ULukha 12 - iBhayibhili Elingcwele 1978

UJesu uxwayisa abafundi bakhe

¹ Kwathi sezibuthene izigidi ezinengi zabantu baze banyathelana, waqala ukukhuluma, ikakhulu labafundi bakhe, esithi: Xwayani imvubelo yabaFarisi eyikuzenzisa.

² Kakukho okumbomboziweyo okungayikwambulwa, lokufihliweyo okungayikwaziwa;

³ lalokho elikukhuluma emnyameni kuzakuzwiwa ekukhanyeni, lelikunyenyezileyo ezindlini kuzakumenyezelwa phezu kwezindlu.

Lowo omele ukwesatshwa

⁴ Ngithi kini bangane bami: Lingabesabi labo ababulala umzimba, bengelakwenza lutho emva kwalokho.

⁵ Kodwa ngizakulitshengisa elifanele ukumesaba: Mesabeni lowo othi esebulele, abe lamandla okuphosela esihogweni. Yebo, ngithi kini: Mesabeni lowo.

⁶ Kakuthengwa yini intaka ezinhlanu ngendibilitshi ezimbili na? Kanti emehlweni kaNkulunkulu kakukhohlakali lanye yazo.

⁷ Kanti lenwele zekhanda lenu zibaliwe zonke. Lingesabi lina, ngoba liyazidlula intaka ezinengi.

⁸ Njalo ngithi kini: Yilowo lalowo ongivuma phambi kwabantu, leNdodana yomuntu layo izakumvuma phambi kwezithunywa zikaNkulunkulu;

⁹ kodwa ongiphika phambi kwabantu uzakuphikwa phambi kwezithunywa zikaNkulunkulu.

¹⁰ Yilowo lalowo okhuluma ilizwi elibi ngeNdodana yomuntu uzakuthethelelwa, kodwa lowo ohlambaza uMoya oNgcwele kayikuthethelelwa.

¹¹ Nxa belisa emasinagogeni, laphambi kwababusi leziphathamandla, lingaphisekeli ukuthi lizakuziphendulela kanjani, lokuthi lizakukhulumani,

¹² ngoba uMoya oNgcwele uzakulifundisa ngalesosikhathi lokho elifanele ukukukhuluma.

Umfanekiso womlimi onothileyo

¹³ Omunye wexuku wathi kuye: Mfundisi, akutshele umfowethu abelane lami ilifa.

¹⁴ Kodwa wathi kuye: Ndoda, ngubani ongimise ukuba ngibe ngumthonisisi loba umahlukanisi wempahla kini na?

¹⁵ Wasesithi kibo: Xwayani, liqaphele ubuhwaba bonke, ngoba ukusila komuntu kakuyi ngobunengi bempahla yakhe.

¹⁶ Wasebatshela umfanekiso esithi: Ilizwe lendoda ethile enothileyo lathela kakhulu.

¹⁷ Wanakana lokhu esithi: Ngizakwenza njani na? Ngoba kangilandawo lapho ngingabuthela khona amabele ami.

¹⁸ Wasesithi: Ngizakwenza lokhu, ngizakudiliza iziphala zami, ngakhe ezinkulu, ngibuthele khona amabele ami lempahla yami.

¹⁹ Besengisithi kumphefumulo wami: Mphefumulo, ulempahla ezinengi ezibekelwe iminyaka eminengi; phumula, udle, unathe, uthokoze.

²⁰ Kodwa uNkulunkulu wathi kuye: Wena siphukuphuku, ngalobubusuku umphefumulo wakho uzakubizwa. Phoke, izinto ozilungisileyo zizakuba ngezikabani na?

²¹ Kunjaloke kozibekela inotho yena enganothanga kuNkulunkulu.

Ukukhathazeka, lokuthemba kuNkulunkulu

²² Wasesithi kubafundi bakhe: Ngakhoke ngithi kini: Lingaphisekeli ukusila kwenu ukuba lizakudlani, loba umzimba wenu ukuba lizakwambathani.

²³ Ngoba ukusila kwedlula ukudla, lomzimba wedlula izambatho.

²⁴ Qaphelisisani amawabayi ukuthi kawahlanyeli, kawavuni, kawalaziphala loba izilulu, kanti uNkulunkulu uyawondla. Lina liyazidlula kakhulu inyoni.

²⁵ Nguwuphi kini ongathi ngokuphisekela engezelele ingalo ibenye ebudeni bakhe na?

²⁶ Ngakhoke nxa lingelamandla okwenza into encinyane nje, liphisekelani ngokunye na?

²⁷ Qaphelisisani imiduze ukuthi ikhula kanjani; kayiphothi, kayaluki, kodwa ngithi kini loSolomoni ebucwazicwazini bakhe bonke wayengambathiswanga njengomunye wayo.

²⁸ Uba uNkulunkulu esambathisa ngokunjalo utshani beganga obukhona lamuhla, kusasa buphoswa eziko, uzakulambathisa ngokukhulu kangakanani lina elilokukholwa okuncinyane.

²⁹ Lanike lingadingi elizakukudla lelizakukunatha; lingakhathazeki.

