ULevi 20 - iBhayibhili Elingcwele 1978

Abantu abenza okubi bazakuphathwa njengobubi babo

¹ INkosi yathi kuMose:

² Tshono ebantwini bakoIsrayeli uthi: Yilowo lalowo wabakoIsrayeli, loba owabezizweni abahlala koIsrayeli, onikela ngabantwana bakhe kunkulunkulu uMoloki, kabulawe, abantu belizwe bamkhande ngamatshe.

³ Minake ngizamelana lalowomuntu, ngimkhuphe ebantwini bakibo, ngoba enikele ngomunye wabantwana bakhe kuMoloki, wangcolisa indlu yami engcwele, wahlambaza ibizo lami elingcwele.

⁴ Uba abantu belizwe bekhangela eceleni nxa lowomuntu enikela ngomunye wabantwana bakhe kuMoloki, bangambulali,

⁵ mina ngizamelana laye labomuzi wakhe, ngibakhuphe ebantwini bakibo, yena labo bonke abamlandelayo abaphinga loMoloki.

⁶ Uba umuntu esiya kulabo abalamadlozi lezanuseni ukuyaphinga labo, ngizamelana laye, ngimkhuphe ebantwini bakibo.

⁷ Zihlambululeni lina libe ngcwele, ngoba ngiyiNkosi uNkulunkulu wenu.

⁸ Gcinani izimiso zami, lizenze. NgiyiNkosi elenzayo libe ngcwele.

⁹ Wonke umuntu othuka uyise ingabe unina uzakubulawa; uthukile uyise ingabe unina, ngakho ufanele ukufa.

¹⁰ Uba umuntu efeba lomkamakhelwana, bobabili abafebayo kababulawe.

¹¹ Umuntu olala lomkayise wambule ubunqunu bukayise; bobabili kababulawe, bafanele ukufa.

¹² Uba umuntu elala lomalokazana, bobabili kababulawe; benzile ihlazo, bafanele ukufa.

¹³ Uba indoda ilala lendoda njengowesifazana, bobabili benzile okubi; kababulawe, bafanele ukufa.

¹⁴ Uba umuntu ethatha umfazi kanye lonina, lokhu kuyibubi. Kabatshiswe ngomlilo, yena labo, ukuba kungabi khona ububi phakathi kwenu.

¹⁵ Uba umuntu elala lenyamazana, kabulawe, liyihlabe inyamazana.

¹⁶ Uba owesifazana esiya enyamazaneni, alale layo, mbulaleni owesifazana lenyamazana; kabulawe lenyamazana, kufanele ukufa.

¹⁷ Uba umuntu ethatha udadewabo, indodakazi kayise loba ekanina, babonane ubunqunu bakhe, kulihlazo; kabakhutshwe emehlweni abakibo; wambule ubunqunu bukadadewabo, ngakho kathwale ububi bakhe.

¹⁸ Uba umuntu elala lowesifazana osemfuleni, ambule ubunqunu bakhe, unqunule umthombo wegazi lakhe, lowesifazana uzambule ubunqunu bakhe, bobabili kabakhutshwe ebantwini bakibo.

¹⁹ Ungambuli wena ubunqunu bukadadewabo kanyoko, loba ubunqunu bukadadewabo yihlo; ngoba ngalokho umuntu wambule ubunqunu besihlobo sakhe; bobabili bazathwala ububi babo.

²⁰ Uba umuntu elala lomkamfowabo kayise, wambule ubunqunu bomfowabo kayise; bazathwala ububi babo, bafe bengelabantwana.

²¹ Uba umuntu ethatha umkamfowabo, kuyikungcola; wambule ubunqunu bukamfowabo, ngakho kabayikuba lomntwana.

²² Ngakhoke gcinani zonke izimiso zami lezahlulelo zonke zami, lizenze, ukuze ilizwe engiliholela kulo lingalihlanzi.

²³ Kaliyikuhamba ngamasiko esizwe engisixotshayo phambi kwenu; benza zonke lezozinto, ngakho nganengwa yibo.

²⁴ Kodwa ngathi kini: Lizakuthumba ilizwe labo, ngilinike lona libe yilifa lenu, ilizwe eligcwele uchago lenyosi. NgiyiNkosi uNkulunkulu wenu, olahlukanise labezizwe.

²⁵ Ngakhoke yahlukanisani inyamazana ezihlambulukileyo lezingahlambulukanga, lezinyoni ezihlambulukileyo lezingahlambulukanga; lingazingcolisi ngezinyamazana loba ngezinyoni loba ngezinto ezihuquzelayo emhlabathini, engizahlukanise lani ngathi zingcolile.

²⁶ Wobani ngcwele kimi, ngoba mina Nkosi ngingcwele; ngilahlukanisile labezizwe ukuba libe ngabami.

²⁷ Owesilisa lowesifazana abalamadlozi loba abayizanuse, kababulawe, bakhandwe ngamatshe, bafanele ukufa.