ULukha 19 - iBhayibhili Elingcwele 1978

Ukuphenduka kukaZakewu

¹ Wangena eJeriko, wadabula phakathi kwalo.

² Kwakukhona lapho umuntu othiwa nguZakewu, owayengumthelisi omkhulu, enothile.

³ Wafuna ukubona ukuba uJesu unjani; wehluleka ngenxa yexuku, ngoba wayemfitshane.

⁴ Wagijimela ngaphambili, wakhwela emkhiweni ukuba ambone, ngoba wayezakudlula khona lapho.

⁵ Kwathi uJesu efika kuleyondawo wakhangela phezulu, wathi: Zakewu, yehla ngokuphangisa, ngoba lamuhla ngimele ukuhlala endlini yakho.

⁶ Waphangisa wehla, wamamukela ngokuthokoza.

⁷ Kuthe bekubona, basola, besithi: Wethekelele indoda eyisoni.

⁸ Kodwa uZakewu wasukuma, wathi eNkosini: Khangela, Nkosi, ngiyabapha abayanga ingxenye yempahla yami; kuthi uba ngimthathele umuntu ulutho ngobuqili, ngilubuyisele luphindwe kane.

⁹ UJesu wathi kuye: Lamuhla ukusiliswa kufikile kulindlu, ngoba laye uyindodana kaAbrahama.

¹⁰ Ngoba iNdodana yomuntu ize ukufuna lokusilisa okulahlekileyo.

Umfanekiso wemali

¹¹ Kuthe ukuba bakuzwe lokho, wasebatshela umfanekiso, ngoba wayeseduze leJerusalema langoba babesithi umbuso kaNkulunkulu uzakubonakala masinyane.

¹² Wasesithike: Umuntu othile oyisikhulu waya elizweni elikhatshana ukwamukela umbuso, aphinde abuye.

¹³ Wasebiza inceku zakhe ezilitshumi, wanika leyo laleyo idola elilodwa, wathi kuzo: Sebenzisani limali, ngize ngibuye.

¹⁴ Kodwa abantu bomuzi wakhe babemzonda, bathumela amanxusa emva kwakhe, besithi: Kasithandi ukuba lumuntu asibuse.

¹⁵ Kwathi esebuyile esewamukele umbuso, wathi azibizelwe kuye lezonceku ayezinike imali ukuze azi ukuba zizuzeni ngayo.

¹⁶ Kwezake eyokuqala, yathi: Nkosi, idola lakho lizuze amadola alitshumi.

¹⁷ Wathi kuyo: Kuhleke, nceku elungileyo; lokhu ufunyenwe uthembekile kokuncinyane, uzakubusa imizi elitshumi.

¹⁸ Kwasekusiza eyesibili, yathi: Nkosi, idola lakho lizuze amadola amahlanu.

¹⁹ Wathi kuyo: Lawe uzakubusa imizi emihlanu.

²⁰ Kwasekusiza enye, isithi: Nkosi, nanti idola lakho engaligoqela ngelembu, ngalilondoloza.

²¹ Bengikwesaba, ngoba ungumuntu olukhuni; uthatha lokho obungakubekanga, uvune ongakuhlanyelanga.

²² Wathi kuyo: Nceku embi, ngizakukulahla ngamazwi aphuma emlonyeni wakho; ubusazi ukuba ngingumuntu olukhuni, ngithatha lokho engingakubekanga, ngivune engingakuhlanyelanga.

²³ Kungani ungafakanga imali yami ebhanga na? Kuthike ekufikeni kwami ngiyithathe lenzalo yayo.

²⁴ Wasesithi kulabo ababemi khona: Mamukeni idola, lilinike lowo oletshumi.

²⁵ Kodwa bathi kuye: Nkosi, lowo uletshumi.

²⁶ Ngithi kini: Ilowo lalowo alakho uzakuphiwa, kodwa lowo ongelakho uzakwamukwa lalokho alakho.

²⁷ Kodwa lezozitha zami ebezingathandi ukuba ngizibuse, ziletheni lapha, lizibulale phambi kwami.

UJesu ungena eJerusalema

²⁸ Esetshilo lokhu waqhubekela phambili, esenyukela eJerusalema.

²⁹ Kwathi esondela eBetfage laseBethani ngasentabeni ethiwa iOliveti, wathuma ababili kubafundi bakhe,

³⁰ esithi: Hambani liye emzaneni okhangelene lani; lizakuthi lisangena nje, lifumane ithole likababhemi likhulekiwe, okungazanga kuhlale kulo umuntu; lilikhulule, lililethe lapha.

³¹ Uba umuntu elibuza esithi: Lilikhululelani na? lizakutsho lokhu ukuthi: INkosi iyalifuna.

³² Bahambake labo ababethunyiwe, bafumana njengokutshelwa kwabo.

³³ Kuthe besalikhulula ithole, abaninilo bathi kibo: Lilikhululelani ithole na?

³⁴ Bona bathi: INkosi iyalifuna.

³⁵ Baliletha ithole kuJesu, babeka ingubo zabo phezu kwalo, bamkhweza uJesu kulo.

³⁶ Esahamba, bendlala ingubo zabo endleleni.

³⁷ Kwathi esesondela ekwehleni kwentaba ethiwa iOliveti, ixuku lonke labafundi laqala ukuthokoza lokumdumisa uNkulunkulu ngelizwi elikhulu ngemisebenzi yonke yamandla eliyibonileyo,

³⁸ lisithi: Ubusisiwe umbusi ozayo ebizweni leNkosi; ukuthula ezulwini lenkazimulo kweliphezulu.

³⁹ Abanye babaFarisi ababesexukwini bathi kuye: Mfundisi, khuza abafundi bakho.

⁴⁰ Waphendula wathi: Ngithi kini: Uba bethula laba, amatshe uqobo lwawo azakumemeza.

⁴¹ Kwathi esondela, ewubona umuzi, wawukhalela,

⁴² esithi: Kungathi ngabe wazile lawe ngalolusuku izinto eziletha ukuthula; kodwake zifihlakele emehlweni akho.

⁴³ Ngoba uzakwehlelwa zinsuku, lapho izitha zakho zizakwakhela umthangala, zikuzingelezele, zikuvimbele inxa zonke,

⁴⁴ zikusakaze phansi, wena labantwana abaphakathi kwakho, zingatshiyi ilitshe lelilodwa phezu kwelinye phakathi kwakho, ngoba ungasazanga isikhathi sokuhanjelwa kwakho.

Ukuhlanjululwa kwethempeli

⁴⁵ Wangena ethempelini, waqala ukuxotsha abathengisayo,

⁴⁶ esithi kibo: Kulotshiwe ukuthi: Indlu yami izakuba yindlu yokukhuleka; kodwa lina liyenzile ubhalu lwabaphangi.

⁴⁷ Wayefundisa ethempelini insuku zonke, kodwa abapristi abakhulu, lababhali, lezikhulu zesizwe, bathanda ukumbulala.

⁴⁸ Kodwa behluleka ukuba bangenza njani, ngoba abantu bonke banamathela kuye belalela amazwi akhe.