ULukha 21 - iBhayibhili Elingcwele 1978

Umnikelo womfelwakazi

¹ Kwathi uJesu ekhangela, wabona abanothileyo bephosela iminikelo yabo esitsheni somnikelo.

² Wabona lomfelwakazi ongumyanga ephosela inhlamvana ezimbili zemali.

³ Wathi: Ngiqinisile ngithi kini: Lumfelwakazi ongumyanga uphosele okunengi kulabo bonke.

⁴ Ngoba bonke laba baphosela ngokunotha kwabo, kodwa yena ebuyangeni bakhe uphosele konke alakho abesila ngakho.

UJesu ukhuluma ngokuchithwa kweJerusalema langokuphela kwesikhathi

⁵ Besakhuluma abanye ngethempeli ukuthi liceciswe ngamatshe amahle langezipho, wathi kibo:

⁶ Kuzakufika insuku, lapho kungayikutshiywa kulokhu elikubonayo ilitshe phezu kwelinye elingayikudilizelwa phansi.

⁷ Basembembuza besithi: Mfundisi, lokhu kuzakuba nini na? Lesibonakaliso sizakuba yini, lapho sekuzakwenzeka lokhu na?

⁸ Wathi: Qaphelani ukuba lingaduhiswa, ngoba abanengi bazakuza ebizweni lami besithi: Nginguye; bathi futhi: Isikhathi sesisondele. Lingabalandeli.

⁹ Nxa lisizwa ngezimpi langeziphithiphithi, lingethuki, ngoba lokhu kumele ukuba kwenzeke kuqala, kodwa ukuphela kakuyikufika masinyane.

¹⁰ Wasesithi kubo: Isizwe sizakuvukela isizwe, lombuso uvukele umbuso;

¹¹ kuzakuba khona ukuzamazama komhlaba okukhulu indawo ngendawo, kube khona lendlala, lemikhuhlane, lezinto ezesabekayo, lezibonakaliso ezivela ezulwini.

¹² Kodwa ngaphambi kwakho konke lokhu bazakulibamba, balizingele, balinikele emasinagogeni lasezintolongweni, balise phambi kwamakhosi lalabusi ngenxa yebizo lami.

¹³ Lokhu kuzakuba lithuba elihle kini lokuba lifakaze.

¹⁴ Ngakho kubekeni engqondweni zenu ukuba linganakani ngaphambili ukuba lizakuziphendulela kanjani;

¹⁵ ngoba mina ngizakulinika umlomo lokuhlakanipha abangemelane lakho, bakuphike, bonke abayizitha zenu.

¹⁶ Lizakunikelwa langabazali, labafowenu, lezihlobo zenu, labangane benu; abanye benu bazakubulawa yibo.

¹⁷ Lizakuzondwa yibo bonke ngenxa yebizo lami.

¹⁸ Kodwa kakuyikulahleka lolulodwa lwenwele zekhanda lenu.

¹⁹ Ngokubambelela kwenu lizakuzuza ukuphila kwenu.

²⁰ Nxa libona iJerusalema lihanqwe yizimpi, yazini ukuthi sekusondele ukuchitheka kwalo.

²¹ Ngakhoke abaseJudiya kababalekele ezintabeni, labaphakathi kwalo baphume, abasemaphandleni bangangeni kulo,

²² ngoba lezi zinsuku zempindiselo ukuze kugcwaliseke imibhalo.

²³ Maye kwabakhulelweyo labamunyisayo ngalezonsuku! Ngoba kuzakuba khona ukuhlupheka okukhulu emhlabeni lolaka kulesisizwe.

²⁴ Bazakuwa bedliwa ngumkhonto, bathunjelwe ezizweni zonke; leJerusalema linyathelwe phansi ngabezizwe, kuze kugcwaliseke izikhathi zabezizwe.

²⁵ Kuzakuba khona isibonakaliso elangeni lasenyangeni lasezinkanyezini; lasemhlabeni usizi luzakwehlela izizwe, zidideke kakhulu ngenxa yokuduma kolwandle lamavinqo,

²⁶ abantu baphele amandla ngenxa yokwesaba langenxa yokubona lokho okuzayo emhlabeni; ngoba amandla ezulu azakuzanyazanyiswa.

²⁷ Kubeng’khona bezakuyibona iNdodana yomuntu isiza eyezini, ilamandla lenkazimulo enkulu.

²⁸ Nxa kuqala ukwenzeka lezizinto, lulamani, liphakamise amakhanda enu, ngoba kusondele ukukhululwa kwenu.

²⁹ Wasebatshela umfanekiso esithi: Khangelani umkhiwa lazo zonke izihlahla.

³⁰ Nxa sezihluma, liyazibonela lani, likwazi ukuthi ihlobo selisondele.

³¹ Kunjaloke nxa libona lezizinto zisenzeka, yazini ukuthi umbuso kaNkulunkulu useduze.

³² Ngiqinisile ngithi kini: Lesisizukulwana kasiyikudlula, kungakenzeki konke lokho.

³³ Kuzakudlula izulu lomhlaba, kodwa amazwi ami kawasoze adlula.

³⁴ Xwayani ukuba inhliziyo zenu zingabi buthundu ngenxa yokuminza lokudakwa lokuphisekela izinto zalokhukusila, lolosuku luhle lulijume njengomjibila lingananzelele,

³⁵ ngoba luzakwehla ngokunjalo phezu kwabo bonke abakhileyo emhlabeni wonke.

³⁶ Ngakhoke lindani ngezikhathi zonke, likhulekele ukuba libe lamandla okuphepha zonke lezizinto ezizakwenzeka lawokuma phambi kweNdodana yomuntu.

³⁷ Wayefundisa ethempelini emini, kodwa kusihlwa wayephuma ayelala entabeni ethiwa iOliveti.

³⁸ Ekuseni abantu bonke babesiza kuye ethempelini ukumuzwa.