ULukha 10 - iBhayibhili Elingcwele 1978

Ukuthunywa kwabafundi abangamatshumi ayisikhombisa

¹ Emva kwalokho iNkosi yamisa abanye abangamatshumi ayisikhombisa, yabathuma ngababili ngaphambi kwayo emizini lasendaweni zonke ebizakuya kuzo yona.

² Yathi kubo: Ukuvuna kukhulu, kodwa izisebenzi ziyingcosana; ngakhoke celani eNkosini yokuvuna ukuba ithumele izisebenzi ekuvuneni kwayo.

³ Hambani; ngiyalithuma linjengezimvu phakathi kwempisi.

⁴ Lingaphathi umxhaka, lasikhwama, lamanyathelo, lingabingeleli muntu endleleni.

⁵ Lakuyiphi indlu elingena kuyo, qalani lithi: Ukuthula kakube kulindlu.

⁶ Kuzakuthi uba kukhona lapho indodana yokuthula, ukuthula kwenu kuhlale phezu kwayo; kodwa uba kungenjalo, kuzakubuyela kini.

⁷ Hlalani kuleyondlu, lidle, linathe abalipha khona; ngoba isisebenzi sifanele umvuzo waso. Linganqumi lezindlu.

⁸ Lakuwuphi umuzi elingena kuwo, balamukele, dlanini okubekwa phambi kwenu;

⁹ lisilise abagulayo abakuwo, lithi kubo: Umbuso kaNkulunkulu ususondele kini.

¹⁰ Kodwa lakuwuphi umuzi elingena kuwo, bangalamukeli, phumelani endleleni zawo, lithi:

¹¹ Lothuli lomuzi wenu olunamathele enyaweni zethu siyaluthintithela kini; kodwake yazini lokhu ukuthi umbuso kaNkulunkulu ususondele.

¹² Ngithi kini: Kuzakuba ngcono kwabaseSodoma ngalolosuku kulakulowomuzi.

Ukusolwa kwemizi engaphendukanga

¹³ Maye kuwe Korazini! Maye kuwe Betsayida! Ngoba uba kwakwenziwe eTire leSidoni imisebenzi yamandla eyenziwe kini, ngabe kade baphenduka, bahlala ngamasaka emlotheni.

¹⁴ Kodwa kuzakuba ngcono kwabaseTire leSidoni ekuthonisisweni kulakini.

¹⁵ Lawe Kapenawume uzakuphakanyiselwa ezulwini na? Atshi! Uzakwehliselwa endaweni yabafileyo.

¹⁶ Olizwayo lina uyangizwa mina; olalayo lina uyangala mina; ongalayo mina uyamala ongithumileyo.

Ukubuya kwabangamatshumi ayisikhombisa

¹⁷ Babuyake abangamatshumi ayisikhombisa ngokuthokoza, besithi: Nkosi, labomoya ababi bayasithobela ngebizo lakho.

¹⁸ Wathi kibo: Ngabona uSathane enjengombane esiwa ezulwini.

¹⁹ Khangelani, ngilinikile amandla okunyathela inyoka lofezela, lokunyathela amandla wonke esitha; kaliyikulinyazwa lutho.

²⁰ Lingathokozi ngalokho okokuthi omoya bayalithobela, kodwa thokozani ngokuthi amabizo enu alotshiwe ezulwini.

UJesu udumisa uYise

²¹ Ngalesosikhathi wathokoza ngoMoya oNgcwele, wathi: Ngiyakubonga, Baba, Nkosi yezulu lomhlaba, ngoba ukufihlile lokhu kwabahlakaniphileyo labaqedisisayo, wakwambulela izingane; yebo, Baba, ngoba kwaba kuhle kuwe ukuba kube njalo.

²² Konke ngikunikelwe nguBaba; kakho owaziyo ukuthi iNdodana ingubani, kuphela uYise, lokuthi uYise ungubani, kuphela iNdodana, lalowo iNdodana ethanda ukumambulela yena.

²³ Wasephendukela kubafundi bebodwa, wathi: Abusisiwe amehlo abona elikubonayo.

²⁴ Ngoba ngithi kini: Banengi abaprofethi lamakhosi ababethanda ukubona elikubonayo, kodwa kabakubonanga, lokuzwa elikuzwayo, kabakuzwanga.

Umlayo wokuqala

²⁵ Kwasekusukuma isazumlayo simlinga sisithi: Mfundisi, ngizakwenzani ukuze ngidle ilifa lokuphila okungapheliyo na?

²⁶ Wathi kuso: Kulotshweni emlayweni, uwufunda kanjani na?

²⁷ Saphendula sathi: Wothanda iNkosi uNkulunkulu wakho ngenhliziyo yakho yonke, langomphefumulo wakho wonke, langamandla akho wonke, langengqondo yakho yonke, lomakhelwane wakho njengalokhu uzithanda wena.

²⁸ Wathi kuso: Uphendule kuhle; yenza lokhu, uzakuphila.

Umfanekiso womSamariya olesihawu

²⁹ Kodwa yena ethanda ukuzilungisa wathi kuJesu: Umakhelwane wami ungubani na?

³⁰ UJesu waphendula wathi: Umuntu othile wehla evela eJerusalema esiya eJeriko; watheleka phakathi kwabaphangi abamhlubula impahla, bamtshaya, basuka bahamba bamtshiya ephos’ ukufa.

³¹ Umpristi othile waqabuka esehla ngaleyondlela; wathi embona wanqwetha, wadlula eceleni.

³² Kwaba njalo lomLevi, efika kuleyondawo embona wanqwetha, wadlula eceleni.

³³ Kodwa umSamariya othile owayesendleleni wafika kuye; kwathi embona wamhawukela.

³⁴ Waya kuye, wabopha amanxeba akhe ewathela amagcobo lewayini, wamkhwelisa enyamazaneni yakhe, wamusa endlini yezihambi, wamlondoloza.

³⁵ Ngakusasa wakhupha inhlamvu ezimbili zemali, wazinika umninindlu, esithi: Umlondoloze, uba uchitha okudlula lokhu, ngizakubuyisela kuwe ekubuyeni kwami.

³⁶ Kambe nguwuphi ngokubona kwakho kulaba abathathu owaba ngumakhelwane wakhe owatheleka phakathi kwabaphangi na?

³⁷ Wathi: Ngulowo owamenzela isihawu. Wasesithi kuye uJesu: Hamba wenze njalo lawe.

UMatha loMariya

³⁸ Kwathi ekuhambeni kwakhe wangena emzini othile; owesifazana othiwa nguMatha, wamamukela endlini yakhe.

³⁹ Wayelodadewabo othiwa nguMariya, owahlala ngasenyaweni zeNkosi, walizwa ilizwi layo.

⁴⁰ Kodwa uMatha wakhathazeka ngokusebenza okunengi. Weza kuye wathi: Nkosi, kawukhathaleli ukuthi udadewethu ungitshiyile ukusebenza ngedwa na? Ake umtshele ukuba angisize.

⁴¹ Kodwa iNkosi yamphendula yathi: Matha, Matha, uyaphisekela izinto, ukhathazeke ngokunengi.

⁴² Kodwa yinye into edingekayo; uMariya ukhethile isabelo esihle angayikwamukwa sona.