula lowo ababemcelile owayefakwe entolongweni ngenxa yesiphithiphithi sokuvukela umbuso lokubulala; kodwa uJesu wamnikela kibo njengokuthanda kwabo.

UJesu esiphambanweni

²⁶ Kwathi behamba laye, babamba uSimoni waseKurene owayevela emaphandleni, bamethwesa isiphambano ukuba asithwale emva kukaJesu.

²⁷ Kwamlandela ixuku elikhulu labantu; kwakukhona labesifazana ababemkhalela, bemlilela.

²⁸ Kodwa uJesu ephendukela kubo wathi: Madodakazi aseJerusalema, lingangikhaleli mina, kodwa zikhaleleni lina labantwana benu.

²⁹ Ngoba khangelani, ziyeza insuku abazakutsho ngazo ukuthi: Zibusisiwe inyumba lezizalo ezingazalanga lamabele angamunyisanga.

³⁰ Bazakuqalisa ukuthi ezintabeni: Welani phezu kwethu; lemaqaqeni ukuthi: Sisibekeleni.

³¹ Ngoba uba besenza lokhu esihlahleni esimanzi, bazakwenza njani kwesomileyo na?

³² Kwakukhona labanye, abaphangi ababili, abesiwa ukuba babulawe kanye laye.

³³ Sebefikile endaweni ethiwa uKhakhayi bambethela khona kanye labaphangi, omunye ngakwesokunene lomunye ngakwesokhohlo.

³⁴ UJesu wasesithi: Baba, bathethelele, ngoba kabakwazi abakwenzayo. Babelana ingubo zakhe, benza inkatho ngazo.

³⁵ Abantu bema, bembukela; kodwa ababusi bamklolodela besithi: Wasilisa abanye; kazisilise yena, uba enguKristu okhethiweyo kaNkulunkulu.

³⁶ Labebutho bamenza inhlekisa, beza kuye, bamnika iwayini elimunyu

³⁷ besithi: Uba uyiNkosi yabaJuda, zisilise wena.

³⁸ Kwakukhona lombhalo ngaphezu kwakhe wokuthi: LO YINKOSI YABAJUDA.

³⁹ Njalo lomunye wabaphangi ababephanyekwe kanye laye wamthuka esithi: Wena kawusuye uKristu na? Zisilise kanye lathi.

⁴⁰ Kodwa omunye wamkhuza, esithi: Wena kawumesabi uNkulunkulu, lokhu lawe ukulokhukulahlwa na?

⁴¹ Thina kambe kusifanele, ngoba samukela umvuzo olingene ukwenza kwethu; kodwa lumuntu kenzanga lutho olubi.

⁴² Wasesithi: Jesu, ungikhumbule, nxa usubuya ngobukhosi bakho.

⁴³ Wathi kuye: Ngiqinisile ngithi kuwe: Lamhlanje uzakuba lami eParadise.

Ukufa kukaJesu

⁴⁴ Kwakusemini, kwaba mnyama elizweni lonke, kwaze kwaba yiawa yesithathu ntambama;

⁴⁵ kwafiphala ilanga, leveli lethempeli ladabuka phakathi.

⁴⁶ UJesu wasememeza ngelizwi elikhulu, esithi: Baba, ezandleni zakho ngibeka umoya wami. Esetshilo lokhu wafa.

⁴⁷ Induna yekhulu isibonile lokho okwenzekileyo yamdumisa uNkulunkulu, isithi: Impela lumuntu ubengelacala.

⁴⁸ Amaxuku wonke ayebuthene ukubukela lokho sebebonile okwenzekileyo, babuyela emakhaya, betshaya izifuba zabo.

⁴⁹ Bonke abazana laye labesifazana ababemlandela bevela eGalili bema khatshana, bebona lezizinto.

Ukumbelwa kukaJesu

⁵⁰ Kwakukhona umuntu othiwa nguJosefa, owayelilungu lomphakathi, eyindoda elungileyo.

⁵¹ Yena wayengavumelananga lecebo kanye lesenzo sabo. Wayengowomuzi wabaJuda othiwa yiArimathiya, elindele umbuso kaNkulunkulu;

⁵² wasuka waya kuPilatu, wacela isidumbu sikaJesu.

⁵³ Wasethula, wasigoqela ngamalembu, wasibeka elibeni elaligujwe edwaleni, okungazanga kubekwe kulo umuntu.

⁵⁴ Kwakulusuku lokulungiselela; leSabatha laselizakuqala.

⁵⁵ Abesifazana ababeze laye bevela eGalili balandela, balibona iliba lokubekwa kwesidumbu sakhe.

⁵⁶ Basebebuyela emuva, balungisa amakha lamagcobo. NgeSabatha baphumula njengomlayo.