ULukha 2 - iBhayibhili Elingcwele 1978

Ukuzalwa kukaJesu Kristu

¹ Kwathi ngalezonsuku kwaphuma isimemezelo kuKesari uAgastasi sokuba kubalwe ilizwe lonke.

² Lokhukubalwa kwakungokokuqala ukwenziwa nxa uKwiriniya wayengumbusi waseSiriya.

³ Bonke baya ukubalwa, ilowo lalowo emzini wakubo.

⁴ LoJosefa laye wakhuphuka eGalili emzini othiwa iNazaretha, waya eJudiya emzini kaDavida othiwa yiBetlehema, ngoba wayengowendlu losendo lukaDavida;

⁵ kwahamba laye uMariya owayemiselwe ukuba abe ngumkakhe, ukuze abalwe kanye laye. UMariya wayesekhulelwe.

⁶ Kwathike beselapho, kwafika isikhathi sakhe sokubeletha.

⁷ Wazibula ngendodana, wayigoqela ngamalembu, wayilalisa emtshokotshweni, ngoba baswela indawo endlini yezihambi.

⁸ Kwakukhona kulelolizwe abelusi ababesegangeni, belinda imihlambi yabo ebusuku.

⁹ Kwabonakala kubo isithunywa seNkosi, lenkazimulo yeNkosi yabazingeleza ngokukhanya; besaba kakhulu.

¹⁰ Isithunywa sathi kibo: Lingesabi; ngoba ngililethele indaba ezinhle zokuthokoza okukhulu okuzakuba kibo bonke abantu,

¹¹ ngoba lizalelwe lamuhla emzini kaDavida uMkhululi onguKristu iNkosi.

¹² Lokhu kuzakuba yisiboniso kini: Lizakufumana umntwana egoqelwe ngamalembu, elele emtshokotshweni.

¹³ Kwahle kwaba khona kanye lesithunywa ixuku lebandla lasezulwini, lidumisa uNkulunkulu, lisithi:

¹⁴ Udumo kalube kuNkulunkulu kweliphezulu, lokuthula emhlabeni ebantwini abathokozelwa nguye.

¹⁵ Kwathi sezihambile izithunywa sezibuyele ezulwini, abelusi bakhulumisana besithi: Ake siye eBetlehema sibone leyonto eyenzakeleyo iNkosi esibikele yona.

¹⁶ Bahamba ngokuphangisa, bafumana uMariya loJosefa lomntwana elele emtshokotshweni.

¹⁷ Sebebonile balandisa ngalokho ababekutshelwe ngomntwana.

¹⁸ Bonke abakuzwayo bamangala ngokukhulunywe ngabelusi.

¹⁹ Kodwa uMariya walondoloza zonke lezizinto enakana ngazo enhliziyweni yakhe.

²⁰ Babuyake abelusi, bemdumisa bembonga uNkulunkulu ngakho konke ababekuzwile lababekubonile, njengalokho okwakukhulunywe kibo.

²¹ Kwathi seziphelile insuku ezificaminwembili zokuba umntwana asokwe, wathiwa ibizo lokuthi uJesu, ibizo ayelithiwe yisithunywa, engakomulwa esiswini.

USimiyoni loAna

²² Kwathi sekuphelele isikhathi sokuhlanjululwa kwabo ngokomlayo kaMose, bamletha eJerusalema ukuba bammise phambi kweNkosi,

²³ njengokulotshiweyo emlayweni weNkosi ukuthi konke okwesilisa okulizibulo kuzakuthiwa ngokwahlukaniselwe iNkosi;

²⁴ lokuba banikele umhlatshelo njengokutshiwo emlayweni weNkosi ukuthi kakunikelwe amajuba amabili ingabe inkwilimba ezimbili.

²⁵ Kwakukhona eJerusalema umuntu othiwa nguSimiyoni ibizo lakhe. Wayelungile, emesaba uNkulunkulu, loMoya oNgcwele ube phezu kwakhe; wayelindele inkululeko kaIsrayeli.

