ULevi 18 - iBhayibhili Elingcwele 1978

Imithetho emayelana lomtshado ongavunyelwayo, lezenzo ezimbi ezithile

¹ INkosi yathi kuMose:

² Tshono ebantwini bakoIsrayeli uthi: NgiyiNkosi uNkulunkulu wenu.

³ Lingenzi njengokwenza kwamaGibithe lapho lalihlala khona, lingenzi futhi njengokwenza kwamaKanani engiliholela kuwo. Lingahambi ngemithetho yabo.

⁴ Gcinani izahlulelo zami lezimiso zami, lihambe ngazo. NgiyiNkosi uNkulunkulu wenu.

⁵ Ngakhoke gcinani izimiso zami lezahlulelo zami; umuntu angaphila ngokwenza njalo.

⁶ Kakungasondeli muntu esihlotsheni sakhe ukwambula ubunqunu bakhe. NgiyiNkosi.

⁷ Ungambuli ubunqunu bukayihlo lobunqunu bukanyoko; ungambuli ubunqunu bakhe lokhu engunyoko.

⁸ Ungambuli ubunqunu bomkayihlo, ngoba buyibunqunu bukayihlo.

⁹ Ungambuli ubunqunu bukadadewenu, indodakazi kayihlo loba indodakazi kanyoko, loba ezelwe kini loba ezelwe kwelinye ilizwe.

¹⁰ Ungambuli ubunqunu bendodakazi yendodana yakho, loba obendodakazi yendodakazi yakho, ngoba ubunqunu babo yibunqunu bakho.

¹¹ Ungambuli ubunqunu bendodakazi bomkayihlo ezelwe nguyihlo, lokhu ingudadewenu.

¹² Ungambuli ubunqunu bukadadewabo kayihlo, ngoba eyisihlobo sikayihlo.

¹³ Ungambuli ubunqunu bukadadewabo kanyoko, ngoba eyisihlobo sikanyoko.

¹⁴ Ungambuli ubunqunu bomfowabo kayihlo; ungasondeli kumkakhe, ngoba eyisihlobo sakho.

¹⁵ Ungambuli ubunqunu bukamalokozana; ungambuli ubunqunu bakhe lokhu engumkamntanakho.

¹⁶ Ungambuli ubunqunu bomkamfowenu, ngoba kuyibunqunu bukamfowenu.

¹⁷ Ungambuli ubunqunu bowesifazana kanye lobendodakazi yakhe; ungathathi indodakazi yendodana yakhe loba indodakazi yendodakazi yakhe, ukuba uveze ubunqunu bayo; ngoba bayizihlobo zakho, lokho kuyibubi.

¹⁸ Ungathathi udadewabo womkakho ukuba wambule ubunqunu bakhe umkakho esekhona.

¹⁹ Ungasondeli kowesifazana wambule ubunqunu bakhe esangcoliswe yikuba semfuleni.

²⁰ Ungalali lomkamakhelwana ukuzingcolisa ngaye.

²¹ Ungavumi ukuba abantwana bakho banikelwe kunkulunkulu uMoloki, ukuba uhlambaze ibizo likaNkulunkulu wakho. NgiyiNkosi.

²² Ungalali lowesilisa njengowesifazana, ngoba kuyinto embi.

²³ Ungalali lenyamazana, uzingcolise ngayo; futhi owesifazana angazinikeli enyamazaneni, alale layo; lokhu kulihlazo.

²⁴ Lingazingcolisi ngalezizinto, ngoba izizwe engizixotsha phambi kwenu ziyazingcolisa ngazo.

²⁵ Ngalokho ilizwe langcola; ngakho ngatshaya abantu balo, lelizwe labahlanza.

²⁶ Kodwa lina gcinani izimiso zami lezahlulelo zami, lingenzi leyodwa yalezozinto ezimbi, loba owokuzalwa ekhaya loba owemzini ohlala phakathi kwenu.

²⁷ Ngoba zonke lezizinto ezimbi bazenza abantu balelolizwe ababekhona ngaphambi kwenu, ngakho ilizwe langcola.

²⁸ Lingalonakalisi lina, ukuba ilizwe lingalihlanzi njengalokhu lahlanza isizwe esasikhona phambi kwenu.

²⁹ Ngoba bonke abantu abenza lezizinto ezimbi bazakukhutshwa ebantwini bakibo.

³⁰ Ngakhoke gcinani imilayo yami ukuba lingenzi lalinye lalawomasiko amabi ayesenziwa ngaphambi kwenu, lingazingcolisi ngawo. NgiyiNkosi uNkulunkulu wenu.