ULevi 23 - iBhayibhili Elingcwele 1978

Imikhosi emisiweyo

¹ INkosi yathi kuMose:

² Tshono ebantwini bakoIsrayeli uthi: Nansi imikhosi yeNkosi elizakuyimemezela ibe zinkonzo ezinkulu, imikhosi yami emisiweyo.

³ Umsebenzi uzakwenziwa insuku eziyisithupha; kodwa usuku lwesikhombisa luzakuba liSabatha lokuphumula, lube lusuku lwenkonzo enkulu; lingasebenzi ngalo; luyiSabatha eNkosini kuyo yonke imizi yenu.

⁴ Nansi imikhosi emisiweyo yeNkosi, izinkonzo ezinkulu elizakuzimemezela ngezikhathi zayzo ezimisiweyo.

⁵ Usuku lwetshumi lane lwenyanga yokuqala, kusihlwa, luliPhasika leNkosi.

⁶ Usuku lwetshumi lanhlanu lwaleyonyanga lungumkhosi wesinkwa esingelamvubelo eNkosini; dlanini isinkwa esingelamvubelo insuku eziyisikhombisa.

⁷ Wobani lenkonzo enkulu ngosuku lokuqala; lingasebenzi ngalo.

⁸ Nikelani umnikelo owenzelwe iNkosi ngomlilo insuku eziyisikhombisa. Ngosuku lwesikhombisa kuzakuba khona inkonzo enkulu; lingasebenzi ngalo.

⁹ INkosi yathi kuMose:

¹⁰ Tshono ebantwini bakoIsrayeli uthi: Lapho selifikile elizweni engilinika lona, livune isivuno salo, lethani isithungo senu sokuqala kumpristi,

¹¹ azunguze isithungo phambi kweNkosi ukuba lamukeleke. Umpristi uzakusizunguza ngosuku olulandela iSabatha.

¹² Ngosuku elizunguza ngalo isithungo, nikelani ngewundlu eliduna elilomnyaka munye, elingelasici, libe ngumnikelo wokutshiswa eNkosini.

¹³ Umnikelo wempuphu ozanikelwa lalowo uzakuba yingxenye yehefa lempuphu ecolekileyo ixubene lamafutha, ube ngumnikelo owenzelwe iNkosi ngomlilo olephunga elimnandi; lomnikelo wokuthululwa ozanikelwa lawo uzakuba ngokwesine kwehini lewayini.

¹⁴ Kaliyikudla isinkwa, lomumbu okhanzingiweyo, lezikhwebu ezintsha, kuze kufike lolosuku, lingakalethi umnikelo kaNkulunkulu wenu. Lokhu kuyisimiso esingelakuphela ezizukulwaneni zenu, kuyo yonke imizi yenu.

¹⁵ Kusukela kulolosuku olulandela iSabatha, eliletha ngalo isithungo esizunguzwayo, balani amaviki ayisikhombisa,

¹⁶ libale insuku ezingamatshumi amahlanu emva kweSabatha lesikhombisa; ng’khona lizanikela umnikelo omutsha wempuphu eNkosini.

¹⁷ Thathani emizini yenu izinkwa ezimbili ezizakuzunguzwa, ezenziwe ngengxenye yehefa lempuphu ecolekileyo, ziphekiwe lemvubelo, lizilethe zibe yingqabutho yezithelo eNkosini.

¹⁸ Kanye lesinkwa lizanikela amawundlu ayisikhombisa alomnyaka munye, angelasici, lenkunzi, lenqama ezimbili, zibe ngumnikelo wokutshiswa eNkosini, kanye lomnikelo wempuphu leminikelo yokuthululwa eqondene lalezo, kube ngumnikelo owenzelwe iNkosi ngomlilo olephunga elimnandi.

¹⁹ Lizanikela ngempongo ibe ngumnikelo wesono, lamawundlu amaduna amabili alomnyaka munye abe ngumhlatshelo weminikelo yokuthula.

²⁰ Umpristi uzakuzizunguza kanye lesinkwa sengqabutho yezithelo zibe ngumnikelo wokuzunguzwa phambi kweNkosi, lezimvu ezimbili; zizakuba ngcwele eNkosini, zibe ngezompristi.

²¹ Lizamemezela ngalolosuku, lenze inkonzo enkulu, lingasebenzi. Lokhu kuyisimiso esingelakuphela kuyo yonke imizi yenu ezizukulwaneni zenu.