²⁶ Kwakubonakalisiwe kuye nguMoya oNgcwele ukuthi kayikubona ukufa engakamboni uKristu weNkosi.

²⁷ Eholwa nguMoya wangena ethempelini. Kwathi ukuba abazali bamlethe umntwana uJesu ukuba bamenzele ngokomkhuba womlayo,

²⁸ wamthatha wamgona, wabonga uNkulunkulu esithi:

²⁹ Nkosi, khathesi akuyiyekele inceku yakho ihambe ngokuthula njengelizwi lakho,

³⁰ ngoba amehlo ami akubonile ukusilisa kwakho

³¹ okulungisileyo phambi kwabantu bonke,

³² ukukhanya kokwambulela abezizwe lenkazimulo yesizwe sakho uIsrayeli.

³³ Uyise lonina bamangaliswa yilokho okwatshiwo ngaye.

³⁴ USimiyoni wababusisa, wathi kuMariya unina: Khangela, lumntwana umiselwe ukuba abe yisibonakaliso esizakuphikwa ngabantu —

³⁵ lawe, umhedla uzakugwaza umphefumulo wakho. — Abanengi koIsrayeli bazakuma ingabe bawe ngenxa yakhe; ngokunjalo imicabango yenhliziyo zabanengi izakwambulwa.

³⁶ Kwakukhona lomprofethikazi, uAna indodakazi kaFanuweli, owesizwe sikaAsheri; wayesekhulile kakhulu, ebehlale lendoda iminyaka eyisikhombisa emva kobuntombi bakhe;

³⁷ wayesengumfelwakazi waze waba leminyaka engamatshumi aficaminwembili lane, engasuki ethempelini, ekhonza ngokuzila ukudla langokukhuleka ebusuku lemini.

³⁸ Layeke efika ngalesosikhathi wadumisa uNkulunkulu, wakhuluma ngaye kubo bonke ababelindele inkululeko yeJerusalema.

³⁹ Kwathi sebekwenzile konke okungokomlayo weNkosi, babuyela eGalili emzini wakubo iNazaretha.

⁴⁰ Umntwana wakhula, waba lamandla, wagcwala ukuhlakanipha; lomusa kaNkulunkulu wawuphezu kwakhe.

Umntwana uJesu ethempelini

⁴¹ Abazali bakhe baya eJerusalema iminyaka yonke ngomkhosi wePhasika.

⁴² Kwathi eseleminyaka elitshumi lambili, baya khona njengomkhuba.

⁴³ Seziphelile insuku zomkhosi, ekubuyeni kwabo, umfana uJesu wasala eJerusalema, abazali bakhe bengazi.

⁴⁴ Babesithi ukwababehambisana labo, bahamba usuku lonke; emva kwalokho bamdinga phakathi kwezinini zabo labazana labo.

⁴⁵ Bengamfumani babuyela eJerusalema, bemdinga.

⁴⁶ Ngemva kwensuku ezintathu bamfumana ethempelini ehlezi phakathi kwabafundisi, ebalalela, ebabuza imibuzo.

⁴⁷ Bonke ababemuzwa bamangaliswa yikwazi kwakhe lokuphendula kwakhe.

⁴⁸ Kwathi bembona, bamangala; lonina wathi kuye: Mntanami, wenzeleni okunje kithi na? Khangela, uyihlo lami besikudinga sidubekile.

⁴⁹ Wathi kibo: Belingidingelani na? Belingakwazi yini ukuthi kumele ukuba ngibe sendlini kaBaba na?

⁵⁰ Kabawaqedisisanga amazwi awakhuluma kibo.

⁵¹ Wehla labo, weza eNazaretha, wabalalela; lonina walondoloza zonke lezizinto enhliziyweni yakhe.

⁵² UJesu waqhubeka ekuhlakanipheni, lasekukhuleni, lasekuthandweni nguNkulunkulu langabantu.