ULukha 16 - iBhayibhili Elingcwele 1978

Umfanekiso womphathi ongalunganga

¹ Wasekhuluma labafundi bakhe esithi: Kwakukhona umuntu onothileyo, owayelomphathi owamangalelwa kuye ngokuthi uchitha impahla yakhe.

² Wambiza, wathi kuye: Kuyini lokhu engikuzwayo ngawe na? Landisa ngobuphathi bakho, ngoba ungebe usaba ngumphathi.

³ Umphathi wanakana lokhu wathi: Ngizakwenza njani, lokhu inkosi yami isingamuka ubuphathi bami na? Kangilamandla okulima, ngilenhloni zokuba ngiphanze.

⁴ Ngiyakwazi engizakukwenza ukuze abantu bangamukele endlini zabo, nxa sengikhutshiwe ebuphathini.

⁵ Ngakho wasebabiza ngamunye abalemilandu enkosini yakhe, wathi kowokuqala: Ulomlandu ongakanani enkosini yami na?

⁶ Wathi: Amagokoko amagcobo angamakhulu amabili. Wasesithi kuye: Thatha incwadi yakho, ubhale masinyane ikhulu.

⁷ Wathi kowesibili: Wenake ulomlandu ongakanani na? Wathi: Amasaka amabele angamakhulu amathathu. Wathi kuye: Thatha incwadi yakho ubhale amakhulu amabili.

⁸ Inkosi yambabaza umphathi ongalunganga ngokuthi wenze ukuhlakanipha; ngoba abantwana balesisikhathi bahlakaniphile esizukulwaneni sabo kulabantwana bokukhanya.

⁹ Lami ngithi kini: Zenzeleni lina abangane ngenotho engalunganga ukuze kuthi, nxa isiphelile, balamukele ezindlini ezingapheliyo.

¹⁰ Othembekileyo kokuncinyane uthembekile lakokukhulu. Longathembekanga kokuncinyane kathembekanga lakokukhulu.

¹¹ Ngakhoke uba lingathembekanga enothweni engalunganga, ngubani ozakuliphathisa inotho eqotho na?

¹² Futhi uba lingathembekanga kokomunye, ngubani ozakulinika okungokwenu na?

¹³ Kayikho inceku engakhonza amakhosi amabili; ngoba izakuzonda enye, ithande enye, ingabe ibambelele kwenye, idelele enye. Lingekhonze uNkulunkulu lenotho.

Ukusolwa kwabaFarisi

¹⁴ AbaFarisi ababethanda imali bakuzwa konke lokhu, bamklolodela.

¹⁵ Kodwa wathi kibo: Lina lingabazitshaya abalungileyo emehlweni abantu; kodwa uNkulunkulu uyazazi inhliziyo zenu, ngoba lokho okuphakemeyo phakathi kwabantu kuyisinengiso emehlweni kaNkulunkulu.

¹⁶ Umlayo labaprofethi kwakukhona kwaze kwafika uJohane; kusukela kulesosikhathi ivangeli lombuso kaNkulunkulu liyatshunyayelwa; wonke umuntu uyafohlela kuwo.

¹⁷ Kodwa kulula ukuba kudlule izulu lomhlaba kulokuba kudlule ichatshana elilodwa lomlayo.

¹⁸ Ilowo lalowo olahla umkakhe, athathe omunye, uyafeba; lothatha umfazi olahlwe yindoda uyafeba.

Umfanekiso wesinothi loLazaro

¹⁹ Kwakukhona umuntu othile onothileyo owayegqoka eziyibubende lamalembu amahle, esidla okumnandi insuku zonke.

²⁰ Kwakukhona futhi umuntu ongumyanga othiwa nguLazaro, owayebekiwe esangweni lakhe egcwele izilonda,

²¹ wafisa ukudla imvuthuluka ewayo etafuleni yesinothi; futhi lezinja zazisiza, zimkhothe izilonda.

²² Wasesifa ongumyanga, izithunywa zamthwalela esifubeni sikaAbrahama; lesinothi laso safa, sambelwa.

²³ Sesisendaweni yabafileyo saphakamisa amehlo aso, sisebuhlungwini, sabona uAbrahama ekhatshana, loLazaro esesifubeni sakhe.

²⁴ Samemeza sathi: Baba Abrahama, ngihawukela, uthume uLazaro, acwilise umunwe wakhe emanzini, apholise ulimi lwami, ngoba ngiyahlupheka kakhulu kulelilangabi.

²⁵ Kodwa uAbrahama wathi: Ndodana, khumbula ukuthi wamukela okuhle kwakho ekusileni kwakho, uLazaro ngokunjalo wamukela okubi; kodwa khathesi uyathokoziswa lapha, wena uyahlupheka.

²⁶ Langaphandle kwakho konke lokhu kubekiwe phakathi kwethu lani igebe elikhulu ukuze kuthi abalapha abafuna ukusuka beze ngakini bangekwenze, labangapho bangewelele ngakithi.

²⁷ Sasesisithi: Njalo ngiyakuncenga, baba, ukuba umthumele endlini kababa,

²⁸ ngoba ngilabafowethu abahlanu, ukuze abaxwayise, funa labo beze kulindawo yokuhlupheka.

²⁹ Kodwa uAbrahama wathi: BaloMose labaprofethi; kabezwe bona.

³⁰ Sona sathi: Atshi, baba Abrahama, kodwa uba kusuka omunye kwabafileyo, aye kibo, bazakuphenduka.

³¹ Wathi kuso: Uba bengalaleli uMose labaprofethi, bangeke bavume, loba kuvuka omunye kwabafileyo.