ULukha 11 - iBhayibhili Elingcwele 1978

UJesu ufundisa ngokukhuleka

¹ Kwathi ekhuleka endaweni ethile, eseqedile omunye wabafundi bakhe wathi kuye: Nkosi, sifundise ukukhuleka njengoJohane wafundisa abafundi bakhe.

² Wathi kubo: Nxa likhuleka, kalibokuthi: Baba, kalidunyiswe ibizo lakho, umbuso wakho kawuze.

³ Siphe ukudla kwethu insuku ngensuku.

⁴ Usithethelele izono zethu, ngoba lathi sibathethelela bonke abasonayo. Ungasingenisi ekulingweni.

Umfanekiso womngane ofika phakathi kobusuku

⁵ Wasesithi kubo: Nguwuphi kini olomngane, aye kuye phakathi kobusuku, athi kuye: Mngane wami, ake ungeboleke izinkwa ezintathu,

⁶ ngoba kufikile kimi umngane wami evela ekuhambeni, kodwa kangilalutho engingalubeka phambi kwakhe;

⁷ ongaphakathi aphendule athi: Ungangihluphi; umnyango usuvaliwe, labantwana bami balele kanye lami; kangilakuvuka ngikunike?

⁸ Ngithi kini: Loba engazukuvuka amnike ngoba engumngane wakhe, kodwa ngenxa yokuphikelela kwakhe uzakuvuka amnike konke akuswelayo.

⁹ Ngithike kini: Celani, lizakuphiwa; funani, lizakufumana; qoqodani, lizakuvulelwa.

¹⁰ Ngoba ilowo lalowo ocelayo uyamukela, lofunayo uyafumana, loqoqodayo uyavulelwa.

¹¹ Nguwuphi kini onguyise, ongathi uba indodana yakhe icela inhlanzi, ayinike inyoka endaweni yenhlanzi;

¹² uba icela iqanda, ayinike ufezela na?

¹³ Ngakhoke uba lina elingababi likwazi ukubapha abantwana benu iziphiwo ezinhle, kakhulu kangakanani uYihlo osezulwini uzakubapha abacela kuye uMoya oNgcwele.

Isono sokuhlambaza

¹⁴ Wayekhupha umoya omubi oyisimungulu; kwathi esephumile umoya omubi, wakhuluma umuntu oyisimungulu; abantu bamangala.

¹⁵ Kodwa abanye babo bathi: Uyakhupha omoya ababi ngoBelezebule inkosi yomoya ababi.

¹⁶ Abanye bemlinga bafuna kuye isibonakaliso esivela ezulwini.

¹⁷ Kodwa yena eyazi imicabango yenhliziyo zabo wathi kubo: Ilowo lalowo umbuso owahlukene phakathi uyachitheka, lendlu eyahlukene phakathi iyadilika.

¹⁸ Uba uSathane laye ahlukene phakathi kwakhe, umbuso wakhe uzakuma kanjani na? Ngoba lithi lina ngikhupha omoya ababi ngoBelezebule.

¹⁹ Uba mina ngikhupha omoya ababi ngoBelezebule, amadodana enu abakhupha ngobani na? Ngakho wona azakuba ngabathonisisi benu.

²⁰ Kodwa uba ngikhupha omoya ababi ngomunwe kaNkulunkulu, umbuso kaNkulunkulu usufikile phela kini.

²¹ Uba isiqhwaga sihlomile, silinda umuzi waso, impahla yaso ihlezi ngokuthula.

²² Kodwa nxa olamandla kulaso esisukela, asinqobe, uyasamuka izikhali zaso ebesithembele kuzo, ayabe impango yaso.

²³ Lowo ongelami umelene lami; lalowo ongabuthi lami uyahlakaza.

Ukuphenduka okungapheleliyo

²⁴ Nxa umoya omubi esephumile emuntwini, uyadabula indawo ezomileyo efuna ukuphumula; engakufumani uthi: Ngizakubuyela endlini yami engaphuma kuyo.

²⁵ Afikeke, ayifumane ithanyelwe, ilungisiwe.

²⁶ Abesehamba, azithathele abanye omoya abayisikhombisa ababi kulaye, bangene bahlale lapho; ukucina kwalowomuntu kube kubi kulokwakuqala.

²⁷ Kwathi esakhuluma lokhu, owesifazana othile exukwini waphakamisa ilizwi lakhe, wathi: Sibusisiwe isisu esakuthwalayo lamabele owawamunyayo.

²⁸ Kodwa yena wathi: Yebo, kodwa ikakhulu babusisiwe abalizwayo ilizwi likaNkulunkulu, balilondoloze.

