ULukha 13 - iBhayibhili Elingcwele 1978

UJesu ufundisa ngokuphenduka

¹ Ngalesosikhathi kwaba khona abathile abamtshela ngabaseGalili igazi labo uPilatu alixubanisa lemihlatshelo yabo.

² Wabaphendula wathi: Lithi labo abaseGalili babeyizoni kulabo bonke abaseGalili, ngoba behlelwa yilokho na?

³ Ngithi kini: Atshi, kodwa uba lingaphenduki, lizakubhubha ngokunjalo lonke.

⁴ Lalabo abalitshumi labaficaminwembili owawela phezu kwabo umphotshonga waseSilowama, wababulala, lithi bona babebabi kulabantu bonke ababehlala eJerusalema na?

⁵ Ngithi kini: Atshi, kodwa uba lingaphenduki, lizakubhubha ngokunjalo lonke.

Umfanekiso womkhiwa ongatheliyo

⁶ Wasebatshela lumfanekiso wokuthi: Umuntu othile wayelesihlahla somkhiwa esasihlanyelwe esivinini sakhe; wafika efuna isithelo kuso, wasiswela.

⁷ Wasesithi kuso isisebenzi sakhe sesivini: Khangela, sekuyiminyaka emithathu ngisiza lapha ngifuna izithelo kulesisihlahla somkhiwa, ngiziswela. Sigamule; yini ukuba sone umhlabathi na?

⁸ Samphendula sathi: Nkosi, ake usiyekele langalunyaka, ngize ngimbe ngithele umquba kuso;

⁹ mhlawumbe singathela ngozayo; uba singatheli, usigamule.

Ukusiliswa kowesifazana ngeSabatha

¹⁰ Wayefundisa kwelinye lamasinagoge ngeSabatha.

¹¹ Kwakukhona owesifazana owayengenwe ngumoya owamenza isilima iminyaka elitshumi leficaminwembili, esegogekile engasalulami.

¹² Kwathi uJesu embona, wambiza, wathi kuye: Mama, ukhululwe ebulimeni bakho.

¹³ Wabeka izandla zakhe phezu kwakhe; wahle walulama khona lapho, wadumisa uNkulunkulu.

¹⁴ Kodwa umphathi wesinagoge, ethukuthele ngoba uJesu esilise ngeSabatha, wathi ebantwini: Zikhona insuku eziyisithupha okufanele ukusetshenzwa ngazo; ngakhoke wozani ngalezonsuku, lisiliswe, lingezi ngosuku lweSabatha.

¹⁵ Kodwa uJesu wamphendula wathi: Lina bazenzisi, ilowo lalowo wenu kayikhululi yini inkabi ingabe ubabhemi wakhe esibayeni ngeSabatha, ayiholele emanzini ukuyinathisa na?

¹⁶ Kakufanele yini ukuba lowesifazana oyindodakazi kaAbrahama, obebotshiwe nguSathane iminyaka elitshumi leficaminwembili, akhululwe kulesisibopho ngosuku lweSabatha na?

¹⁷ Kwathi ukuba atsho lokhu, bayangeka ababephikisana laye; kodwa ixuku lonke lathokoza ngemisebenzi yonke emihle eyenziwe nguye.

Umfanekiso wenhlanyelo yemastade, lowemvubelo

¹⁸ Wasesithi: Umbuso kaNkulunkulu ufana lani na? Ngizakuwufanisa lani na?

¹⁹ Ufana lohlamvu lwemastade umuntu aluthatha, waluhlanyela ensimini yakhe, lwamila, lwaba yisihlahla, lenyoni zaphezulu zakhela izidleke zazo engatsheni zaso.

²⁰ Wabuya wathi: Ngizakuwufanisa lani umbuso kaNkulunkulu na?

²¹ Unjengemvubelo owesifazana ayithatha, wayifaka emputshini elingana lamagokoko amabili, yaze yabila yonke.

UJesu ukhuluma ngendlela yokuphila

²² Wasesuka ehamba edabula imizi lemizana, efundisa, eqonde eJerusalema.

²³ Umuntu othile wathi kuye: Nkosi, bayingcosana yini abasiliswayo na? Wasesithi kibo:

²⁴ Zamani ukungena ngomnyango omncinyane; ngoba ngithi kini: Abanengi bazakufuna ukungena, behluleke.

²⁵ Nxa umninindlu esesukume wavala umnyango, lizakuqala ukuma ngaphandle liqoqode emnyango, lisithi: Nkosi, sivulele; yenake aphendule athi: Kangilazi lapho livela khona.

²⁶ Laphoke lizakuqala ukuthi: Sadla, sanatha kanye lawe, wawufundisa endleleni zakithi.

²⁷ Kodwa yena uzakuthi: Ngithi kini: Kangilazi lapho livela khona; sukani kimi, lina lonke elenza okubi.

²⁸ Laphoke kuzakuba khona ukukhala lokugedla amazinyo, nxa selibona uAbrahama, loIsaka, loJakobe, labaprofethi bonke embusweni kaNkulunkulu, kodwa lina likhutshelwe ngaphandle.

²⁹ Bazakufika bevela empumalanga, lasentshonalanga, lasenyakatho, laseningizimu, bahlale ekudleni embusweni kaNkulunkulu.

³⁰ Khangelani, bakhona abokucina abazakuba ngabokuqala; bakhona abokuqala abazakuba ngabokucina.

Ukuzonda kukaHerodi

³¹ Ngalesosikhathi kwafika abaFarisi abathile, bathi kuye: Suka lapha, ngoba uHerodi ufuna ukukubulala.

³² Wathi kibo: Hambani lilitshele lelokhanka ukuthi: Khangela, ngiyakhupha omoya ababi, ngisilise lamuhla lakusasa, ngomhlomunye ngiphelelise umsebenzi wami.

³³ Futhi ngimele ukuba ngihambe lamuhla lakusasa langomhlomunye; ngoba kakulakwenzeka ukuba umprofethi abhubhele ngaphandle kweJerusalema.

UJesu ukhalela iJerusalema

³⁴ Hawu Jerusalema, Jerusalema, wena obulala abaprofethi, obakhanda ngamatshe labo abathunywe kuwe! Bengithanda kangakanani ukubuthela ndawonye abantwana bakho njengesikhukhukazi sibuthela amatsiyane aso ngaphansi kwamaphiko aso; kodwa kalivumanga.

³⁵ Khangelani, indlu yenu itshiywe ilunxiwa; kodwa ngithi kini: Kalisoze langibona, kuze kufike isikhathi sokuba lithi: Ubusisiwe ozayo ebizweni leNkosi.