ULevi 24 - iBhayibhili Elingcwele 1978

Ukulondolozwa kwezibane

¹ INkosi yathi kuMose:

² Laya abantu bakoIsrayeli ukuba bakulethele amafutha amaoliva elungiselwe ukukhanyisa ukuze izibane zivuthe insuku zonke.

³ Ngaphandle kweveli lobufakazi, ethenteni lokuhlangana, uAroni uzakuzilondoloza phambi kweNkosi, kusukela kusihlwa kuze kube sekuseni; lokhu kuzakuba yisimiso esingelakuphela ezizukulwaneni zenu.

⁴ Uzakulungisa njalo izibane ezisoluthini lwesibane lwegolide elihle phambi kweNkosi.

Izinkwa ezehlukaniselwa iNkosi

⁵ Uzathatha impuphu ecolekileyo, upheke ngayo amaqebelengwana aficaminwembili, elinye lelinye libe lengxenye yehefa lempuphu.

⁶ Uwabeke etafuleni yegolide elihle kube lemizila emibili, omunye lomunye umzila ube lamaqebelengwana ayisithupha;

⁷ futhi ubeke inhlaka emizileni yomibili, ibe yisikhumbuzo kanye lesinkwa, lomnikelo owenzelwe iNkosi ngomlilo.

⁸ Ngawo wonke amaSabatha uAroni uzakuzilungisa ngalo phambi kweNkosi ngenxa yabakoIsrayeli, kube yisivumelwano esingelakuphela.

⁹ Zizakuba ngezikaAroni lezamadodana akhe, bazidle endaweni engcwele; ngoba zingcwele kakhulu, zingezakhe ezivela eminikelweni eyenzelwe iNkosi ngomlilo. Lokhu kuyisimiso esingelakuphela.

Imithetho emayelana lokuhlambaza lokubulala

¹⁰ Kwaphuma ebantwini bakoIsrayeli umuntu othile, unina engowakoIsrayeli loyise engowaseGibithe. Waxabana lomuntu wakoIsrayeli ezihonqweni,

¹¹ wahlambaza iBizo elingcwele, wathuka. Waselethwa kuMose. Ibizo likanina lalinguShelomithi, indodakazi kaDibiri, owesizwe sakoDani.

¹² Wafakwa entolongweni, kuze kwaziwe intando yeNkosi.

¹³ INkosi yathi kuMose:

¹⁴ Khuphela ngaphandle kwezihonqo lowo owathukayo; bonke abamuzwayo kababeke izandla zabo ekhanda lakhe, batshengise ukuthi ulecala, lebandla lonke limkhande ngamatshe.

¹⁵ Uthi ebantwini bakoIsrayeli: Othuka uNkulunkulu wakhe uzakuthwala isono sakhe.

¹⁶ Ohlambaza ibizo leNkosi kabulawe; lonke ibandla lizakumkhanda ngamatshe. Owezizweni ohlala phakathi kwenu laye owokuzalwa elizweni, nxa behlambaza iBizo elingcwele, bazakubulawa.

¹⁷ Obulala umuntu kabulawe.

¹⁸ Otshaya inyamazana ize ife uzakuyihlawula, kube yikuphila ngokuphila.

¹⁹ Nxa umuntu elimaza umakhelwana wakhe, kuzakwenziwa kuye njengalokho enzile,

²⁰ kube yikwephuka ngokwephuka, lelihlo ngelihlo, lezinyo ngezinyo; njengalokho elimazile umuntu, laye uzakulinyazwa kanjalo.

²¹ Obulalayo inyamazana uzakuyihlawula; obulalayo umuntu uzakubulawa.

²² Lizakuba lomlayo munye kowezizweni lakowokuzalwa elizweni. Ngoba ngiyiNkosi uNkulunkulu wenu.

²³ UMose wakhulumake ebantwini bakoIsrayeli. Bamkhuphela ngaphandle kwezihonqo lowo owathukayo, bamkhanda ngamatshe. Abantu bakoIsrayeli benza njengokutsho kweNkosi kuMose.