ULukha 22 - iBhayibhili Elingcwele 1978

Ukumnikela kukaJudasi

¹ Kwasondela umkhosi wesinkwa esingelamvubelo othiwa liPhasika.

² Abapristi abakhulu lababhali bafuna ukuba bangambulala kanjani uJesu, besaba abantu.

³ USathane wasengena kuJudasi othiwa nguIskariyothi owayengomunye wabalitshumi lambili.

⁴ Wasuka wayakhuluma labapristi abakhulu lezinduna ngokuthi angamnikela kanjani kubo.

⁵ Bathokoza, bathembisa ukumnika imali.

⁶ Yena wasevuma, wafuna ithuba elihle lokumnikela kibo lingekho ixuku.

Ukumiswa kwesidlo esingcwele

⁷ Lwafika usuku lwesinkwa esingelamvubelo ababehlaba ngalo iwundlu lePhasika.

⁸ UJesu wathuma uPetro loJohane, esithi: Hambani liye ukusilungisela iPhasika ukuba sidle.

⁹ Bathi kuye: Uthanda ukuba sikulungiselele ngaphi na?

¹⁰ Wathi kibo: Khangelani, kuzakuthi selingenile emzini lihlangane lendoda ithwele imbiza yamanzi; liyilandele, liye endlini ezakungena kuyo;

¹¹ lizakuthi kumninindlu: Uthi uMfundisi kuwe: Ingaphi indlu, lapho ngingadlela khona iPhasika labafundi bami na?

¹² Yena uzakulitshengisa indlu enkulu ephezulu, eyendlelweyo; lisilungisele khona.

¹³ Bahambake bafumana njengokutsho kwakhe kubo; balungisela iPhasika.

¹⁴ Kwathi sesifikile isikhathi, wahlala ekudleni, labaphostoli babelaye.

¹⁵ Wasesithi kubo: Ngifisile kakhulu ukudla lani leliPhasika ngingakahlupheki.

¹⁶ Ngoba ngithi kini: Kangisayikulidla futhi, lize ligcwaliseke embusweni kaNkulunkulu.

¹⁷ Wasethatha inkezo, esebongile wathi: Thathani lokhu, labelane;

¹⁸ ngoba ngithi kini: Kusukela khathesinje kangisayikunatha okwesithelo sevini, kuze kufike umbuso kaNkulunkulu.

¹⁹ Wathatha isinkwa, esebongile, wasihlephuna, wabanika esithi: Lokhu kungumzimba wami, [owanikelelwa lina; yenzani lokhu ukuba lingikhumbule.

²⁰ Ngokunjalo wathatha lenkezo emva kokudla, esithi: Inkezo le yisivumelwano esitsha egazini lami elithululelwa lina.]

²¹ Kodwa khangelani, isandla songinikelayo silami ekudleni.

²² Ngoba iNdodana yomuntu ihamba njengokumisiweyo, kodwa maye kulowomuntu enikelwa nguye!

²³ Basebeqala ukubuzana ukuthi kungaba ngubani kibo ozakwenza lokho.

Ubukhulu obuqotho

²⁴ Kwavela ukuphikisana phakathi kwabo okokuthi nguwuphi kibo ongathiwa ngomkhulu.

²⁵ Wasesithi kibo: Amakhosi abezizwe azibusa izizwe ngokulukhuni, leziphathamandla zazo zithiwa ngabenza okuhle.

²⁶ Kodwa kungabi njalo kini; omkhulu phakathi kwenu kabe njengomncinyane, longumkhokheli kabe njengomlandeli.

²⁷ Ngoba nguwuphi omkhulu, lowo ohlezi ekudleni ingabe lowo ophakululayo na? Kasilowo ohlezi ekudleni na? Kodwa mina ngiphakathi kwenu njengaye ophakululayo.

²⁸ Linake lingababambelele kimi ekulingweni kwami;

²⁹ lanjengoba uBaba engimisele umbuso,

³⁰ lami ngilimisele ukuba lidle, linathe etafuleni yami embusweni wami; lokuba lihlale ezihlalweni zobukhosi, lithonisise izizwe ezilitshumi lambili zakoIsrayeli.

Ukuxwayiswa kukaPetro

³¹ Simoni, Simoni, khangela, uSathane wacela ukuba alihlungule njengamabele;

³² kodwa mina ngikukhulekele ukuba ukukholwa kwakho kungapheli; wenake, nxa usuphendukile, uqinise abazalwane bakho.

³³ Wathi kuye: Nkosi, ngilungele ukuya lawe entolongweni lasekufeni.

³⁴ Yena wathi: Ngiyakutshela, Petro, iqhude kaliyikukhala lamhlanje, ungakangilanduli kathathu ukuthi kawungazi.

³⁵ Wasesithi kubo: Mhla ngilithuma lingelamxhaka, lasikhwama, lamanyathelo, laswela ulutho na? Bathi: Kasiswelanga lutho.

³⁶ Wasesithi: Kodwa khathesi lowo olomxhaka kawuthathe, lesikhwama futhi; lalowo oswele umhedla athengise ingubo yakhe, awuthenge.

