ULevi 9 - iBhayibhili Elingcwele 1978

UAroni unikela iminikelo

¹ Ngosuku lwesificaminwembili uMose wabiza uAroni lamadodana akhe labalisa bakoIsrayeli.

² Wathi kuAroni: Thatha ithole elingelasici libe ngumnikelo wesono, lenqama engelasici ibe ngumnikelo wokutshiswa, ukunikele eNkosini.

³ Tshono ebantwini bakoIsrayeli uthi: Thathani impongo ibe ngumnikelo wesono, lethole lewundlu, womabili abe lomnyaka munye angelasici, abe ngumnikelo wokutshiswa,

⁴ lithathe lenkabi lenqama zibe yiminikelo yokuthula, zihlatshwe phambi kweNkosi, lomnikelo wempuphu exubene lamafutha; ngoba lamhla iNkosi izabonakala kini.

⁵ Basebeletha lokho uMose akulayayo emnyango wethente lokuhlangana; lonke ibandla lasondela, lema phambi kweNkosi.

⁶ UMose wathi: Yikho lokhu iNkosi elilaye ngakho ukuba likwenze, lenkazimulo yeNkosi izabonakala kini.

⁷ UMose wathi kuAroni: Sondela ealtareni, unikele umnikelo wakho wesono lomnikelo wakho wokutshiswa, uzenzele wena labantu indlela yokubuyisana; letha lomnikelo wabantu, ubenzele indlela yokubuyisana, njengokulaya kweNkosi.

⁸ UAroni wasesondela ealtareni, walihlaba ithole lomnikelo wesono ongowakhe.

⁹ Amadodana kaAroni amnika igazi, wacwilisa umunwe wakhe kulo, walininda empondweni zealtare, walithululela phansi kwealtare;

¹⁰ kodwa amahwahwa, lezinso, lamahwahwa angaphezu kwesibindi emnikelweni wesono wakutshisa ealtareni, njengokutsho kweNkosi kuMose.

¹¹ Watshisa inyama lesikhumba ngomlilo ngaphandle kwezihonqo.

¹² Wasehlaba umnikelo wokutshiswa; amadodana akhe amnika igazi, walikhaphazela ealtareni inxa zonke.

¹³ Amnika umnikelo wokutshiswa izitho ngezitho kanye lenhloko; wakutshisa ealtareni.

¹⁴ Wagezisa imibilini lemilenze, wayitshisa kanye lomnikelo wokutshiswa ealtareni.

¹⁵ Waseletha umnikelo wabantu, wathatha imbuzi yomnikelo wesono ongowabantu, wayihlaba, wanikela ngayo ngenxa yesono, njengomnikelo wokuqala.

¹⁶ Waletha umnikelo wokutshiswa, wanikela ngawo njengokwesimiso.

¹⁷ Waseletha umnikelo wempuphu, wagcwalisa isandla sakhe ngawo, wawutshisa ealtareni kanye lomnikelo wokutshiswa wasekuseni.

¹⁸ Wahlaba lenkabi lenqama ezingumhlatshelo weminikelo yokuthula owabantu; amadodana akhe amnika igazi; walikhaphazela ealtareni inxa zonke.

¹⁹ Amahwahwa enkabi lawenqama, lomsila ononileyo, ledanga lemibilini, lezinso, lamahwahwa angaphezu kwesibindi,

²⁰ amadodana akhe abeka amahwahwa la phezu kwezifuba; uAroni wawatshisa ealtareni;

²¹ kodwa izifuba lomlenze wokunene uAroni wakuzunguza zaba ngumnikelo wokuzunguzwa phambi kweNkosi, njengokulaya kukaMose.

²² UAroni wasephakamisela izandla zakhe ebantwini, wababusisa. Wehla ekunikeleni umnikelo wesono lomnikelo wokutshiswa leminikelo yokuthula.

²³ UMose loAroni bangena ethenteni lokuhlangana; ekuphumeni kwabo bababusisa abantu, lenkazimulo yeNkosi yabonakala kubo bonke.

²⁴ Kwavela umlilo eNkosini, watshisa umnikelo wokutshiswa lamahwahwa ealtareni. Abantu bathi ukukubona lokhu bamemeza, bawa ngobuso.