Abafuna izibonakaliso

²⁹ Kwathi sekubuthana kuye amaxuku, waqala ukukhuluma, esithi: Lesisizukulwana yisizukulwana esibi; sifuna isibonakaliso, kodwa kasiyikunikwa sibonakaliso, kuphela isibonakaliso sikaJona.

³⁰ Ngoba njengalokhu uJona waba yisibonakaliso kwabaseNinive, iNdodana yomuntu izakuba njalo kulesisizukulwana.

³¹ Inkosikazi yaseningizimu izakusukuma ekuthonisisweni kanye lamadoda alesisizukulwana, iwalahle; ngoba yavela emikhawulweni yomhlaba ukuzwa ukuhlakanipha kukaSolomoni; khangelani, kukhona lapha okukhulu kuloSolomoni.

³² Amadoda aseNinive azasukuma ekuthonisisweni kanye lalesisizukulwana, asilahle; ngoba aphenduka ngokutshumayela kukaJona; khangelani, kukhona lapha okukhulu kuloJona.

Imifanekiso yesibane

³³ Kakho othi eselumathise isibane, asibeke ekusithekeni ingabe ngaphansi kwesitsha, kodwa usibeka esiqobaneni ukuba abangenayo babone ukukhanya.

³⁴ Ilihlo lakho liyisibane somzimba wakho; nxa ilihlo lakho liphilile, umzimba wakho wonke ulokukhanya; kodwa nxa lilibi, umzimba wakho ulomnyama.

³⁵ Ngakho qaphela ukuba ukukhanya okukuwe kungabi ngumnyama.

³⁶ Ngakhoke uba umzimba wakho wonke ulokukhanya ungelandawo emnyama, uzakukhanya wonke njengesibane sikukhanyisa ngokukhanya kwaso.

UJesu usola abaFarisi lezazumlayo

³⁷ Esakhuluma, umFarisi othile wammema ukuba adle laye; wangena, wahlala ekudleni.

³⁸ UmFarisi wamangala ebona ukuthi kaqalanga ngokugeza engakadli.

³⁹ Yasisithi iNkosi kuye: Linake, baFarisi, lihlambulula ingaphandle yenkezo leyesitsha, kodwa ingaphakathi yenu igcwele ukuphanga lobubi.

⁴⁰ Lina zithutha, yena owenza ingaphandle kayenzanga lengaphakathi na?

⁴¹ Kodwa phanini kube yiziphiwo lezozinto ezingaphakathi; khangelanike, konke kuzakuhlambuluka kini.

⁴² Kodwa maye kini baFarisi! ngoba lithela okwetshumi kwemfe, lamakhomane, lokwemibhida yonke, lingananzeleli ukulunga lokumthanda uNkulunkulu. Belifanele ukukwenza lokhu, lingakuyekeli lalokho.

⁴³ Maye kini baFarisi! ngoba lithanda izihlalo ezingaphambili emasinagogeni lokubingelelwa emidangeni.

⁴⁴ Maye kini! ngoba lifana lamaliba angasabonakaliyo, labantu bahambe phezu kwawo bengawazi.

⁴⁵ Omunye wezazumlayo wathi kuye: Mfundisi, ngokutsho lokhu uyasithuka lathi.

⁴⁶ Yena wathi: Maye lakini zazumlayo! ngoba lethwesa abantu imithwalo enzima ukuthwalwa. Kodwa lina uqobo lwenu kaliyithinti leyomithwalo langowodwa nje umunwe.

⁴⁷ Maye kini! ngoba liyawakha amaliba abaprofethi ababulawa ngokhokho benu.

⁴⁸ Ngalokhuke lingofakazi, livumelana lemisebenzi yabokhokho benu; ngoba bona bababulala, linake liyawakha amaliba abo.

⁴⁹ Ngalokhuke ukuhlakanipha kukaNkulunkulu kwathi: Ngizakubathumela abaprofethi labaphostoli; abanye bazakubabulala, abanye babazingele,

⁵⁰ ukuze kubizwe kulesisizukulwana igazi labaprofethi bonke elachithwa kusukela ekudatshulweni komhlaba,

⁵¹ kusukela egazini likaAbela kuze kufike egazini likaZekariya owabulawa phakathi kwealtare lethempeli. Yebo, ngithi kini: Lizakubizwa kulesisizukulwana.

⁵² Maye kini zazumlayo! ngoba lisusile ikhiye yokwazi. Kalingenanga lina uqobo lwenu, labangenayo labavimbela.

⁵³ Kwathi ephuma lapho, labaFarisi baqala ukumngxamela lokumbuza izinto ezinengi,

⁵⁴ bemthiya ukuze babambe ulutho oluphuma emlonyeni wakhe.