³⁷ Ngoba ngithi kini: Kumele kugcwaliseke lumbhalo ngami wokuthi: Wabalwa kanye lezoni. Ngoba okuqondene lami kulokugcwaliseka kwakho.

³⁸ Basebesithi: Nkosi, khangela, nansi imihedla emibili. Wathi kibo: Kwanele.

EGetsemane

³⁹ Wasephuma, waya entabeni ethiwa iOliveti njengokwejwayela kwakhe, labafundi bakhe bamlandela.

⁴⁰ Esefikile khona wathi kibo: Khulekani ukuba lingangeni ekulingweni.

⁴¹ Wamonyuka kibo okungaba libanga lokuphosa ilitshe, waguqa phansi, wakhuleka,

⁴² esithi: Baba, uba uthanda, susa linkezo kimi; kodwake kungenziwa intando yami, kodwa kwenziwe eyakho.

⁴³ Kwabonakala kuye isithunywa esivela ezulwini, simqinisa.

⁴⁴ Esosizini olunzima wakhuleka kakhulu, izithukuthuku zakhe zaba njengamathonsi egazi, athontela emhlabathini.

⁴⁵ Esesukile ekukhulekeni weza kubafundi bakhe, wabafumana belele ngenxa yokudabuka.

⁴⁶ Wathi kibo: Lilaleleni na? Vukani likhuleke ukuba lingangeni ekulingweni.

Ukubotshwa kukaJesu

⁴⁷ Kwathi esakhuluma, kwafika ixuku; loJudasi, omunye wabalitshumi lambili, elikhokhele, wasondela kuJesu, wamanga.

⁴⁸ Kodwa uJesu wathi kuye: Judasi, uyayinikela iNdodana yomuntu ngokuyanga na?

⁴⁹ Kwathi labo ababengakuye sebebona okuzakwenzeka, bathi: Nkosi, sigadle ngomhedla na?

⁵⁰ Omunye wabo wagadla inceku yompristu omkhulu, waquma indlebe yayo yokunene.

⁵¹ Kodwa uJesu wathi: Musani bo; kwanele. Wasethinta indlebe yayo, wayisilisa.

⁵² UJesu wasesithi kubapristi abakhulu, lezinduna zethempeli, labadala ababeze kuye: Liphumile liphethe imihedla lezinduku kungathi lilande umphangi na?

⁵³ Bengilani insuku ngensuku ethempelini, kalingibambanga; kodwa lesi yisikhathi senu lesamandla omnyama.

UPetro ulandula uJesu

⁵⁴ Sebembambile, bamqhuba, bamusa endlini yompristi omkhulu. UPetro walandela ekhatshana.

⁵⁵ Sebebasile umlilo phakathi kweguma bahlala phansi ndawonye; loPetro wahlala phakathi kwabo.

⁵⁶ Intombazana ethile, imbona ehlezi ekukhanyeni komlilo, yamjolozela yathi: Lumuntu laye ubelaye.

⁵⁷ Kodwa walandula, wathi: Ntombazana, kangimazi.

⁵⁸ Ngemva kwesikhatshana omunye wambona, wathi: Lawe ungomunye wabo. Kodwa uPetro wathi: Ndoda, kangisuye.

⁵⁹ Sekudlule iawa engabanye, omunye futhi waqinisa esithi: Impela laye ubelaye, ngoba futhi ungowaseGalili.

⁶⁰ Kodwa uPetro wathi: Ndoda, kangazi ukuthi uthini. Lahle lakhala iqhude esakhuluma.

⁶¹ INkosi yasiphenduka, yamkhangela uPetro. UPetro walikhumbula ilizwi leNkosi, njengokuba yathi kuye: Iqhude lingakakhali lamhlanje, uzakungilandula kathathu.

⁶² Waphumela ngaphandle, wakhala kakhulu.

UJesu uphathwa kubi

⁶³ Amadoda ayembambile uJesu amenza inhlekisa, amtshaya.

⁶⁴ Amembesa ubuso, athi kuye: Profetha! ngubani okutshayileyo na?

⁶⁵ Akhuluma lokunye okunengi emthuka.

UJesu uphambi kwabapristi abakhulu

⁶⁶ Kwathi sekusile, kwabuthana umhlangano wabadala babantu labapristi abakhulu lababhali, bamusa emphakathini wabo,

⁶⁷ bathi: Uba unguKristu, sitshele. Wasesithi kibo: Uba ngilitshela, kalisoze likholwe;

⁶⁸ loba ngilibuza, kalisoze liphendule.

⁶⁹ Kodwa kusukela khathesinje iNdodana yomuntu izakuhlala ngakwesokunene samandla kaNkulunkulu.

⁷⁰ Basebesithi bonke: Kanti uyiNdodana kaNkulunkulu na? Wathi kubo: Kutsho lina.

⁷¹ Basebesithi: Pho, sisafunelani obunye ubufakazi na? Ngoba sesizizwele uqobo lwethu ngomlomo wakhe.