ULukha 18 - iBhayibhili Elingcwele 1978

Umfanekiso womthonisisi ongalunganga

¹ Wabatshela umfanekiso wokuthi bafanele ukukhuleka, bengadinwa.

² Wathi: Kwakukhona emzini othile umthonisisi owayengesabi uNkulunkulu, engakhathaleli muntu.

³ Kwakukhona futhi kulowomuzi umfelwakazi othile owayelokhu efika kuye, esithi: Akungisize esitheni sami.

⁴ Kwaba yisikhathi elokhu engavumi; kodwa ngasemuva wanakana wathi: Lanxa mina ngingamesabi uNkulunkulu, ngingakhathaleli muntu,

⁵ kodwa ngoba lumfelwakazi engikhathaza njalo, ngizakumlwela, funa angidinise ngokuza kwakhe futhifuthi.

⁶ INkosi yasisithi: Ake lizwe okutshiwo ngumthonisisi ongalunganga.

⁷ UNkulunkulu kayikubalwela abakhethiweyo bakhe yini abakhalayo kuye emini lasebusuku na? Uzakuphuza ukubasiza na?

⁸ Ngithi kini: Uzakubalwela masinyane. Kodwake nxa iNdodana yomuntu ifika, izakufumana ukukholwa emhlabeni na?

UmFarisi lomthelisi ethempelini

⁹ Wasekhuluma lumfanekiso kwabathile ababezithemba ukuthi balungile, bedelela abanye, wathi:

¹⁰ Abantu ababili bakhuphukela ethempelini ukuyakhuleka, omunye engumFarisi, lomunye engumthelisi.

¹¹ UmFarisi wema wazikhulekela ngokuthi: Nkulunkulu, ngiyakubonga ngoba kanginjengabanye abantu, abaphangi, labangalunganga, lezifebe, lanjengalumthelisi.

¹² Mina ngizila ukudla kabili ngeviki, nginikela okwetshumi kukho konke engilakho.

¹³ Kodwa umthelisi emi khatshana wayengathandi lokuphakamisela amehlo akhe ngasezulwini, kodwa watshaya isifuba sakhe, esithi: Nkulunkulu, akungihawukele mina soni.

¹⁴ Ngithi kini: Lumuntu wehlela endlini yakhe elungisisiwe emehlweni kaNkulunkulu kulalowo omunye. Ngoba ilowo lalowo oziphakamisayo uzakuthotshiswa, kodwa ozithobayo uzakuphakanyiswa.

Ukubusiswa kwabantwana

¹⁵ Baletha kuye abantwana ukuba abaphathe; kodwa abafundi bekubona babakhuza.

¹⁶ UJesu wababizela kuye, wathi: Bavumeleni abantwana beze kimi, lingabanqabeli, ngoba umbuso kaNkulunkulu ungowabanje.

¹⁷ Ngiqinisile ngithi kini: Ilowo lalowo ongamukeli umbuso kaNkulunkulu njengomntwana kasoze angene kuwo.

Insizwa enothileyo

¹⁸ Umbusi othile wasembuza esithi: Mfundisi olungileyo, ngizakwenzani ukuze ngidle ilifa lokuphila okungapheliyo na?

¹⁹ Kodwa uJesu wathi kuye: Ungibizelani ngokuthi ngingolungileyo na? Kakho olungileyo, munye kuphela, nguNkulunkulu.

²⁰ Uyayazi imilayo ethi: Ungafebi, ungabulali, ungebi, ungafakazi amanga, hlonipha uyihlo lonyoko.

²¹ Yena wathi: Konke lokhu ngikwenzile kusukela ebutsheni bami.

²² UJesu ekuzwa lokhu wathi kuye: Usaswele ulutho lunye; thengisa konke olakho, wabele abayanga, kung’khona uzakuba lenotho ezulwini; uze ungilandele.

²³ Kodwa yena ekuzwa lokhu, wadana, ngoba wayenothile kakhulu.

²⁴ UJesu embona wathi: Kulukhuni kangakanani kulabo abanothileyo ukungena embusweni kaNkulunkulu.

²⁵ Kulula ukuba ikamela lingene ngentunja yosungulo kulokuba umuntu onothileyo angene embusweni kaNkulunkulu.

²⁶ Abakuzwayo basebesithi: Pho, kungasiliswa bani na?

²⁷ Kodwa yena wathi: Okungenzekiyo ebantwini kuyenzeka kuNkulunkulu.

Umvuzo wokuzidela

²⁸ UPetro wasesithi: Khangela, thina sitshiye imizi yethu, sakulandela.

²⁹ UJesu wathi kibo: Ngiqinisile ngithi kini: Kakho umuntu otshiye indlu, ingabe umkakhe, labafowabo, labazali, labantwana, ngenxa yombuso kaNkulunkulu,

³⁰ ongayikwamukeliswa okuphindwe kanengi kulesisikhathi lesikhathini esizayo ukuphila okungapheliyo.

UJesu ukhuluma ngokuhlupheka kwakhe

³¹ Wasethatha abalitshumi lambili, wathi kibo: Khathesi senyukela eJerusalema; konke okulotshiweyo ngabaprofethi ngeNdodana yomuntu kuzakugcwaliseka.

³² Ngoba izakunikelwa kwabezizwe, iyangiswe, ithukwe, ikhafulelwe ngamathe,

³³ bayitshaye, bayibulale, kodwa ngosuku lwesithathu izakuvuka.

³⁴ Kodwa bona kabawaqedisisanga lawomazwi; lalinkulumo yayifihlakele kibo, kabakuqedisisanga okutshiwoyo.

Ukusiliswa kwesiphofu

³⁵ Kwathi esesondela eJeriko, isiphofu esithile sasihlezi siphanza ngasendleleni.

³⁶ Sisizwa ixuku lidlula, sabuza ukuthi kuyini lokho.

³⁷ Basitshela bathi: UJesu waseNazaretha uyadlula.

³⁸ Samemeza sathi: Jesu, Ndodana kaDavida, akungihawukele!

³⁹ Ababehamba ngaphambili basikhuza bathi kasithule; kodwa kwabang’khona simemeza kakhulu, sisithi: Ndodana kaDavida, akungihawukele!

⁴⁰ UJesu wemake, walaya ukuba silethwe kuye. Sesisondele, wasibuza esithi:

⁴¹ Ufuna ukuba ngikwenzeleni na? Sathi: Nkosi, ukuba ngibone.

⁴² UJesu wathi kuso: Bonake! Ukukholwa kwakho kukusilisile.

⁴³ Sahle sabona khona lapho, samlandela sidumisa uNkulunkulu; labantu bonke bekubona badumisa uNkulunkulu.