³⁰ Ngoba konke lokhu kufunwa yizizwe zomhlaba; kodwa uYihlo uyazi ukuthi liyakuswela lokhu.

³¹ Kodwa funani umbuso wakhe, zonke lezizinto zizakwengezelelwa kini.

³² Lingesabi, mhlambi omncinyane; ngoba kuyikuthanda kukaYihlo ukulinika umbuso.

³³ Thengisani impahla zenu, liphe iziphiwo; lizenzele imixhaka engagugiyo lenotho engapheliyo ezulwini, lapho kungasondeli isela khona, lalapho inondo ingoni khona.

³⁴ Ngoba lapho kukhona inotho yenu, izakuba khona lapho lenhliziyo yenu.

Umfanekiso wenceku ethembekileyo

³⁵ Inkalo zenu kazihlale zibotshiwe, lezibane zenu zihlale zivutha;

³⁶ lani libe njengabantu abalindele inkosi yabo ukuba ibuye ekhaya ivela emthimbeni, ukuze nxa ifika, iqoqoda, bayivulele masinyane.

³⁷ Zibusisiwe lezonceku okuzakuthi, inkosi nxa ifika, izifumane zilindile. Ngiqinisile ngithi kini: Izakubopha ukhalo lwayo, izihlalise ekudleni, iziphakululele.

³⁸ Loba ifika ngomlindo wesibili ingabe ngowesithathu, izifumane zinjalo, zibusisiwe lezonceku.

³⁹ Kodwa yazini lokhu kokuthi, uba umninindlu ubesazile isikhathi isela elizakufika ngaso, ubengayikuvuma ukuba indlu yakhe ifohlelwe.

⁴⁰ Lanike hlalani lilungile, ngoba iNdodana yomuntu iyeza ngesikhathi elingayilindele ngaso.

⁴¹ UPetro wathi: Nkosi, uwutshela thina sodwa lumfanekiso ingabe utshela bonke na?

⁴² INkosi yasisithi: Nguwuphi umphathi wezinceku othembekileyo lohlakaniphileyo, inkosi yakhe ezakumbeka phezu kwabendlu yayo ukuba abanike isabelo sabo sokudla ngesikhathi esifaneleyo na?

⁴³ Ibusisiwe leyonceku okuzakuthi inkosi yayo, nxa ifika, iyifumane isenza njalo.

⁴⁴ Ngiqinisile ngithi kini: Izakuyibeka phezu kwakho konke elakho.

⁴⁵ Kodwa nxa leyonceku inakana isithi: Inkosi yami iphuzile ukubuya; ibisiqala ukuhlupha izinceku lezincekukazi, idle, inathe, idakwe,

⁴⁶ inkosi yaleyonceku izakufika ngosuku engayilindele ngalo langesikhathi engasaziyo, izakuyiqumaquma, iyabele labangathembekanga.

⁴⁷ Njaloke laleyonceku ebisazi intando yenkosi yayo ingalungiselanga, ingenzanga ngokwentando yenkosi yayo, izakutshaywa imivimvinya eminengi.

⁴⁸ Kodwa leyo ebingayazi yenza okufanele ukutshaywa, izakutshaywa imivimvinya eyingcosana; ilowo lalowo ophiwe okunengi, kuzakubizwa okunengi kuye; lalowo ophathiswe okunengi, kuzakubizwa kuye okungaphezu kwalokho.

Izibonakaliso zezikhathi

⁴⁹ Ngize ukuphemba umlilo emhlabeni; bengifisa kakhulu ukuba ngabe usulumethe.

⁵⁰ Ngilobhaphathizo engizakubhaphathizwa ngalo; ngikhathazekile kakhulu, luze luphelele.

⁵¹ Lithi ngize ukuletha ukuthula emhlabeni na? Ngithi kini: Atshi, ngilethe ukwahlukana.

⁵² Ngoba kusukela kulesisikhathi kuzakuba khona abahlanu endlininye bahlukane phakathi, abathathu balwe lababili, lababili balwe labathathu;

⁵³ bazakwahlukana, uyise alwe lendodana, indodana ilwe loyise; unina alwe lendodakazi, indodakazi ilwe lonina; uninazala alwe lomalokazana, umalokazana alwe loninazala.

⁵⁴ Wasesithi emaxukwini: Nxa libona iyezi liphuma entshonalanga, lihle lithi: Lizakukhiza. Kube njalo.

⁵⁵ Nxa lisizwa kuphephetha umoya waseningizimu, lithi: Lizakutshisa. Kube njalo.

⁵⁶ Lina bazenzisi! liyakwazi ukuchasisa ukuma komhlaba lomkhathi; kodwa kungani lingakwazi ukuchasisa lesisikhathi na?

⁵⁷ Pho, kungani ukuba lingazikhetheli lina uqobo lwenu okulungileyo na?

⁵⁸ Nxa usiya phambi komthonisisi lalowo omangalelene laye, lisesendleleni mncenge ukuba akukhulule, funa akudonsele kumthonisisi, lomthonisisi akunikele kulo inxusa, lenxusa likuphose entolongweni.

⁵⁹ Ngithi kuwe kawusoze waphuma khona, uze ukhokhe indibilitshi yokucina.