ULevi 6 - iBhayibhili Elingcwele 1978

¹ INkosi yathi kuMose:

² Uba umuntu esona, esenza isiphambeko eNkosini ngokukhohlisa umakhelwana wakhe mayelana lalokho okunikezwa kuye ukuba akulondoloze, loba mayelana lesibambiso, loba ephanga umakhelwane wakhe loba emcindezela,

³ ingabe efumana lokho obekulahlekile, akuphike, aqambe amanga ngakho — ngitsho kwenye yalezozinto umuntu ayenzayo, one ngayo —

⁴ kuzakuthi nxa esenza njalo, abe lecala, uzabuyisa lokho akuphangileyo, loba lokho owakuzuza ngokucindezela, loba lokho okwanikezwa kuye ukuba akulondoloze, loba lokho obekulahlekile akufumeneyo,

⁵ ingabe okunye akhulume amanga ngakho; kakubuyise konke, engezelele okwesihlanu kukho, amnike lowomuntu okungokwakhe ngosuku avuma ngalo icala lakhe.

⁶ Kalethe eNkosini umnikelo wakhe wecala, athathe emhlambini inqama engelasici, elentengo elingana lentengo yomnikelo wecala, ayise kumpristi,

⁷ umpristi amenzele indlela yokubuyisana phambi kweNkosi, athethelelwe konke akwenzileyo waba lecala ngakho.

Eminye imilayo ngeminikelo

⁸ INkosi yathi kuMose:

⁹ Laya uAroni lamadodana akhe uthi: Nanku umlayo womnikelo wokutshiswa. Umnikelo wokutshiswa uzakuhlala eziko lealtare ubusuku bonke kuze kuse, lomlilo wealtare uvuthe njalo phezu kwalo.

¹⁰ Umpristi uzakugqoka isambatho sakhe selembu elihle, lebhulugwe lakhe lelembu elihle, athathe umlotha womnikelo wokutshiswa otshiswe ngumlilo ealtareni, awubeke ngasealtareni.

¹¹ Abesekhumula izambatho zakhe, embathe ezinye izambatho, akhuphele umlotha ngaphandle kwezihonqo endaweni ehlambulukileyo.

¹² Umlilo ophezu kwealtare uzakuvutha njalo, ungacimi; zonke insuku ekuseni umpristi uzakuwukhwezela afake inkuni, abeke kuhle umnikelo wokutshiswa phezu kwealtare, atshise kulo amahwahwa eminikelo yokuthula.

¹³ Umlilo uzakuvutha ealtareni kokuphela, ungacimi.

¹⁴ Nanku umlayo womnikelo wempuphu. Amadodana kaAroni azakuwunikela phambi kweNkosi, ngaphambi kwealtare.

¹⁵ Kakucutshwe impuphu ecolekileyo yomnikelo wempuphu, lamafutha awo kanye lenhlaka yonke ephezu komnikelo wempuphu, kutshiswe ealtareni kube yisikhumbuzo lephunga elimnandi eNkosini.

¹⁶ Okuseleyo kuwo uAroni lamadodana akhe bazakukudla, bakudle njengezinkwa ezingelamvubelo endaweni engcwele, egumeni lethente lokuhlangana.

¹⁷ Kakuyikufakwa imvubelo. Ngikunike kube yisabelo sabo seminikelo yami eyenziwe ngomlilo; kuyinto engcwele kakhulu, njengomnikelo wesono lomnikelo wecala.

¹⁸ Bonke abantwana besilisa bakaAroni bangakudla, ngoba kuyisabelo sabo kokuphela ezizukulwaneni zenu esivela eminikelweni eyenzelwe iNkosi ngomlilo; bonke abakuthintayo bazakuba ngcwele.

¹⁹ INkosi yathi kuMose:

²⁰ Lo ngumnikelo uAroni lamadodana akhe abazakuwunikela eNkosini ngosuku lokugcotshwa kwakhe; kabanikele ngengxenye yehefa lempuphu ecolekileyo ibe ngumnikelo wempuphu wensuku zonke, banikele ingxenye yayo ekuseni lengxenye kusihlwa.

²¹ Uzakulungiselwa emganwini wensimbi ngamafutha. Uwulethe usuxutshanisiwe kuhle, ube ngumnikelo wempuphu onikelwa ngencezu eziphekiweyo, zibe liphunga elimnandi eNkosini.

²² Umpristi oyindodana kaAroni, ogcotshiweyo ukuba athathe isikhundla sakhe, uzakuwunikela eNkosini; lokhu kuyisimiso esingelakuphela. Lumnikelo wonke uzakutshiselwa iNkosi.

²³ Yonke iminikelo yempuphu yompristi izakutshiswa, ingadliwa.

²⁴ INkosi yathi kuMose:

²⁵ Tshono kuAroni lamadodana akhe uthi: Nanku umlayo womnikelo wesono. Umnikelo wesono uzakuhlatshwa phambi kweNkosi endaweni lapho kuhlatshelwa khona umnikelo wokutshiswa; ungcwele kakhulu.

²⁶ Umpristi owunikelela isono uzakuwudla; udlelwe endaweni engcwele, egumeni lethente lokuhlangana.

²⁷ Konke okuthinta inyama yawo kuzakuba ngcwele; nxa igazi lawo lichaphakela esigqokweni, gezisela lesosigqoko endaweni engcwele.

²⁸ Imbiza yebumba esigeziswe kuyo ngamanzi abilayo kayibulawe; kodwa uba sigeziswa embizeni yethusi, kayiphalwe, ihlanzwe ngamanzi.

²⁹ Bonke abapristi besilisa bangawudla, ungcwele kakhulu.

³⁰ Kodwa kakungadliwa umnikelo wesono okungeniswa igazi lawo ethenteni lokuhlangana ukuba kwenziwe ukubuyisana endaweni engcwele; kawutshiswe ngomlilo.