ULevi 8 - iBhayibhili Elingcwele 1978

Ukugcotshwa kukaAroni lamadodana akhe

¹ INkosi yathi kuMose:

² Thatha uAroni lamadodana akhe, lezambatho, lamagcobo okugcoba, lenkunzi yomnikelo wesono, lezinqama ezimbili, lesitsha sezinkwa ezingelamvubelo,

³ ubuthanise lonke ibandla ngasemnyango wethente lokuhlangana.

⁴ UMose wenza njengokutsho kweNkosi kuye, ibandla labuthana ngasemnyango wethente lokuhlangana.

⁵ UMose wathi ebandleni: Yikho lokhu iNkosi elaye ukuba kwenziwe.

⁶ UMose wasondeza uAroni lamadodana akhe, wabagezisa ngamanzi.

⁷ UAroni wamambathisa ibhatshi, wambopha ngebhanti, wamgqokisa isigqoko lengubo yamahlombe, wambopha ngebhanti elalukiweyo lengubo yamahlombe, wayibophela kuye ngalo.

⁸ Wamambathisa ingubo yesifuba, wabeka inkatho iUrimi leThumimi engutsheni yesifuba.

⁹ Wamthwalisa iqhiye ekhanda lakhe; phezu kweqhiye, ngaphambili, wabeka incence yegolide, umqhele ongcwele, njengalokhu iNkosi imlayile.

¹⁰ UMose wasethatha amagcobo okugcoba, waligcoba iTabernakeli lakho konke okuphakathi kwalo, wakwahlukanisela iNkosi.

¹¹ Wafafaza ngawo ialtare kasikhombisa, wagcoba ialtare lezitsha zalo zonke, lomkolo walo lenyawo zawo, ukuba akwahlukanisele iNkosi.

¹² Wathela amagcobo okugcoba ekhanda likaAroni, wamgcoba, ukuba amahlukanisele iNkosi.

¹³ UMose wasesondeza amadodana kaAroni, wawambathisa amabhatshi, wawabopha ngamabhanti, wawathwalisa izingowane, njengalokhu iNkosi imlayile.

¹⁴ Waseletha inkunzi yomnikelo wesono; uAroni lamadodana akhe babeka izandla zabo enhlokweni yenkunzi yomnikelo wesono.

¹⁵ UMose wayihlaba, wathatha igazi, walininda ngomunwe wakhe empondweni zealtare inxa zonke, wahlambulula ialtare, wathululela igazi phansi kwealtare, walahlukanisela iNkosi ukuba alenzele indlela yokubuyisana.

¹⁶ Wathatha lonke idanga lemibilini, lamahwahwa angaphezu kwesibindi, lezinso zombili lamahwahwa azo, wakutshisa ealtareni.

¹⁷ Kodwa inkunzi, lesikhumba sayo, lenyama yayo, lomswane wayo wakutshisa ngomlilo ngaphandle kwezihonqo, njengalokhu iNkosi imlayile.

¹⁸ Waseletha inqama yomnikelo wokutshiswa; uAroni lamadodana akhe babeka izandla zabo enhlokweni yenqama.

¹⁹ UMose wayihlaba, wakhaphazela igazi ealtareni inxa zonke.

²⁰ Lapho uMose esehlahlele inqama, watshisa inhloko lezitho lamahwahwa.

²¹ Wagezisa imibilini lemilenze ngamanzi, watshisa inqama yonke ealtareni, yaba ngumnikelo wokutshiswa olephunga elimnandi, lomnikelo owenzelwe iNkosi ngomlilo, njengokutsho kwayo kuMose.

²² Waseletha enye inqama, inqama esetshenziswa ekugcotshweni kompristi; uAroni lamadodana akhe babeka izandla zabo enhlokweni yenqama.

²³ UMose wayihlaba, wathatha igazi layo, walininda oqwangeni lwendlebe yokunene kaAroni, lasesithupheni sesandla sakhe sokunene, lasezwaneni elikhulu lonyawo lwakhe lokunene.

²⁴ Wasesondeza amadodana kaAroni, waninda igazi oqwangeni lwezindlebe zawo zokunene, lasezithupheni zezandla zawo zokunene, lasemazwaneni amakhulu enyawo zawo zokunene, wakhaphazela igazi ealtareni inxa zonke.

²⁵ Wasethatha amahwahwa, lomsila ononileyo, ledanga lonke lemibilini, lamahwahwa angaphezu kwesibindi, lezinso zombili lamahwahwa azo, lomlenze wokunene,

²⁶ wakhupha esitsheni sezinkwa ezingelamvubelo esasiphambi kweNkosi iqebelangwana laba linye elingelamvubelo, leqebelengwana laba linye elilamafutha, lesinkwa esincinyane, wakubeka phezu kwamahwahwa laphezu komlenze wokunene;

²⁷ wakubeka konke ezandleni zikaAroni lezandleni zamadodana akhe, wakuzunguza kwaba ngumnikelo wokuzunguzwa phambi kweNkosi.

²⁸ UMose wasekuthatha ezandleni zabo, wakutshisa ealtareni lomnikelo wokutshiswa, kwaba ngumnikelo wenkonzo yokugcotshwa olephunga elimnandi, umnikelo owenzelwe iNkosi ngomlilo.

²⁹ UMose wathatha isifuba, wasizunguza saba ngumnikelo wokuzunguzwa phambi kweNkosi; sasiyisabelo sakhe senqama yenkonzo yokugcotshwa, njengokulaywa kwakhe yiNkosi.

³⁰ UMose wasethatha amagcobo okugcoba legazi elalisealtareni, wachela ngakho uAroni lezambatho zakhe, lamadodana akhe lezambatho zawo. Ngalokhu wahlukanisela iNkosi uAroni lezambatho zakhe, lamadodana akhe lezambatho zawo.

³¹ UMose wathi kuAroni lamadodana akhe: Phekani inyama ngasemnyango wethente lokuhlangana, liyidle lapho lezinkwa ezisesitsheni seminikelo yenkonzo yokugcotshwa, njengokulaya kwami ngisithi: UAroni lamadodana akhe bazakukudla.

³² Okuseleyo kwenyama lokwezinkwa likutshise ngomlilo.

³³ Lingaphumi ngomnyango wethente lokuhlangana insuku eziyisikhombisa, zize ziphele insuku zokugcotshwa kwenu, ngoba ukugcotshwa kwenu kuzathatha insuku eziyisikhombisa.

³⁴ Konke okwenziweyo lamhla iNkosi ilayile ukuba kwenziwe, ukuze lenzelwe indlela yokubuyisana.

³⁵ Lizakuhlala ngasemnyango wethente lokuhlangana insuku eziyisikhombisa, emini lasebusuku, lenze izilayezelo zeNkosi ukuba lingafi; ngoba mina ngilayiwe kanjalo.

³⁶ UAroni lamadodana akhe benza izinto zonke iNkosi eyamlaya uMose zona.