ULevi 21 - iBhayibhili Elingcwele 1978

Ubungcwele babapristi

¹ INkosi yathi kuMose: Khuluma labapristi, amadodana kaAroni, utsho kubo ukuthi kakungabi khona omunye wabo ozingcolisayo ngokungcwaba abakibo abafileyo,

² ngaphandle kwezihlobo zakhe, ngitsho unina, loyise, lendodana yakhe, lendodakazi yakhe, lomfowabo,

³ lodadewabo oyintombi emsulwa, ongowomuzi wakhe ngoba engelandoda; angazingcolisa ngenxa yakhe.

⁴ Uba engothetheyo, kangazingcolisi phakathi kwabakibo, abe ngongafanelanga ukukhonza iNkosi.

⁵ Kabayikuphuca amakhanda abo, bangageli indevu zabo, bangazisiki emizimbeni yabo.

⁶ Bazakuba ngcwele kuNkulunkulu wabo, bangahlambazi ibizo likaNkulunkulu wabo. Ngoba yibo abanikela eNkosini iminikelo eyenziwe ngomlilo, ukudla kukaNkulunkulu wabo. Ngakho bazakuba ngcwele.

⁷ Kabayikuthatha abesifazana abangcoliswe yikuphinga, loba abafazi abalahlwe ngamadoda abo; ngoba umpristi ungcwele kuNkulunkulu wakhe.

⁸ Mahlukaniseleni iNkosi, ngoba unikela ngokudla kukaNkulunkulu wenu. Uzakuba ngcwele kini, ngoba mina Nkosi engilenza libe ngcwele ngingcwele.

⁹ Indodakazi yompristi, uba izingcolisa ngokuphinga, iyamngcolisa loyise; kayitshiswe ngomlilo.

¹⁰ Umpristi omkhulu phakathi kwabapristi, okuthelwe ekhanda lakhe amagcobo okugcoba, owahlukaniselwa ukuba embathe izambatho, kayikuvumela ukuba inwele zakhe zithukuluke, angadabuli izambatho zakhe;

¹¹ angasondeli esidunjini, angazingcolisi ngenxa kayise loba kanina;

¹² angaphumi endlini engcwele, angangcolisi indlu engcwele kaNkulunkulu wakhe, ngoba wahlukaniselwe uNkulunkulu ngokugcotshwa ngamagcobo. NgiyiNkosi.

¹³ Angathatha umfazi oseyintombi.

¹⁴ Kodwa umfelwakazi, lowehlukene lendoda yakhe, lowesifazana ongcolisiweyo, lesifebe, kangabathathi. Kodwa kathathe intombi eyabantu bakibo,

¹⁵ ukuba angangcolisi abantwana bakhe phakathi kwabakibo. NgiyiNkosi engimenzayo ukuba abe ngcwele.

¹⁶ INkosi yathi kuMose:

¹⁷ Tshono kuAroni uthi: Kakho owenzalo yakho ezizukulwaneni olesici ongasondela ukunikela ngokudla kukaNkulunkulu wakhe.

¹⁸ Isibili umuntu olesici angasondeli, oyisiphofu, loyisiqhuli, lozicabileyo ebusweni, lolezitho ezingalinganiyo,

¹⁹ lolonyawo olwephukileyo, lolesandla esephukileyo,

²⁰ logogekileyo, longumuthwa, lolomntwana elihlweni lakhe, lolentembuzane, loloqweqwe olulumayo, loba olimeleyo emasendeni.

²¹ Umuntu owenzalo kaAroni umpristi olesici angasondeli ukunikela iminikelo eyenzelwe iNkosi ngomlilo; ngoba elesici, angasondeli ukunikela ngokudla kukaNkulunkulu wakhe.

²² Kuvunyelwa ukuba adle ukudla kukaNkulunkulu wakhe, lokho okungcwele lalokho okungcwele kakhulu,

²³ kodwa angasondeli kulo iveli lakulo ialtare, lokhu elesici, ukuze angangcolisi izindlu zami ezingcwele. NgiyiNkosi ebenzayo ukuba babe ngcwele.

²⁴ Ngalokho uMose wakhuluma loAroni, lamadodana akhe, labantu bonke bakoIsrayeli.