²² Lapho livuna isivuno selizwe lakini, lingavuni ngokupheleleyo kuze kufike emngceleni wensimu; futhi lingabuthi okuseleyo lapho seliqedile ukuvuna, kodwa likutshiye kube ngokwabayanga lokwabemzini. NgiyiNkosi uNkulunkulu wenu.

²³ INkosi yathi kuMose:

²⁴ Tshono ebantwini bakoIsrayeli uthi: Usuku lokuqala lwenyanga yesikhombisa luzakuba lusuku lokuphumula kini, usuku oluyisikhumbuzo olumenyezelwa ngokutshwaywa kwezimpondo, kube lenkonzo enkulu ngalo.

²⁵ Lingasebenzi ngalo; nikelani umnikelo owenzelwe iNkosi ngomlilo.

²⁶ INkosi yathi kuMose:

²⁷ Usuku lwetshumi lwenyanga le yesikhombisa luzakuba lusuku lokwenza indlela yokubuyisana, lube yisikhathi senkonzo enkulu; lizakuzithoba, linikele umnikelo owenzelwe iNkosi ngomlilo.

²⁸ Ngalolosuku lingasebenzi, ngoba kulusuku lokubuyisana, ukuze lenzelwe lina indlela yokubuyisana phambi kweNkosi uNkulunkulu wenu.

²⁹ Umuntu ongazithobiyo ngalolosuku uzakhutshwa ebantwini bakibo.

³⁰ Lalowo osebenzayo ngalolosuku ngizakumbhubhisa phakathi kwabantu bakibo.

³¹ Lingasebenzi ngalo. Lokhu kuyisimiso esingelakuphela ezizukulwaneni zenu kuyo yonke imizi yenu.

³² Lolosuku luzakuba liSabatha lokuphumula kini, lizithobe; ngosuku lwesificamunwemunye lwenyanga, kusukela kusihlwa kuze kube kusihlwa, lizakugcina iSabatha lenu.

³³ INkosi yathi kuMose:

³⁴ Tshono ebantwini bakoIsrayeli uthi: Usuku lwetshumi lanhlanu lwenyanga le yesikhombisa luzakuba ngumkhosi wamadumba, ozagcinelwa iNkosi insuku eziyisikhombisa.

³⁵ Ngosuku lokuqala kuzakuba lenkonzo enkulu; lingasebenzi ngalo.

³⁶ Lizakunikela umnikelo owenzelwe iNkosi ngomlilo insuku eziyisikhombisa. Ngosuku lwesificaminwembili lizakwenza inkonzo enkulu, linikele umnikelo owenzelwe iNkosi ngomlilo. Kuyinkonzo yokucina, ngakho kaliyikusebenza.

³⁷ Leyo yimikhosi emisiweyo yeNkosi elizakuyimemezela ibe zinkonzo ezinkulu, ukuba kunikelwe iminikelo eyenzelwe iNkosi ngomlilo, iminikelo yokutshiswa, leminikelo yempuphu, imihlatshelo leminikelo yokuthululwa, kube yilowo lalowomnikelo ngosuku lwawo,

³⁸ kanye lamaSabatha eNkosi, leziphiwo zenu, leminikelo yenu yonke yokugcwalisa izithembiso, leminikelo yenu yonke yesihle, elinikela ngayo eNkosini.

³⁹ Ngosuku lwetshumi lanhlanu lwenyanga yesikhombisa, lapho selibuthile isivuno selizwe, gcinani umkhosi weNkosi insuku eziyisikhombisa. Usuku lokuqala losuku lwesificaminwembili zizakuba yizinsuku zokuphumula.

⁴⁰ Ngosuku lokuqala thathani izithelo zezihlahla ezinhle, lezingatsha zamalala, lezingatsha zezihlahla ezilamahlamvu amanengi, lemidubu yemifula, lithabe phambi kweNkosi uNkulunkulu wenu insuku eziyisikhombisa.

⁴¹ Lizakuwugcina ube ngumkhosi eNkosini insuku eziyisikhombisa ngomnyaka. Lokhu kuyisimiso esingelakuphela ezizukulwaneni zenu; liwugcine ngenyanga yesikhombisa.

⁴² Lizakuhlala emadumbeni,

⁴³ ukuze izizukulwana zenu zazi ukuthi ngabahlalisa abantu bakoIsrayeli emadumbeni ekubakhupheni kwami elizweni laseGibithe. NgiyiNkosi uNkulunkulu wenu.

⁴⁴ Ngokunjalo uMose wabatshela abantu bakoIsrayeli ngemikhosi emisiweyo yeNkosi.