ULevi 19 - iBhayibhili Elingcwele 1978

Imithetho yobungcwele

¹ INkosi yathi kuMose:

² Tshono kulo lonke ibandla labakoIsrayeli uthi: Wobani ngcwele, ngoba mina Nkosi ngingcwele.

³ Wonke umuntu kahloniphe unina loyise. Gcinani amaSabatha ami; ngiyiNkosi uNkulunkulu wenu.

⁴ Lingaphendukeli kuzo izithombe, lingazenzeli onkulunkulu ababunjiweyo. NgiyiNkosi uNkulunkulu wenu.

⁵ Nxa linikela eNkosini umhlatshelo weminikelo yokuthula, liwunikele ukuze lamukeleke.

⁶ Uzakudliwa ngosuku lokunikela kwenu loba ngakusasa; konke okuseleyo ngosuku lwesithathu kuzatshiswa ngomlilo.

⁷ Uba udliwa ngosuku lwesithathu, kuzakuba yisinengiso; kawuyikwamukeleka.

⁸ Wonke umuntu owudlayo uzathwala ububi bakhe, ngoba wonakalisile okungcwele kweNkosi; lowomuntu uzakukhutshwa ebantwini bakibo.

⁹ Lapho livuna isivuno selizwe lakini, lingavuni ngokupheleleyo kuze kufike emngceleni wensimu; futhi lingabuthi okuseleyo lapho seliqedile ukuvuna.

¹⁰ Lingakhi zonke izithelo zezivini zenu; futhi lingakhi izithelo zezivini ezivuthukileyo; kodwa zitshiyeni zibe ngezabayanga lezabemzini. NgiyiNkosi uNkulunkulu wenu.

¹¹ Lingebi, lingakhohlisani, lingaqambelani amanga.

¹² Lingafungeli ibizo lami amanga, lize lihlambaze ibizo likaNkulunkulu wenu. NgiyiNkosi.

¹³ Lingacindezeli umakhelwane wenu, lingamphangi. Lingagcini iholo loqatshiweyo ubusuku bonke kuze kube sekuseni.

¹⁴ Lingaqalekisi izacuthe, lingakhubekisi iziphofu, kodwa lesabe uNkulunkulu wenu. NgiyiNkosi.

¹⁵ Lingahluleli ngokungalungi; lingakhethi ongumyanga loba omkhulu, kodwa lahlulele umakhelwane wenu ngokulungileyo.

¹⁶ Lingahambahambi linyeya phakathi kwabakini; lingamelani lomakhelwane wenu. NgiyiNkosi.

¹⁷ Lingazondi umfowenu enhliziyweni zenu; khuzani umakhelwane wenu, kodwa lingabi lasono ngenxa yakhe.

¹⁸ Lingaphindiseli, lingabi lasikhwili labantwana babakini; thandani umakhelwane wenu njengalokhu lizithanda lina. NgiyiNkosi.

¹⁹ Gcinani izimiso zami. Lingavumeli inkomo zenu zikhwelwe ngezolunye uhlobo. Lingahlanyeli emasimini enu inhlobo ezimbili zenhlanyelo. Lingambathi izigqoko ezenziwe ngamalembu amabili ehlukeneyo.

²⁰ Uba umuntu elala lesigqilikazi esikhombileyo, esingahlengwanga, singakhululwanga ngesihle, kuzakuba lecala. Kabangabulawa, ngoba sasingakhululwanga.

²¹ Kodwa yena uzakuletha eNkosini umnikelo wecala, ngasemnyango wethente lokuhlangana, ngitsho inqama ibe ngumnikelo wecala.

²² Umpristi uzakumenzela indlela yokubuyisana ngenqama yomnikelo wecala phambi kweNkosi ngenxa yesono asenzileyo, athethelelwe isono sakhe.

²³ Lapho selifikile elizweni, lihlanyele izihlahla ezinengi ezidliwayo, lizakuthi izithelo zazo ziyazila kini; zizazila kini iminyaka emithathu, zingadliwa.

²⁴ Ngomnyaka wesine zonke izithelo zazo zizakuba ngcwele, zibe ngumnikelo wokubonga eNkosini.

²⁵ Ngomnyaka wesihlanu lingadla izithelo zazo, ukuze zithele kakhulu. NgiyiNkosi uNkulunkulu wenu.

²⁶ Lingadli lutho olulegazi. Lingenzi imilingo, lingavumisi.

²⁷ Lingageli inwele zenu ezisemaceleni, lingageli izindevu zenu.

²⁸ Lingazisiki emizimbeni yenu ngenxa yabafileyo, lingazicabi. NgiyiNkosi.

²⁹ Lingoni amadodakazi enu ngokuwenza abe ngamawule, funa ilizwe lehlelwe yikuphinga, ligcwale ububi.

³⁰ Gcinani amaSabatha ami, lihloniphe indlu yami engcwele. NgiyiNkosi.

³¹ Lingayi kulabo abalamadlozi lezanuseni; lingabadingi ukuze lingco liswe yibo. NgiyiNkosi uNkulunkulu wenu.

³² Sukumelani oyimpunga, limhloniphe umuntu omdala, lesabe uNkulunkulu wenu. NgiyiNkosi.

³³ Nxa owezizweni ehlala lani elizweni lakini, lingamhluphi.

³⁴ Owezizweni ohlala lani uzakuba njengowokuzalwa elizweni phakathi kwenu, limthande njengalokhu lizithanda lina; ngoba lani lalingabantu bezizweni elizweni laseGibithe. NgiyiNkosi uNkulunkulu wenu.

³⁵ Lingahluleli ngokungalungi ekulinganiseni ubude, loba ekulinganiseni izilinganiso, loba ekulinganiseni ubunengi.

³⁶ Wobani lezikali zokulinganisa ezilungileyo, lezilinganiso ezilungileyo, lehefa elilungileyo, lehini elilungileyo. NgiyiNkosi uNkulunkulu wenu owalikhupha elizweni laseGibithe.

³⁷ Gcinani zonke izimiso zami lezahlulelo zami zonke, lizenze. NgiyiNkosi.