ULukha 15 - iBhayibhili Elingcwele 1978

Okulahlekileyo: imvu, uhlamvu lwesiliva, lendodana

¹ Kwasekusondela kuye bonke abathelisi lezoni ukumuzwa.

² AbaFarisi lababhali basola besithi: Umuntu lo wamukela izoni, adle lazo.

³ Wasebatshela lumfanekiso, esithi:

⁴ Nguwuphi umuntu kini ongathi elezimvu ezilikhulu, alahlekelwe ngenye yazo, angazitshiyi ezingamatshumi aficamunwemunye lezificamunwemunye egangeni, ayedinga elahlekileyo, aze ayifumane na?

⁵ Athi eseyifumene, ayetshate ethokoza.

⁶ Esefikile ekhaya ameme abangane bakhe lomakhelwane bakhe, athi kibo: Thokozani lami, ngoba ngiyifumene imvu yami ebilahlekile.

⁷ Ngithi kini: Ngokunjalo kuzakuba khona ukuthokoza ezulwini ngesoni sinye nje esiphendukileyo kulabalungileyo abangamatshumi aficamunwemunye labaficamunwemunye abangasweli ukuphenduka.

⁸ Loba nguwuphi owesifazana othi elenhlamvu zesiliva ezilitshumi uba elahlekelwa luhlamvu lunye, angalumathisi isibane, athanyele indlu, aludingisise, aze alufumane, na?

⁹ Athi ukuba alufumane, abize abangane bakhe, athi: Thokozani lami, ngoba sengilufumene uhlamvu lwami obelulahlekile.

¹⁰ Ngithi kini: Ngokunjaloke kukhona ukuthokoza phambi kwezithunywa zikaNkulunkulu ngesoni sinye nje esiphendukayo.

¹¹ Wasesithi: Kwakukhona umuntu othile owayelamadodana amabili.

¹² Encinyane yawo yathi kuyise: Baba, akunginike isabelo selifa esiqondene lami; wawahlukanisela impahla yakhe.

¹³ Kwathi ngemva kwensuku ezilutshwana indodana encinyane yabutha konke, yasuka yahamba, yaya elizweni elikhatshana, lapho eyachitha khona impahla yayo ngenhlalo embi.

¹⁴ Yathi isichithile konke, kwavela indlala enkulu kulelolizwe; yaqala ukuswela.

¹⁵ Yasuka yayakhonza komunye umuntu walelolizwe owayithumela emasimini akhe ukuba yaluse ingulube.

¹⁶ Yafisa ukuzisuthisa ngamakhasi adliwa zingulube; kwakungaselamuntu oyinika ulutho.

¹⁷ Kwathi sekusile kuyo, yathi: Zingaki izisebenzi zikababa eziqatshiweyo ezilokudla okunengi, kanti mina ngiyafa yindlala lapha.

¹⁸ Ngizakusuka, ngiye kubaba, ngithi kuye: Baba, ngonile koPhezulu laphambi kwakho;

¹⁹ kangisafanele ukuthiwa ngiyindodana yakho; ngenza ngibe njengomunye wezisebenzi zakho eziqatshiweyo.

²⁰ Yasisuka, yaya kuyise; kodwa kuthe isekhatshana, uyise wayibona, wayihawukela, wagijima, wayisingatha, wayanga.

²¹ Indodana yasisithi kuye: Baba, ngonile koPhezulu laphambi kwakho; kangisafanele ukuthiwa ngiyindodana yakho.

²² Kodwa uyise wathi encekwini zakhe: Phangisani lilethe ingubo enhle kulazo zonke, liyambathise, lifake isongo esandleni sayo lamanyathelo enyaweni zayo;

²³ lilethe ithole elinonisiweyo, lilihlabe, sidle, sithokoze;

²⁴ ngoba indodana yami le ibifile, isibuye yasila; ibilahlekile, ifunyenwe. Basebeqala ukuthokoza.

²⁵ Kodwa indodana yakhe endala yayisensimini; yathi isiza isondela endlini, yezwa ukuhlabelela lokusina.

²⁶ Yasibiza omunye wezinceku, yabuza ukuthi kutshoni lokhu.

²⁷ Wathi kuyo: Umnawakho ufikile, loyihlo uhlabile ithole elinonisiweyo, ngoba ubuyile esasila.

²⁸ Kodwa yathukuthela, yala ukungena. Uyise wasephuma, wayincenga.

²⁹ Kodwa yaphendula yathi kuyise: Khangela, iminyaka engaka ngikusebenzela: kangizanga ngeqe umlayo wakho, kodwa kawuzanga unginike lezinyane lembuzi nje ukuba ngijabule kanye labangane bami;

³⁰ kodwa kuthe ukuba ifike lindodana yakho eyachitha impahla yakho lezifebe, wayihlabela ithole elinonisiweyo.

³¹ Wasesithi kuyo: Ndodana, wena uhlala lami njalo; konke okungokwami kungokwakho.

³² Bekufanele ukuba sijabule, sithokoze, ngoba umnawakho lo owayefile usebuye wasila; wayelahlekile, usefunyenwe.