ULevi 2 - iBhayibhili Elingcwele 1978

Iminikelo yempuphu

¹ Lapho umuntu enikela eNkosini umnikelo wempuphu, umnikelo wakhe kawube yimpuphu ecolekileyo; uzathela amafutha kuwo, abeke inhlaka kuwo,

² awulethe kumadodana kaAroni angabapristi, acuphe kuwo impuphu ecolekileyo lamafutha, kanye lenhlaka yawo yonke; umpristi akutshise lokhu ealtareni kube yisikhumbuzo, umnikelo owenziwe ngomlilo, olephunga elimnandi eNkosini.

³ Okuseleyo komnikelo wempuphu kuzakuba ngokukaAroni lokwamadodana akhe; yikhu okungcwele kakhulu eminikelweni eyenzelwe iNkosi ngomlilo.

⁴ Nxa uletha umnikelo wempuphu ephekwe eziko, kawube ngowamaqebelengwana angelamvubelo empuphu ecolekileyo ahlanganiswe lamafutha, loba izinkwa ezincinyane ezingelamvubelo ezigcotshwe ngamafutha.

⁵ Uba umnikelo wakho ungumnikelo wempuphu ephekwe ngomganu wensimbi, kawube ngowempuphu ecolekileyo engelamvubelo, ixubene lamafutha.

⁶ Uwuhlephune ube yizihlephu, uthele amafutha kuzo; kungumnikelo wempuphu.

⁷ Uba umnikelo wakho ungumnikelo wempuphu ephekwe ngembiza, kawube ngowempuphu ecolekileyo kanye lamafutha.

⁸ Letha eNkosini umnikelo wempuphu owenziwe ngalezizinto, uwunike umpristi ozakuwuletha ealtareni.

⁹ Umpristi uzathatha emnikelweni wempuphu okuyisikhumbuzo, akutshise ealtareni, kube ngumnikelo owenziwe ngomlilo, olephunga elimnandi eNkosini.

¹⁰ Okuseleyo komnikelo wempuphu kuzakuba ngokukaAroni lokwamadodana akhe; yikhu okungcwele kakhulu eminikelweni eyenzelwe iNkosi ngomlilo.

¹¹ Iminikelo yempuphu oyinikela eNkosini kayifakwa imvubelo, ngoba kawuyikutshisa imvubelo loba inyosi kube ngumnikelo owenzelwe iNkosi ngomlilo.

¹² Ungakunikela eNkosini kube ngumnikelo wezithelo zokuqala, kodwa kakunikelwa ealtareni kube liphunga elimnandi.

¹³ Lungisa yonke iminikelo yakho yempuphu uyitshwaye; ungavumeli ukuba umnikelo wakho wempuphu uswele itshwayi elesivumelwano sikaNkulunkulu wakho. Nikela yonke iminikelo yakho iletshwayi.

¹⁴ Uba unikela umnikelo wempuphu owezithelo zokuqala zakho eNkosini, uzanikela ngamabele amatsha ayizikhwebu ezosiweyo;

¹⁵ uthele amafutha kuwo, ubeke inhlaka phezu kwawo; lokhu kungumnikelo wempuphu.

¹⁶ Umpristi atshise ingxenye yamabele leyamafutha layo yonke inhlaka yawo, kube yisikhumbuzo; kungumnikelo owenzelwe iNkosi ngomlilo.