ULevi 17 - iBhayibhili Elingcwele 1978

Imithetho yokuhlaba

¹ INkosi yathi kuMose:

² Tshono kuAroni lamadodana akhe, labantu bonke bakoIsrayeli, uthi: Nanku iNkosi elaye ngakho isithi:

³ Uba umuntu wendlu kaIsrayeli ehlaba inkabi loba imvu loba imbuzi ezihonqweni, ingabe ngaphandle kwezihonqo,

⁴ angayilethanga emnyango wethente lokuhlangana ukuba anikele ngayo eNkosini ngaphambi kweTabernakeli leNkosi, uzakuba lecala legazi, ngoba echithile igazi; uzakukhutshwa ebantwini bakibo.

⁵ Ngalokho abantu bakoIsrayeli bafanele ukuletha eNkosini imihlatshelo abayihlaba egangeni, bayilethe kumpristi ngasemnyango wethente lokuhlangana, banikele ngayo ibe yiminikelo yokuthula eNkosini.

⁶ Umpristi uzakhaphazela igazi ealtareni leNkosi ngasemnyango wethente lokuhlangana, atshise amahwahwa, abe liphunga elimnandi eNkosini.

⁷ Ngakhoke kabasayikuhlabela omoya ababi imihlatshelo yabo, ababesiya kubo ukuphinga sebengidela. Lokhu kuzakuba yisimiso esingelakuphela kubo ezizukulwaneni zabo.

⁸ Tshono kubo uthi: Yilowo lalowomuntu wendlu kaIsrayeli, loba owemzini ohlala phakathi kwabo, onikela umnikelo wokutshiswa loba umhlatshelo,

⁹ angawulethi emnyango wethente lokuhlangana ukuba awunikele eNkosini, uzakukhutshwa ebantwini bakibo.

Igazi kalilakudliwa

¹⁰ Uba umuntu wendlu kaIsrayeli, loba owemzini ohlala phakathi kwabo, esidla igazi, ngizakumelana laye olidlayo, ngimkhuphe ebantwini bakibo.

¹¹ Ngoba ukuphila komzimba kusegazini; ngilinike lona ealtareni ukwenzela lina indlela yokubuyisana; ngoba kuligazi eliyikuphila elenza indlela yokubuyisana.

¹² Ngakhoke ngathi ebantwini bakoIsrayeli: Kakungabi khona phakathi kwenu odla igazi; lowemzini ohlala phakathi kwenu kangadli igazi.

¹³ Uba omunye wabantu bakoIsrayeli, loba owemzini ohlala phakathi kwabo, ezingela abambe inyamazana ingabe inyoni edliwayo, kachithe igazi layo, aligqibele ngomhlabathi.

¹⁴ Ngoba ukuphila kwezidalwa zonke kusegazini lazo; yikho ngathi ebantwini bakoIsrayeli: Lingadli gazi lezidalwa, ngoba ukuphila kwazo kuligazi; olidlayo uzakuxotshwa.

¹⁵ Futhi wonke umuntu, loba engowokuzalwa elizweni loba engowemzini, odla lokho okuzifeleyo loba lokho okubanjwe yizilo, kagezise ingubo zakhe, ageze ngamanzi, ahlale engcolile kuze kuhlwe; emva kwalokho uzakuhlambuluka.

¹⁶ Kodwa uba engazigezisi, engagezi lomzimba wakhe, uzathwala ububi bakhe.