ULevi 27 - iBhayibhili Elingcwele 1978

Imilayo yezithembiso ezithile

¹ INkosi yathi kuMose:

² Tshono ebantwini bakoIsrayeli uthi: Nxa umuntu ethembisa isithembiso esithile eNkosini sokunika okulingana lomuntu,

³ akwenze lokhu. Owesilisa oleminyaka engamatshumi amabili kusiya eminyakeni engamatshumi ayisithupha, uzakulingana lamashekeli esiliva angamatshumi amahlanu ngokweshekeli lendlu engcwele;

⁴ owesifazana uzakulingana lamashekeli angamatshumi amathathu.

⁵ Owesilisa oleminyaka emihlanu kusiya eminyakeni engamatshumi amabili, uzakulingana lamashekeli angamatshumi amabili; owesifazana uzalingana lamashekeli alitshumi.

⁶ Umntwana olenyanga eyodwa kusiya eminyakeni emihlanu, uba engumfana, uzakulingana lamashekeli amahlanu; uba eyinkazana, uzalingana lamashekeli amathathu.

⁷ Umuntu oleminyaka engamatshumi ayisithupha lengaphezulu, uba engowesilisa, uzalingana lamashekeli alitshumi lanhlanu; uba engowesifazana, uzalingana lamashekeli alitshumi.

⁸ Uba umuntu othembisileyo engumyanga, esehluleka ukunika ngokunjalo, uzakuletha lowomuntu kumpristi; umpristi uzakumlinganisa njengokwamandla akhe owathembisayo.

⁹ Uba kuyinyamazana okunganikelwa ngayo eNkosini, konke okunje okunikelwa ngakho eNkosini kungcwele.

¹⁰ Umuntu angathathi okunye endaweni yayo, futhi angenaniseli ngayo, loba enhle ngembi loba embi ngenhle. Uba usenaniselana lomunye inyamazana ngenyamazana, zombili zizakuba ngcwele.

¹¹ Uba kuyinyamazana engcolileyo okungavunyelwa ukunikelwa ngayo eNkosini, umuntu uzakuyiletha kumpristi,

¹² umpristi ayilinganise, atsho ukuthi yinhle loba yimbi; izakuba yilokho okuzatshiwo ngumpristi.

¹³ Kodwa uba efisa ukuyihlenga, uzakwengezelela okwesihlanu kwayo phezu kwalokho kokulinganisa kwakhe.

¹⁴ Nxa umuntu esahlukanisela iNkosi indlu yakhe, umpristi uzakuyilinganisa, atsho ukuthi yinhle loba yimbi; izakuba njengokutsho kompristi.

¹⁵ Uba lowo oyehlukanisela iNkosi efisa ukuyihlenga, uzakwengezelela phezu kwemali yokulinganiswa kwayo okwesihlanu, indlu ibe ngeyakhe.

¹⁶ Uba umuntu esahlukanisela iNkosi ingxenye yensimu eyilifa lakhe, okulinganiswa kwayo kuzalingana lenhlanyelo engahlanyelwa lapho. Ihomeri lebhali lizakulingana lamashekeli esiliva engamatshumi amahlanu.

¹⁷ Uba esahlukanisela iNkosi insimu yakhe ngomnyaka weJubili, lokho okulingana layo kuzakuma.

¹⁸ Kodwa uba esahlukanisela iNkosi insimu yakhe emva kweJubili, umpristi uzakubala imali yeminyaka eseleyo kuze kufike umnyaka weJubili, kuncitshiswe ngemali leyo.

¹⁹ Uba lowo owehlukanisela iNkosi insimu efisa ukuyihlenga, uzakwengezelela phezu kwemali yokulinganiswa kwayo okwesihlanu, ibe ngeyakhe.

²⁰ Kodwa uba engafisi ukuyihlenga insimu, loba eseyithengisele omunye umuntu, kayisayikuhlengwa futhi;

²¹ lapho iyekelwa ngomnyaka weJubili izakuba ngcwele eNkosini, ibe njengensimu eyahlukaniswayo, ibe ngeyompristi.

²² Uba esahlukanisela iNkosi insimu ayithengileyo, engesiyo insimu eyilifa lakhe,

²³ umpristi uzakubala imali yeminyaka eseleyo kuze kufike umnyaka weJubili, lomuntu akhuphe leyomali ngalolosuku, ibe yinto engcwele eNkosini.

²⁴ Ngomnyaka weJubili insimu izabuyiselwa kulowo eyathengwa kuye, ngoba insimu iyilifa lakhe.

²⁵ Konke ukulinganisa kuzakuba ngokweshekeli lendlu engcwele; amagera angamatshumi amabili azakulingana leshekeli.

²⁶ Izibulo lenyamazana, ngoba izibulo ngeleNkosi, kalisoze lehlukaniselwa iNkosi ngumuntu; loba lingelenkomo loba lingelemvu, lingeleNkosi.

²⁷ Uba liyinyamazana engcolileyo, umuntu angalihlenga ngokunika okulingana lalo, kodwa engezelele kulo okwesihlanu; uba lingahlengwa, lizakuthengiswa ngokulinganiswa kwalo.

²⁸ Kodwa lokho umuntu akwehlukanisele iNkosi, kakuyikuthengiswa, futhi kakuyikuhlengwa; ngitsho konke alakho, loba kungumuntu, loba inyamazana, loba insimu eyilifa lakhe; konke okwehlukaniselwe iNkosi kungcwele kakhulu eNkosini.

²⁹ Umuntu oqalekisiweyo angeke ahlengwe; uzakubulawa.

Mayelana lokwetshumi

³⁰ Okwetshumi konke kwelizwe, loba okwenhlanyelo yelizwe loba okwezithelo zezihlahla, kungokweNkosi; kungcwele eNkosini.

³¹ Uba umuntu efisa ukuhlenga okuthile okokwetshumi kwakhe, uzakwengezelela kukho okwesihlanu kwakho.

³² Lakho konke okwetshumi kwezinkomo lezimvu, okwetshumi kwazo zonke ezidlula ngaphansi kwentonga yomalusi, kuzakuba ngcwele eNkosini.

³³ Umuntu angayihloli ukuba abone ukuthi yinhle loba yimbi, futhi angenaniselani ngayo. Uba esenaniselana ngayo, yona lalokho enaniselana ngakho kuzakuba ngcwele, kakuyikuhlengwa.

³⁴ Leyo yimilayo iNkosi eyamnika yona uMose entabeni yaseSinayi ukuba ayinike abantu bakoIsrayeli.